1ꞌAna che ri bꞌinik alaq pachaꞌ ri nubꞌinik riꞌin, jelaꞌ pachaꞌ riꞌin e kanꞌan che ri nubꞌinik pachaꞌ rubꞌinik ri Cristo.
2Kinkiꞌkot ukꞌ alaq ma na meskꞌutam ta alaq ri nupixabꞌanik y taqem lo alaq ri kꞌutunik nuqꞌalajisam chiwach alaq.
3Pero kꞌo ri kuaj ketaꞌmaj alaq: Ri Dios e ujolom pa chapatal wi ri Cristo. Jekꞌulaꞌ, ri Cristo e ujolom pa chapatal wi rachi yey rachi e ujolom pa chapatal wi rixoq.
4We juna achi uchꞌuqum kꞌu rujolom echiriꞌ kuꞌan orar o kuꞌan qꞌalajisanik, rukꞌ waꞌ kukꞌutu na jinta xiꞌin ibꞌ rukꞌ chwach ri Cristo, ri Jun e ujolom pa chapatal wi.
5Noꞌj we juna ixoq na uchꞌuqum ta rujolom echiriꞌ kuꞌan orar o kuꞌan qꞌalajisanik, riꞌ kꞌixbꞌal che ri jun e ujolom pa chapatal wi, ma e junam riꞌ pachaꞌ qꞌatom ronoje ruwiꞌ.
6Ma we juna ixoq na kuchꞌuq ta rujolom, riꞌ asu chuqꞌata ronoje ruwiꞌ. Pero we kꞌixbꞌal che rixoq kaꞌan lik chꞌutiꞌn che ruwiꞌ o kaqꞌat ronoje ruwiꞌ, más ne utz kꞌu riꞌ e chuchꞌuqu rujolom.
7Noꞌj rachi na taqal ta che kuchꞌuq rujolom, ma rire e kukꞌutubꞌej uwach ri Dios y ruma rachi kaqꞌalajin runimal uchomalil ri Dios. Yey rixoq e uchomalil rachi.
8Ma ri nabꞌe achi na petinaq ta che ri nabꞌe ixoq; e ri nabꞌe ixoq che ri nabꞌe achi petinaq wi.
9Yey ri Dios na xuꞌan ta rachi re rachbꞌiꞌil rixoq ma e xuꞌan rixoq re rachbꞌiꞌil rachi.
10E uwariꞌche taqal che rixoq kuchꞌuq rujolom, ma waꞌ e kꞌutubꞌal re uyaꞌom ribꞌ pa taqanik, jelaꞌ kꞌu riꞌ kaqꞌalajinik lik utz uꞌanom chikiwach konoje ri tikawex y chikiwach ne ri ángeles.
11Na rukꞌ ta kꞌu riꞌ, janipa ri qakojom rubꞌiꞌ ri Qanimajawal lik qetaꞌam, rachi y rixoq kikabꞌichal kꞌo kiwach chwach ri Dios y lik kebꞌajawaxik.
12Ma che ri nabꞌe achi petinaq wi ri nabꞌe ixoq yey kuma rixoqibꞌ kebꞌalax rachijabꞌ. Pero ronoje ri kꞌolik, petinaq rukꞌ ri Dios.
13Chꞌobꞌo pe alaq raqan puwi waꞌ: ¿Utz nawi we juna ixoq na uchꞌuqum ta rujolom echiriꞌ kuꞌan orar chwach ri Dios?
14Lik rewi na taqal ta chike rachijabꞌ lik kanimaꞌqir ri kiwiꞌ.
15Noꞌj rixoqibꞌ taqal chike lik nimaꞌq ri kiwiꞌ, ma e kichomalil riꞌ yaꞌtal ruma ri Dios re chꞌuqubꞌal ri kijolom.
16Rukꞌ kꞌu ronoje wa xinchꞌaꞌtibꞌej, we kꞌo junoq karaj kachꞌoꞌjin puwiꞌ, xew kambꞌiꞌij che: Ri nikꞌaj chik iglesias re ri Dios na junwi ta ri kinaꞌoj puwi waꞌ chwa ri kankꞌut riꞌin.
17Rukꞌ wa pixabꞌanik kanjeq bꞌi utzꞌibꞌaxik che alaq woꞌora, na kinkiꞌkot ta rukꞌ ri ꞌanom alaq. Ma echiriꞌ kamol ibꞌ alaq, na utz ta ri kilitaj chixoꞌlibꞌal alaq, ma xa e kaꞌan kꞌax chiꞌibꞌil ibꞌ alaq.
18Nabꞌe na kambꞌiꞌij che alaq, nutom na junam ta kꞌuꞌx alaq echiriꞌ kamol ibꞌ alaq pubꞌiꞌ ri Cristo. Yey kankojo laj qatzij,
19ma e kꞌo jujun kakichꞌobꞌo más kꞌo kiwach chikiwa jujun chik. Yey kilitaj na kꞌu waꞌ chaꞌ jelaꞌ kaqꞌalajinik china taq ri lik utz kiꞌanom chwach ri Dios, ma riꞌ na je ta laꞌ kakiꞌano.
20Ekꞌuchiriꞌ kamol ibꞌ alaq, na e ta re katij alaq ri saqil cena re ri Qanimajawal.
