1 CORINTIOS 11

1

2

3

4

5

6

7

8

9

10

11

12

13

14

15

16

¹Goḻwi sca, zigne raṉ to noxco naa mban naa zigne blu Jesús, scaquegaa to goḻtsoxco gban to zigne raṉ to mban naa.

²Bets, bzian, rleynie naa to goṉ sac tibaque rsoladz to naa, ni rioxco to zienaḻ to grë miṉe pseed naa to.

³Per goḻsoladz gaṉle: grëse meṉ wnaa, none zha bgui gnabey lo zho, teḻ zha bgui Jesús rnabey lo zho, zigne rnabey Dios lo me.

⁴Gacxe waa, teḻ tib zha bgui yase nozodiidznie zho Dios, quiateedgaa zho xtiidz me, ni zob xombrel zho; xquieḻto Jesús ga rbee zho.

⁵Scagaa meṉ wnaa, teḻ zhoobd bay guic zho ni zo zho nozodiidznie zho Dios, quiateedgaa zho xtiidz me, xquieḻto mgui ga rbee zho; sac ga rlu zho rond zho miṉe rnabey mgui.

⁶Teḻne racladzdgaa zho gdze lad guic zho, mazd gnabey zho chug guitsguic zho. Laa teḻne rtoladz zho chuga, rtoladz zho gacruxa, dzigo mazd cxobguic zho xpay zho.

⁷Grë zha bgui, nod pe nacne gdze lad guic zho, sac choot samiech guidzliu zho rnabeyd lo zho. Zeeṉe bzaa Dios mgui, bzaa me zho zigne nac me, zeeṉa glu zho gaṉle pa lotaa meṉ non nac me; scagaa wnaa, laa wnaa biaaṉ par glu zho gaṉle non mgui.

⁸Gotsaa gwi ne gaṉle, letxe xcuxtid wnaa waa biaa mgui, sinque xcuxti mgui briee biaa wnaa.

⁹Stiba, zeeṉe psaṉ Dios wnaa, ib laa me psaṉ zho par gacnie zho mgui.

¹⁰Gacxe nagoṉ waa ib none gdze lad guic wnaa, zeeṉa glu gaṉle nguzobdiidz zho lo zha ne rnabey zho; haxta grë anjl ne no gbaa zley zho gaṉ zho miṉ co.

¹¹Per guiabde to togo peet nond wnaa, goḻsoladz gaṉle psaṉle Dios diidz zigtaa mguiw, zigtaa wnaaw rquiinlsa zho; sac teḻne guieṉd wnaa guieṉd mgui, teḻne guieṉdgaa mgui guieṉd wnaa.

¹²Gotsaa gwi ne gaṉle, zeeṉe biaa wnaa cho mgui briee dzit ne biaa wnaa, per zeeṉe laa wnaa biaaṉ, haxta lo nadze wnaale rzo mgui; zigtaa mguiw, zigtaa wnaaw Dios psaṉ zho grop zho.

¹³¿To nadieṉ zha rzac to? ¿Pe nli nonguieḻa gdze lad guic wnaa zeeṉe nonab zho lo Dios, te nonguieḻda ye?

¹⁴Goḻwi gaṉle ib no gdze guic wnaa, biaaṉle zho rroob guits guic zho parne ctsew lad guic zho;

¹⁵teḻ zha, haxta rleynie zhow zeeṉe scataa noola, saṉgue ne nac ne zha bgui, guieḻtow ga guiool guitsguic ne.

¹⁶Teḻ nogaa zha ne rzac led scada, maase gnee zho. Per ible znu goṉ noseed no miech, ni grëragaa zha ne rliladzle Xtiidz Dios, rieṉ zho ne nli scaw.

¹⁷Bets, bzian, ne nligaa rley naa tibaque rsoladz to naa, per bin naa zeeṉe rcaalsa to row to xtsee ne psaṉ Jesús diidz, laa ne gley to ycaalsa to, leḻ quiayuṉctal to xtoḻ to. Miṉcosi nagoṉ ni lalnu riod zdoo naaw.

¹⁸Ziyon naa gzobtaa zeeṉe rcaalsa to, pe na tsiegald tiḻdiidz to, laa ne tipse gac to leḻ rlëëlsa to. Ni rgobey naa nli scaw.

