1Hermanos, dacaha ditticaon ra cain tti chojni que ndac̈ho ixin tti jehe na ndac̈ho na mé joajna que joixin de ngain Dios, sino que saho ttjiho ra cuidado para sicon ra si chojni mé chonda Espíritu Santo que ttixin de ngain Dios o ni nahi. Ixin ngoixin nontte ndajicaon de chojni jianha que ndac̈ho ixin jehe na nichja na de ixin Dios pero ndoaha.
2Pero janhi sinchehe cain chojni que chonda Espíritu Santo que ttixin de ngain Dios para que jaha ra nchao rrochonxin ra: cain chojni que datsoan na co ndac̈ho na ixin Jesucristo are jehe joí jehe joigoan ná xí, chojni mé chonda na Espíritu Santo que ttixin de ngain Dios.
3Pero tti chojni que datsoanha que Jesús cjoi ná xí, chojni mé chondaha na Espíritu Santo que ttixin de ngain Dios, sino que chojni mé chonda tti espíritu que ningaconhe Cristo. Jaha ra ocoinhi ra que espíritu mé chonda que tsí, co jai espíritu mé ojí ngataha nontte.
4Jaha ra inchin xannchinnchinchjanhna, co jaha ra chojní Dios co coixinha ra ngain cain chojni mé ixin Espíritu Santo que jí nganji ra chonda icha joachaxin que tti espíritu que jí ngain chojni que ditticaonha Jesucristo.
5Chojni mé jeho chojni de ngataha nontte, co mexinxin tjago na cosa que joxon chojni ẍaxaon, co icha chojni que ditticaonha Jesucristo ncheẍoxinhi na ttinhi na cosa mé.
6Pero ján na chojní Dios, co tti chojni que chonxin Dios ttinhi na tti ndac̈ho ján na. Pero tti jeha chojní Dios, nimé ttinha na tti ndac̈ho ján na. Co jañá, nchao satsoan na quexehe chojni chonda tti Espíritu Santo que nichja tti ndoa co quexehe chojni chonda tti espíritu que ncheyexon chojni.
7Hermanos, cain ján na chonda na que sonao chó na naná na ixin tti rinao chó ni ttixin de ngain Dios. Cain chojni que rinao icha chojni, chojni mé xenhe Dios co chonxin na Dios.
8Co tti chojni que rinaoha icha chojni, chojni mé ẍa chonxinha Dios ixin Dios rinao cain chojni.
9Dios cjoagoa na que jehe rinao na are jehe rroanha tti nacoaxinxon Xenhe ngataha nontte para que ján na rrochonda na iná vida naroaxin de ixin jehe Xan.
10Ttinxin na que jeha ján na joinao na Dios, sino que jehe tti joinao na ján na, co mé rroanxin Xenhe para que de ixin jehe Xan cainxin tti jianha que jointtoho na oxenga hna.
11Hermanos, si Dios joinao na jañá, ján na cai chonda na que sonao chó na naná na.
12ẍonhi tiempo ná chojni vicon na Dios, pero si rinao chó na naná na, Dios jí nganji na co jamé icha sonao chó na inchin Dios rinao na.
13Dios chjá na Espíritu Santo, mexinxin ján na chonxin na que Dios jí nganji na co ján na te na ngain jehe.
14Co janha na vicon na, co ndac̈hjan na que Dios Ndodá na rroanha Ndo Xenhe Ndo para que danjo Xan iná vida naroaxin ngain cainxin chojni ngoixin nontte.
15Quexeho chojni que datsoan co ndac̈ho ixin Jesús ján Xenhe Dios, chojni mé jí ngain Dios co Dios jí ngain jehe cai.
16Co jañá ján na noa na co dotticaon na que Dios rinao na. Co Dios mé tti rinaonxin chó na co tti chojni que cainxin tiempo rinao icha chojni, chojni mé jí ngain Dios co Dios jí ngain chojni mé.
17Jañá ján na rinao na icha chojni inchin Jesucristo rinao na ján na para que ján na rrochonda na confianza are tsí tti nchanho que Dios sinchejuzguehe cain chojni. Ixin ján na te na ngataha nontte jihi co donao na icha chojni inchin joinchehe Jesucristo are jehe nttihi ngataha nontte.
18Dios anto rinao na ján na co si ján na rinao na Dios, ẍonhi joaẍaon rrochonda na. Ixin si ndoa rinao na Dios c̈hoha rrochonda na joaẍaon ixin Dios joantsje cain joaẍaon que vonttechonda na. Si c̈honja chojni chonda joaẍaon rroc̈ho que ixin jehe joinchehe cosa jianha co ẍagoen castigoe Dios, ixin si ẍagoen ni Dios, mé ixin ẍa antoha jian rinao ni Dios.
19Ján na rinao na Dios ixin jehe tti joinao na ján na saho.
20Pero si c̈honja chojni ndac̈ho: “Janha rinaho Dios”, co ẍajeho tiempo ningaconhe na iná chojni que ditticaon Jesucristo, chojni mé ncheyaxon. Ixin si ná ni rinaoha ni iná chojni que ditticaon Jesucristo que ovicon ni, mexinxin ¿queẍén sinao ni Dios tti ẍonhi tiempo vicon ni?
21Jehe Ndo coetoan na Ndo jihi: que tti chojni que rinao Dios cai chonda que sinao icha chojni que ditticaon Jesucristo.
