1Nokon keen wetsabó, ikonhamatianbipari, jatíbi ja Diossen Shinanman imaa yoyo ikaibo riki noa, iki ikaibo jato tanakanwe, ja jato meran iká shinanki Diossena iki ixon, maton onannon. Moara ichaira nato neten ikonma *profetabo pikókanke.
2Jaskaáxonra, maton onanti iki, ja ikoni Diossen Shinanman yoyo ikaibo. Jatíbi, ja Jesucristora nato neten joni keskatax joá iki, ixon yoiaibo riki, Diossen Shinanman imaa ikaibo.
3Jatian jaskaakin ja Jesús ikonhayamaibora, Diossen Shinanhomabo ikax, Criston rawikan shinanyares ikanai. Jaskara shinan jotira, moabi maton ninkata iki. Jara nato neten moa itinke.
4Nokon keen bakebó, matora Diossena iki. Jaskara ixonra, ja jansobo moa matoanharesa iki. Ja mato meran iká shinan, nato netemea shinan xewina atipana koshia iketian.
5Jabora nato netemeabo iki, jakopira nato netemea jawékibokires yoyo ikanai, jatianra ja nato netemeabaon jato ninkaxonai.
6Ikaxbi noabora Diossena iki. Jatian ja Dios onannatonra, noa ninkaxonai, ikaxbi ja Diossenamatonra, noa ninkáxonyamai. Jaskákanainkoxonra, non onanti atipanke, tsoarin ja ikon Shinanya itan tsoarin ja janso shinanya ixon.
7Nokon keen wetsabó, noara jatíbibo betan noiananax jakanti jake, Diossibakeax noimisti shinan joái kopí. Jatíbi ja noimisbo riki, Diossen bake itan Dios onannabo.
8Ja noimismabora Dios onannamabo iki. Dios iki noimis.
9Já kopires noa jati neteya inon ixonra, jawen jabicho Bake nato neten raanxon, noa Diossen oinmaa iki noa jan akonkin noia.
10Neskáakin riki noa noia: Nonpari Dios noia iká kopíma, janpariakin noa noixonkayara jawen Bake raana iki, já mawata kopí non ochabo moa noa shinanxonyamanoxon.
11Nokon keen wetsabó, jaskáakin noa Diossen noia ikenra, noaribi wetsabo betan noiananti jake.
12Dios iki tsonbi jawetianbi oinyosma, ikaxbi noa wetsabo betan noianana ikenra, Dios noo meran jaai, jatianra ja Diossen noimisti shinanman non jato noia onanti ikai.
13Ja noa Dios meran jaa, itan noo meran Dios jaa non onannon ixonra, jawen Shinan noa menia iki.
14Nonbishamanra oinna iki, nato netemea jonibo kishpinmanon ixon, Papan jawen Bake raana. Jatian ja riki non jato onanmai.
15Jaweratobaonki, ja Jesús riki Diossen Bake ixon ikonhai, jabora Dios meran jake, itan jabo meranra Dios jake.
16Jaskaáxonra non onanna iki, itan non ikonha iki Diossen noa noia. Dios iki noimis. Jatian ja noimisbora, Dios meran jake, jainoax jato meranribi Dios jake.
17Neskarainoaxa ja noo meran iká noimisti shinan onanti ikai; jaskatax ja jonibaon jaton akábo yoixonti nete senenketian noa rakétima kopí, ja Jesucristo ikátiai keskatiribi nato neten jakanabo ikax.
18Ja noimis jonibora, rakéyamai. Ja ikon noimisti shinanmankayara, raké shinanbo keyoai. Jaweratoboki Diossen castiganaketian raketai, jabora Dios akonkin noiti onannamabo iki.
19Jatian nonra noike, janpari noa noia iketian.
20Jaweratoboki enra Dios noike ikibi, jaton wetsabo betanbi omisananai, jabora jansobo iki. Jatian jaweratobaonki, jaton wetsabo oinxonbi noiamai, jabaonra ja Dios oinyamaxon, noikanti atipanyamake.
21Jesucristonra, nato senenhati esé noa menia iki, jaweratobaonki Dios noia, abákanon jaton wetsaboribi noikin.