21Ma ri kaꞌan alaq e chujujunal kutijilaꞌ nabꞌe ruwaꞌim, tobꞌ e kꞌo kꞌu jujun kekanaj kan rukꞌ numik yey e kꞌo ne ri keqꞌabꞌarik.
22¿Saꞌ kꞌu riꞌ waꞌ? ¿Na jinta nebꞌa ocho alaq pa kawaꞌ wi alaq? ¿Suꞌchak kꞌu riꞌ echiriꞌ kamol ibꞌ alaq pubꞌiꞌ ri Cristo, kakꞌaq bꞌi alaq kiqꞌij rutinamit ri Dios; ma e kaya alaq kikꞌix ri na jinta kꞌo kukꞌ? ¿Saꞌ kꞌu ri kambꞌiꞌij che alaq? ¿Kanyak kami qꞌij alaq riꞌ ruma ri kaꞌan alaq? ¡Na kanyak ta qꞌij alaq!
23Ri nukꞌulum riꞌin puwi ri saqil waꞌim e ri nukꞌutum chi che alaq, yey waꞌ e junam rukꞌ ri ubꞌiꞌim kan ri Qanimajawal Jesucristo. Ma laꞌ laꞌqꞌabꞌ echiriꞌ ri Jesús xkꞌayixik, xukꞌam ri pam,
24xutioxij che ri Dios y xuwechꞌo, jekꞌuwaꞌ xubꞌiꞌij: «Chikꞌamaꞌ y chitijaꞌ, ma e nucuerpo waꞌ ri kayaꞌ pa kamik iwuma riꞌix. Ekꞌuchiriꞌ kiꞌan taq waꞌ chiqawach apanoq, chiꞌanaꞌ re kuxtabꞌal we riꞌin» xcha ri Jesús
25Jekꞌulaꞌ xuꞌan che ri kꞌolibꞌal kꞌo vino chupa. Kꞌisbꞌal re ri cena, xukꞌam ri kꞌolibꞌal kꞌo vino chupa y jekꞌuwaꞌ xubꞌiꞌij: «Wa ri riꞌ e ri kꞌakꞌ tzij kajikibꞌax uwach rukꞌ ri nukikꞌel. Janipa laj kitij ri vino re wa cena, chiꞌanaꞌ kuxtabꞌal we riꞌin» xcha ri Jesús.
26Janipa kꞌu laj kamol ibꞌ alaq chaꞌ katij alaq wa pam y kaqum alaq wa vino, e katajin alaq riꞌ che utzijoxik rukamik ri Qanimajawal kꞌa echiriꞌ kakꞌun tanchi Rire.
27E uwariꞌche china ri kutij wa pam y kuqum wa vino re ri Qanimajawal yey na rukꞌ ta xiꞌin ibꞌ kutijo, riꞌ kꞌo ri qꞌatbꞌal tzij re ri Dios puwiꞌ ma e kamakun chirij ri Qanimajawal echiriꞌ kukꞌaq bꞌi uqꞌij rucuerpo y rukikꞌel.
28Ruma kꞌu riꞌ, china ri karaj kutij wa pam y kuqum wa vino, nabꞌe na lik chunaꞌa ribꞌ saꞌ ruꞌanom.
29Ma china ri kutij wa pam y kuqum wa vino re ri Qanimajawal yey na kuchꞌobꞌ tana chi utz we waꞌ e keꞌelawi rucuerpo ri Qanimajawal; riꞌ chiribꞌil ribꞌ kukꞌam lo ri qꞌatbꞌal tzij re ri Dios puwiꞌ.
30Ruma e kꞌo jujun jelaꞌ kiꞌanom, e kꞌi ri e yewaꞌibꞌ y ri na jinta kichuqꞌabꞌ chixoꞌlibꞌal alaq, yey e kꞌo ne ri ekaminaq chik.
31Noꞌj we ta nabꞌe na kaqanaꞌ qibꞌ riꞌoj chiqibꞌil qibꞌ, riꞌ na kajawax ta chik kuqꞌat tzij ri Dios paqawiꞌ ma qayijbꞌam chi qibꞌ chwach.
32Noꞌj we na kaqaꞌan ta waꞌ, ri Dios kuqꞌat tzij paqawiꞌ woꞌora re kojuqꞌilo chaꞌ chiqawach apanoq na kuqꞌat ta tzij paqawiꞌ junam kukꞌ ri e aj mak.
33E uwariꞌche nu hermanos, echiriꞌ kamol ibꞌ alaq che utijik ri cena re ri Qanimajawal, choyeꞌej na ibꞌ alaq chaꞌ junam katij alaq waꞌ.
34Yey we kꞌo junoq che alaq lik kanumik, woꞌqa lo chirocho chaꞌ na kapetisaj ta alaq ri qꞌatbꞌal tzij re ri Dios pawiꞌ alaq ruma ri kaꞌan alaq echiriꞌ kamol ibꞌ alaq. Kꞌa kꞌo kuaj kanyijbꞌaꞌ chiwach alaq, pero kꞌate kojchꞌaꞌt puwiꞌ echiriꞌ kinopon ukꞌ alaq.