¹⁹Rieṉ naa masaque rzac to ible sca none gac to, parne glupaa cho nac zha ne non xtiidz, zeeṉa guiaṉnziuu zho lo miech.

²⁰Led zhixtseedraa Jesús i goṉ ruṉ to.

²¹Sac ron naa zeeṉe laa to row, masaque lëëlëd rac to row to ncuaaṉe zienie to, ib rwide to no zha ne rdziṉ ga quianied zho nroob ncuaaṉe gow zho. Squi rzob to rowcho to, haxta rzudz to; laa zha mbanse rac zho grieelod gow zho ncuaaṉe row to.

²²¿Mod guieṉd lidz to, ga sob to gow to, guie to haxta zaatne guieltaa to, led node to ruṉctoladz to zha ne squi guieṉd pe yquiin? I goṉ rlu to rleyniede to grë zha ne no xnëz Dios. ¡Ni palal goṉ rdziguiend naa ncuaaṉe noyuṉ to i!

²³Goḻsoladz gaṉle zha nac ne laa xtsee rii biaaṉ, Jesús psaṉ diidz gaca, sca gocnaṉ naaw ni scagaa biaḻlu naaw lo to. Wdze ne bnaaz zho Jesús ga, zeeṉe blozh dowxtseenie me xpëëdscuel me, bzheṉ me tib guietxtil, bdeed me xquizh lo Dios;

²⁴blozhse bdeed me xquizh, nzian lë beeṉ me guietxtil co, bdeed mew lo zho rëb me: “Goḻquiina, rrieequia lëë xcuerp naa nu, sac goṉ znu guṉ zho xcuerp naa parne csilaa naa to grë to. Goḻguṉ xtsee rii, parne glu to gaṉle tibaque rsoladz to naa.”

²⁵Blozh ga, scaque bzheṉ me tib cop no vin, rëb me lo zho: “Lëë stib trat cub nu goṉ riaaṉ Dios grë me miech, rrieequia xchen naa nu nac vin rii, ren ne tso sell trat co par glu nona. Gzataa zeeṉe znu guie to vin, goḻsoladz gaṉle zha naca.”

²⁶Goḻguieṉ sca, zeeṉe guṉtaa to xtsee co zaacse goḻguṉa, sac goṉ, ga quiaxobneṉ to lo miech Jesús nac meṉ ne gut xcuent to, psilaa me to. Tibaque none guṉ to xtsee co, haxta gdziṉ dze ne laa me guiaad stib.

²⁷Gacxe waa, zha ne rieniewguit guic rquiind zho xtsee co zigne no yquiin zhow, doḻ nroob ga ruṉ zho, xcuerp Jesús ga, xchen me ga noguitnie zho.

²⁸Zeeṉe guṉ to xtsee co, none wen wen sob to gaṉle zha naca, pe nacne laaw rac, dzigo lozh ga zac yquiin tow.

²⁹Sac goṉ zha ne lega gow guietxtil co, lega guie zho vin co, sac zhow zig beeḻze pe xtsee; rrieequia guieḻnë ne ygaa zho ga gow zho, guieḻnë co ga guie zho.

³⁰Miṉcocxe waa, blactaa zha ne nacgrë to i quiayaaṉ nsis, nogaa zho rzacnële, haxta nzian zho gutle.

³¹Teḻne niaca miṉe wen wen gwi ne gaṉle zha nac xtsee co, tsod pe nacne pe guieḻnë ne cxeeḻ Dios dziaṉ ne.

³²Ni zeeṉe scagaa rteed me ne tib caxtigw, laaw ruṉ me parne tsaa ne biini gbiire gbig ne lo me, zeeṉa led yed ne nitlo gaḻ dze ne nitlo grëraa miech ne zienaḻ ncuaaṉe lo guidzliu rii.

³³Bets, bzian, goḻguieṉ sca zeeṉe ycaalsa to guṉ to xtsee co, goḻcuëz grëraa zha ne nacgrë to dzigo tipse goḻsilo goḻquiina.

³⁴Teḻ zha ne rieṉgaa lëbd zho lozh gdziṉ grëraa zha ne nacgrë zho, mazd gowgazh zho lidz zho, zeeṉa yguibd zho ygaa zho guieḻnë co. No spalal miṉe racladz naa gacnaṉ to, per naa zeeṉe guiaḻ naa nëz qui dzigo gne naaw lo to.