1Oupwe apirüei usun ngang üa apirü Kraist.
2Iwe, üa mwareitikemi pokiten oua chechemeniei fansoun meinisin, oua pwal aleasochisi ekewe afalafal üa ngenikemi.
3Nge üa mochen oupwe weweiti pwe Kraist möküren mwän meinisin, nge mwän möküren fefin, nge Kot möküren Kraist.
4Iwe, are eman mwän epwe iotek ika pwärätä met mi monomon lon imwenfel, nge a pwölüela möküran, ätei a aitengaua Kraist möküran we.
5Nge are eman fefin epwe iotek ika pwärätä met mi monomon lon imwenfel, nge esap pwölüela möküran, neminei a aitengaua pwülüan möküran we. Esap wor sokofesenin neminei me eman fefin mi reipöpöla möküran.
6Are eman fefin esap pwölüela möküran, mei fen öch an epwe fichi möküran. Nge are och minen asäw ren eman fefin an epwe reipöpöla möküran ika fichi möküran, epwe fokun pwölüela möküran.
7Esap wor lomoten än eman mwän epwe pwölüela möküran, pun i lapalapen Kot mi aliosunätä lingen Kot, nge eman fefin a aliosunatä lingen mwän.
8Pun mwän esap för seni fefin, nge fefin a för seni mwän.
9Mwän esap pwal för fänäsengesin fefin, nge fefin a för fänäsengesin mwän.
10Iwe, pokiten ekewe chon läng, eman fefin epwe pwölüela möküran pwe epwe pwä, pwe a nom fän nemenien pwülüan.
11Nge lon ach Samol, esap tufich pwe eman fefin epwe imwüla won an seni mwän, esap pwal tufich pwe eman mwän epwe imwüla won an seni fefin.
12Pun usun ewe fefin a för seni mwän, pwal ina chök usun mwän a uputiu seni fefin, nge Kot a förätä mettoch meinisin.
13Oupwe püsin apwüngü lefilemi ika a öch ngeni eman fefin pwe epwe iotek ngeni Kot lon imwenfel mwen mesen aramas, nge esap pwölüela möküran.
14Ifa usun, ousap püsin mefi pwe a asäw ngeni eman mwän epwe tam meten möküran?
15Nge are meten möküren eman fefin a langatam, iei met a liöch ren. Pun Kot a ngeni meten möküran pwe pwölüpwölün.
16Nge are eman a mochen anini won ekei mettoch, üa chök tongeni apasa, pwe äm me ekewe mwichefelin Kot esap wor rem och sokun lapalap ika örüni.
17Nge lon ekei kapasen öüröür üpwe ngenikemi, üsap tongeni mwareitikemi, pun lupwen oua mwichfengen esap fisöchüla ämi souläng, pwe a fen ngauala.
18Akomwan üa rongorong pwe a wor kinikinfesen lefilemi lupwen oua mwichfengen. Esopun ei pworaus üa fen lükü.
19Ewer, epwe fokun wor kinikinfesen lefilemi, pwe chokewe mi pwüng repwe fokun pwäpwäla.
20Lupwen oua mwichfengen, esap iei ewe mongö än ach Samol oua eäni.
21Pun lupwen oua mongö, eman me eman a popuetä le mongö püsin anan, nge esap witiwit. Iei mine ekoch me leimi ra echik lupwen ekoch ra sakauala.
22Ifa usun, esap wor püsin imwemi ia oua tongeni momongö o ükün ie? Are ifa usun, oua mochen turunufasei ewe mwichefelin Kot o aitengaua ekewe aramas mi wöüngau? Met üpwe ürenikemi usun ei? Ifa usun, üpwe mwareitikemi? Apwi! Üsap fokun mwareitikemi!
23Pun üa angei seni ach Samol ekewe kapas üa aiti ngenikemi, pwe lon ewe pwinin Jutas epwe afangamä ach Samol Jesus, Jesus a angei ewe pilawa,
24a iotekin kilisou ngeni Kot won, a utu o apasa, “Oupwe angei o äni, pun iei inisi üa fangala fänäsengesimi. Iei met oupwe föri pwe oupwe chechemeniei.”
25Pwal ina chök usun mürin ar mongö, a angei ewe kap o apasa, “Ei kap iei än Kot we pwon mi fö lon chai. Iteiten fansoun oupwe ün seni ei kap, oupwe chechemeniei.”
26Wewen ei, pwe iteiten fansoun lupwen oupwe mongö ei pilawa o ün seni ei kap, oupwe asilefeili mälan ach Samol tori epwe war.
27Iei mine are eman epwe mongö ei pilawa ika ün seni ei kap än ach Samol lon an esap fich ngeni, i epwe tipis ngeni inisin ach Samol me chaan.
28Iei mine eman aramas epwe akomwen atittina manauan, mürin epwapw mongö ewe pilawa o ün seni ewe kap.
29Pun are eman esap aücheani wewen inisin ach Samol lupwen a mongö ewe pilawa o ün seni ewe kap, i epwe atoto apwüng won ren an mongö me ün.
30Ina popun chomong me leimi ra samau o apwangapwang, nge ekoch ra fen mäla.
31Nge are sia akomwen atittinakich, Kot esap apwüngükich.
32Nge lupwen sia küna apwüng me ren ach Samol, i a amiritikich, pwe sisap eti fanüfan le küna liwiningauen tipis.
33Iei mine, ämi pwii kana, lupwen oua mwichfengen le mongö ewe mongö än ach Samol, oupwe witiwiti chiechiemi kewe.
34Nge are eman a echik, epwe mongö lon imwan, pwe ousap küna apwüng me ren Kot lupwen oua mwichfengen. Iwe, ren ekewe ekoch mettoch, üpwe öüröüra ngenikemi lupwen üpwe feila remi.
