1Nagrama Jisas Kraisi nege'na nevararuaza hutma nagri navu'nava negeta avaririho.
2Nagra, tmagrira tamazeri antesgahue. Na'ankure ana miko'zama hazafima tamage'sa antahi nenamitma, antahi'zama rempima huramino'a kante azeri antroko hu'naze.
3Hu'neanagi menina tamagra ma antahiama hnazegu'ma nehuana, mika vene'nemokizmi aseni'a Kraisi manigeno, a'nemofo asenia vene'ne manigeno, Anumzamo'a, Kraisina aseni'a mani'ne.
4Mika vene'nemo'za tavrave zmanunte'ma refitene'za nunamuma hanazano, kasnampa kema hanaza zamo'a zmagra'a zmaseni zmazeri agaze hugahaze.
5Hianagi mika a'nemo'za zmanunte refi'otene'za nunamu hanazo, kasnampa kema hanazana zmagra'a, zmaseni zmazeri zamagaze nehaze. Na'ankure agra magoke mani'neno, aseni azoka'ma vazagatetre'nea a'negna nehuno, asenimofona agaze erinemie.
6Na'ankure mago a'mo'ma azoka'ma refi'otesuno'a, agra azokara taga hutregahie. Hianagi azoka'ma tagahu zamo'ene, azoka'ma vazagate'zamo'ma a'nemofona agaze'za me'ne hanuno'a, atresageno anuntera refitegahie.
7Na'ankure mago ne'mo'a asenirera refi'oteno, agra Anumzamofo amema'ane ragi ami vahe mani'ne, hu'neanagi a'mo'a ve'mofo ragi vahe mani'ne.
8Na'ankure, vemo'a, a'pintira eforera osu'neanki, a'mo ve'mofopintira efore hu'ne.
9A'mofonkure huno vea trora osu'neanki, vemofonku huno a'ra tro hu'ne.
10E'ina hu'negu a'mo'a asenirera avame'za refitenkeno, anazamo'a mago'mofo kvafi mani'ne huno ankeromokizmi zmaveri hugahie.
11Ana hianagi, Anumzamofompina a'mo'a, agra'akera oraoti'neanki, vemofo hanavefi manigeno, vemo'a agrakera oraoti'neanki a'mofo hanavefi oti'ne.
12Na'ankure a'mo'a vahemofopinti efore higeno, anahukna huno vemofona a'mo ksenente. E'ina hu'negu, mika'zamo'a Anumzamofompinti efore hu'ne.
13Tamagra'a refko hiho, amne a'mo'a asenirera tvaravenura refi'ote'neno Anumzamofontera nunamu haniazamo'a knare hugahifi?
14Vemofoma zanra azoka'ma hunte'nesiana agra agaze hugahifi?
15Hianagi a'mofoma zanra azoka'ma hunte'nesiana agri'a konaririzane. Na'ankure, zanra azoka'ma ami'neana, refitentenogu ami'ne.
16Hu'neanagi mago'mo'ma ke hafra amana kegu'ma haniana, nagrama hanuana, tagra ru tavutva ovaririgahune. Maka Anumzamofo veamo'za anahukna antahi'za erigahaze.
17Ama'i ke avariri hogu'ma kreneramua kefina, tamagrira tamazeri sga nosue, na'ankure tamagrama emeri atruma hazafina, knare'zana fore nosianki, havizanke fore nehie.
18Na'ankure ese knare'ma nagra antahi'noana, tamagra mono kevu naga mani'none hutma etru hazafina, rama'a atane'za megeno mago tamarimpa hu'zana omane'ne. Anankema nentahi'na tamagefi hu'na hu'noe.
19Tamage amu'no tamifina atane'zana me'ne. E'ina hanageno Anumzamo refko huno hu izo huzmante'nesamo'za amu'nontifina eama hugahaze.
20E'ina hu'negu tamagrama eritruma hazafina tivo ne'za (Lord's Supper) nenaku eritru nosaze.
21Na'ankure tamagrama ne'zama neneta ruga'amokizmigura zmavegaonte ko nenaze. Mago amo'za zamaga ene nemanizageno, mago'amo'za negi ti nene'za tusi neginenaze.
22Tamagrira tine ne'zanema nesaza nontamia omne'nefi? Hifi tamagra mono no azeri haviza nehutma, zamunte omne nagamokizmi zmazeri zmagaze hu'naku nehazo? Nagra na'ane ke hurmantegahue? Nagra tamagrira husga hugahufi? I'o. Ama ana zankura tmagrira husga osugahue.
23Na'ankure Nagra Ramo rempi hunami'neaza, ete rempi huneramue. Jisas Kraisina komoru hu'za ha' vahe zmazampima avrentenaku haza kenagera, Agra breti erino,
24Anumzamofo susu hunteteno, ana bretia ko'nerino amanage hu'ne, Ama'i Nagri navufa, tamagriku hu'na neramuanki, neneta antahinamiho. (Mat 26:27, Mak 14:24)
25Hagi ne'zana netageno, anahukna huno waini kapu erisaga huno amanage hu'ne. Ama'i waini kapua, kasefa hagerafi ke kora niareti nehue, amana hutma maka knama waini tima nenenutma tamagesa antahinamiho.
26Na'ankure ama bretine, ama kapufinti'ene nesaza zupa, anazamo'a Ramofo friza huama nehanigeno, ete Ramo'a egahie. (Mat 26:26-28, Mak 14:22-24, Luk 22:17-19)
27E'ina hu'negu iza'o havi avu'ava hu'neno, bretine Ramofo kapufinti nesimo'a, Ramofo avufgafine korama'arera kefoza huno, kumi hugahie.
28Mago'mo'ma bretine, kapufinti neku'ma hanuno'a, agra'a avu'ava'zana refko huteno, ana bretine kapufintira negahie.
29Na'ankure mago'mo bretine tine neneno, Ramofo avufga, nenoe huno antahi ama osnimo'a, agra'a azeri haviza nehie.
30E'ina hu'negu, amu'no tamifintira hakare'amo'za hanavea omne amne hige'za, kria erizageno mago'amo'za ko fri'naze.
31Hianagi tagra'ama refko huta tazeri fatgo osu'nesuta, keagafi manigahune.
32Hianagi Ramo'ma tagri'ma refko'ma nehiana, ama mopafi vahe'ma huhampri zmante'nea knazampina uofresunegu tazeri ante fatgo nehie.
33E'ina hu'negu, nenfugata nensarogata tamagra ne'zama nenaku emeri atruma hanuta, zmavega ante'nenkeno maka etru hutenketa neho.
34Hagi mago'mofoma aga'matesigeno'a, agra nonkuma'arega neteno eno. Na'ankure tamagra ma etruma hanafina, refko ohunte ahunte zana omnegahie. Hagi mago'azana, henkama esu'na emeri fatgo hugahue.
