1Àgↄ̃ ma yãkɛnaa dada, lákũ madì Kirisi pↄ́ dada nà.
2Ma á sáabu kpà kũ ma yã dìgↄ̃ dↄágu yã sĩnda pínki gũn, akũsↄ̃ á kɛ̀otokↄ̃nɛ kũ ma dàárɛnↄ kũna.
3Má ye àgↄ̃ dↄ̃ kũ Kirisi mɛ́ à gↄ̃gbɛ̃ sĩnda pínki mì ũ, gↄ̃gbɛ̃ mɛ́ à nↄgbɛ̃ mì ũ, akũsↄ̃ Luda mɛ́ à Kirisi mì ũ.
4Gↄ̃gbɛ̃ kũ àtɛn adua kɛ ke àtɛn annabikɛyã o kũ pↄ́o kuna a mìia tɛni a mì kpe bomɛ.
5Nↄgbɛ̃ kũ àtɛn adua kɛ ke àtɛn annabikɛyã o mìgbã tɛni a mì kpe bomɛ, à de lákũ à mì kpárankparan bàmɛ.
6Tó nↄgbɛ̃ dí pↄ́ kú a mìiaro, à a mìkã kɛ̃rɛ. Lákũ mìkãkɛ̃rɛna ke mìbona de nↄgbɛ̃nɛ wé'iyã ũ nà, à pↄ́ kú a mìia.
7Adi kũ gↄ̃gbɛ̃ pↄ́ kú a mìiaro, kũ à de Luda taka kũ a gakurio ũ yãi. Nↄgbɛ̃ sↄ̃, àkũmɛ gↄ̃gbɛ̃ gakuri ũ.
8Zaakũ Luda dí gↄ̃gbɛ̃ bo nↄgbɛ̃ gũnlo, nↄgbɛ̃n à bò gↄ̃gbɛ̃ gũn.
9Adi gↄ̃gbɛ̃ kɛ nↄgbɛ̃ yãiro, nↄgbɛ̃n à kɛ̀ gↄ̃gbɛ̃ yãi.
10Abire yãi kũ malaikanↄ yão dↄ, séde nↄgbɛ̃ gↄ̃ pↄ́ kú a mìia a zã doka sèeda ũ.
11Dikiri gũn nↄgbɛ̃ kun a zĩdanɛ gↄ̃gbɛ̃ sariro, gↄ̃gbɛ̃ sↄ̃, à kun a zĩdanɛ nↄgbɛ̃ sariro.
12Lákũ nↄgbɛ̃ bò gↄ̃gbɛ̃ gũn nà, lɛn dↄ gↄ̃gbɛ̃ dì bo nↄgbɛ̃ gũn lɛ, akũsↄ̃ pↄ́ sĩnda pínki dì bo Luda kĩnaamɛ.
13À yã pìi laasun lɛ́ à gwa. Nↄgbɛ̃ aduakɛna mìgbã mana yá?
14Á dↄ̃ á zĩdanɛ kũ mìkã gbã̀na de gↄ̃gbɛ̃nɛ wé'iyã ũroo?
15Ama tó nↄgbɛ̃ vĩ, à denɛ gakuri ũmɛ, zaakũ Luda nↄgbɛ̃ gbà mìkã à daalamɛ.
16Tó gbɛ̃ke ye à lɛ́kpakↄ̃a kɛ, àgↄ̃ dↄ̃ kũ ókↄ̃nↄ kũ Luda sↄsi gbɛ̃nↄ, ó yã pãnde kũnaro, sé abirekũ.
17Yã kũ má ye mà daárɛ tera gũn, mani á sáabu kpáro, zaakũ á kↄ̃kakaranaa dì vãni iárɛ de a manala.
18Káaku gĩa ma mà, tó a kↄ̃ kàkara, adì bo kↄ̃ kpɛ gã̀ kũ gã̀aomɛ. Ma yã pìi sì kpado.
19Séde kɛ̃kɛ̃kↄ̃ana gↄ̃ kú á tɛ́, de ò yãpuradenↄ dↄ̃ á tɛ́.
20Tó a kↄ̃ kàkara, adi kɛ Dikiri pↄ́blen adì blero,
21zaakũ á baadi dì wã a pↄ́bleimɛ. Nàa dì gbɛ̃kenↄ dɛ, wɛ̃ dì gbɛ̃kenↄ dɛ.
22Á bɛ vĩ à pↄ́ ble, à í minloo? Ke adì Luda sↄsi gbɛ̃nↄ gya bo à wé'i da pↄ́saridenↄamɛ? Mani oárɛ deramɛɛ? Mani á sáabu kpán yá? Kài! Mani á sáabu kpá yã bire musuro.
23Yã kũ ma sì Dikiri kĩnaa, ma dàárɛn dí: Zĩ kũ ò Dikiri Yesu kpàḿma, a gwãani pìia à burodii sɛ̀,
24akũ à aubarika dàn, à lìlikↄ̃rɛ, akũ à pì, a mɛ̀ kũ áni kpá á yãin dí, àgↄ̃ abirekũ kɛ a yã dↄnaágu yãi.
25Lɛmɛ dↄ kũ ò pↄ́ blè ò làka, à toko sɛ̀ à pì, Luda bàka kunna kũ gbɛ̃nↄ dufu a aru gãin dí. Tó átɛn mi, àgↄ̃ mi a yã dↄnaágu yãi.
26Zaakũ tó a burodii pìi sò, tó a í pìi mì, átɛn Dikiri ga baaru kpá ari àgↄ̃ gɛ́ sumɛ.
27Abire yãi tó gbɛ̃ burodii pìi sò, tó à Dikiri í pìi mì, burodi kũ í pìio yãdanaa sari, à taari kɛ̀ Dikirinɛ a mɛ̀ kũ a aruo yã musumɛ.
28Baadi a zĩda yã gwa, gbasa à burodii pì só, à í pì mi,
29zaakũ tó gbɛ̃ sò, tó à mì Dikiri mɛ̀ dↄ̃naa sari, à yã dà a zĩdalamɛ.
30Abire yãi gyãrenↄ kũ aafiasaridenↄ kɛ̀ dasi á tɛ́, akũsↄ̃ gbɛ̃ kũ ò kɛ̀ sarinↄn kĩanaro.
31Tó óni ó zĩda yã gwa, Dikiri ni ó taari lero.
32Tó à ó taari è, àtɛni ó totomɛ, de yã sún daóla kũ anduniaoro yãi.
33Abire yãi ma gbɛ̃nↄ, tó a kↄ̃ kàkara, átɛn Dikiri pↄ́ ble, àgↄ̃ kↄ̃ dã.
34Tó nà tɛn gbɛ̃ dɛ, à pↄ́ ble a bɛa, de á kↄ̃kakarana sún yã iárɛro yãi. Mani yã kũ gↄ̃̀nↄ bↄkↄtɛárɛ, tó ma su.
