1Mulor mur a magirak, arlar larning a mur a magirana e Karisito.
2A atong aitna pas mulo, anasa mulo sira nuk pas iau ana ututnala rop, pa mulo mur na asaer ning ia ka asaer tar mulo onoi.
3Ika, a mang sur mulor tasmani mang, e Karisito a pukul na barsan rop, pa a barsan a pukul a hane, pa e God a pukul e Karisito.
4Ning ta barsan ir nunung o ir warwara na propet, pa ka pol alar pas a pukulna, i ame a pukulna.
5Ning ta hane ir nunung o ir warwara na propet, pa bel i pol alar a pukulna, i ame a pukulna. I arlar larning di ka kas rop sen a hih a pukulna.
6Ning ta hane bel i pol alar a pukulna, i wakak ning dir kumur sen a hih a pukulna. Ika, ir meme, ning dir kumur seni o dir kas rop seni, i maining i wakak ning ir pol alar a pukulna.
7Bel i tostos ning ta barsan ir pol alar a pukulna, anasa i a manar e God pa i asangan a matatar e God. Ika a hane i asangan a matatar a barsan.
8Anasa e God bel i tol a barsan miting na hane, i tol a hane miting na barsan.
9Pa e God bel i tol a barsan sur a hane, i tol a hane sur a barsan.
10Ine a kamkamna ning a hane ir pol alar a pukulna, sur ir asangani tetek a tarai pa tetek na angelo otleng mang i kes nahai anuna barsan.
11Ika, i momol, bel di akes masik a hane kusun a barsan, o a barsan kusun a hane. Diar nangan artalai diau, ana nundiau a keskes a lalaun tetek a Leklek.
12Anasa a hane i hanot miting na barsan, pa lar otleng ning a hane i agon a barsan. Ika e God ot a kama ututnala rop.
13Mulo ot mulor nuknuk ana warwarala ne: Mangasa, i tostos sur a hane ir nunung tetek e God, ning bel i pol alar a pukulna? Bel i tostos.
14A toltol anuna tarai ot, i asangan dala mang, ta barsan ning a hih a pukulna i barah, i a utna na meme teteki.
15Ika, ta hane ning a hih a pukulna i barah, i anuna matatar. Anasa e God i saran tar a barbarah a hih a pukulna teteki, sur ir pol alar a pukulna onoi.
16Ning tik ir ururai ana warwara ne, ar atongi larne: Bel mila mur ta toltol masik, pa a tarai rop otleng ane God ting na hananuala, bel la mur ta toltol masik.
17Ana toltolla ning onone ar atai mulo onoi, bel ar atong aitna pas mulo. Anasa, ning mulo sira kes taum ana lotu, bel mulo awakak mulo, mulo alaulau mulo ka.
18A ningnigo na utna: Ia ka longor tari mang, ning mulo sira han taum sur a lotu, mulo sira tapagal sarara ka, pa a nuki ot mang i momol siklik.
19Anasa a tarai a lotu lar taptapagal ot, sur dir oroi lalan la ning la tostos, pa la otleng ning la rongo.
20Ning mulo han taum, mulo nuki mang mulo ien a utna na hangan ana Leklek, ika bel.
21Anasa, ning mulo hangan, taktakai o mulo i nuk pasi ot sur ir hangan nigo, pa bel ir kes pas dingla na tarai otleng. I maining dingla na tarai la murak pa dingla la sipak.
22Mangasa, bel al rumai anumulo sur mulor hangan pa mulor gang ia? Mangasa, mulo oroi purpurum a tarai a lotu ane God, pa mulo ame la ning la kapan? Asa ning ar atongi tetek mulo? Mangasa, ar atong aitna pas mulo ana toltol ne? Bel!
23Anasa a asaer ne a kibas pasi miting tana Leklek pa ka saran tari tetek mulo, i manglarne: Ana pukakiar ana morom ning di asobor tar a Leklek e Iesu, i kibas pas a bret.
24Ning ka atong wakak pas onoi, i tibiki, pa i atongi larne, “Ine a palaok, a sarani sur mulo. Mulor toli larne, sur mulor sira nuk pas iau.”
25Lar otleng ning, lamur ning ka hangan pas, i kibas pas a kap pa i atongi mang, “A kap ne, a tona kunubus mite na sulukik, ning i dat taum tar a tarai o e God. Mulor toli larne, sur mulor sira nuk pas iau ning mulo gangi.”
26Anasa, ana pukakiarla ning mulo ien a bret ne, pa mulo gang ana kap ne, mulo warwara talapor ot ana minat anuna Leklek, tuk ning ir ulak.
27I maining esining ir ien a bret anuna Leklek, pa ir gang ana nuna kap, pa bel i toli ana hanrawai, i tol a laulau ana palaon a Leklek pa a sulukna, pa dir warkurai i ono.
28I wakak ning tik ir oroi nigon tar anuna lalaun, pa lamur ir ien a bret pa ir gang ana kap.
29Ning tik i hangan pa i gang, pa bel i oroi lalan pas a palaona Leklek, ka hangan pas pa ka gang pas ana warkurai a arkeles.
30Ine a kamkamna ning a galis a tarai na arpotor tamulo la sasam pa bel al rakrakainla, pa dingla otleng la ka mat.
31Ngandek ning dala ot, dalar oroi nigon tar anundala a lalaun, e God bel ir saran a warkurai a arkeles tetek dala.
32Ika, ning a Leklek i warkurai dala, i atostos dala, sur gong dala hirua ana warkurai a arkeles taum ana rakrakan hanua.
33I maining, na tastasik, ning mulo han taum sur mulor hangan, mulor kes harnanai sur mulo artalai.
34Ning al tarai o mulo la murak, i wakak ning lar hangan nigo pas ot ting na nunla na rumai, sur gong a warkurai a arkeles ane God ir kibas mulo, ning mulo kes taum. Ning ar hanot, ar saran ulak al warwara na atostos tetek mulo anal ututna otleng.
