1 Hadì 17:3-11

³“Awè ka kayi ne ziyè ka pevayà te zapit te edsilaan ne eles ka ziyà te zal-ug te Kerit he zapit te edsilaan te Wahig he Jordan.

⁴Ne zutun ka inum te zal-ug, ne edsuǥuen ku is menge uwak te ked-uwit te egkekaan nu zutun.”

⁵Ne midtuman ni Elias haazà is insuǥù kandin te Nengazen. Midhendiyà sikandin te zal-ug te Kerit he zapit te edsilaan te Wahig he Jordan ne zutun sikandin med-ubpàubpà.

⁶Ne ed-uwitan sikandin te menge uwak te supas wey usa emun meselem wey mezukilem, ne zutun sikandin ed-inum te zal-ug.

⁷Ne hein neuǥet nemezahan haazà is beuǥan su wazè en med-uzan.

⁸Ne zutun migkeǥiyan te Nengazen si Elias te,

⁹“Hendiyè ka te Zarefat diyà te Sidon, ne zutun ka ubpà su zuen balu he vahi he midsuǥù ku te kebpekaan kenikew.”

¹⁰Umbe, midhendiyà si Elias te Zarefat. Ne hein nekeume en sikandin diyà te pultahan dutun te inged, neehè din is balu he vahi he ebpengayu. Ne migkeǥiyan din haazà is bahi te, “Betbetai a kenikew uwiti te zeisey zà he wahig su wey a mekeinum.”

¹¹Ne hein egkuwaan en dutun te valu haazà, ne mid-umanan sikandin keǥiyi ni Elias te, “Betbetai a zaan uwiti te zeisey he supas.”