1Ekꞌu woꞌora kankꞌul pana uwach taq ri tzꞌonobꞌal xꞌan lo alaq chwi ri kꞌulanikil pa ri carta xtaq lo alaq chwe. We juna achi kakꞌojiꞌ utukel y na jinta ixoq rukꞌ, utz ri kuꞌano.
2Pero ruma kꞌu ri tzaqibꞌal pa mak re rurayibꞌal ri cuerpo, más utz kꞌu riꞌ we rachi kꞌo rixoqil y rixoq kꞌo rachijil.
3Chirajawaxik kꞌut e rachi chuꞌana janipa ri taqal che kuꞌan rukꞌ ri rixoqil ruma e kꞌulanik; jekꞌulaꞌ rixoq chuꞌana janipa ri taqal che kuꞌan rukꞌ ri rachijil.
4Rixoq na e ta rajaw rucuerpo ma rucuerpo puqꞌabꞌ ri rachijil kꞌo wi; jekꞌulaꞌ rachi na e ta rajaw rucuerpo ma waꞌ puqꞌabꞌ ri rixoqil kꞌo wi.
5Maxuꞌyaj kꞌu ibꞌ alaq riꞌ chiwach alaq rukꞌ ri rayibꞌal alaq, xew we chꞌaꞌtibꞌem chi alaq chaꞌ na kajunimaj ta ibꞌ alaq kebꞌ oxibꞌ qꞌij ruma kaya ibꞌ alaq pa oración. Ekꞌuchiriꞌ kakꞌis ruqꞌijol ri oración, junimaj tanchi ibꞌ alaq. Ma we lik naj na kajunimaj ta ibꞌ alaq, laj kakꞌam pa alaq ruma ri Satanás y na kachꞌij ta kꞌu alaq uchuqꞌabꞌ.
6Kambꞌiꞌij kꞌu waꞌ xa pachaꞌ nupixabꞌanik riꞌin che alaq; na e ta jun taqanik.
7Ekꞌu ri kanchꞌobꞌ raqan riꞌin e lik utz riꞌ we ta konoje rachijabꞌ kekꞌojiꞌik jelaꞌ pachaꞌ nuꞌanom riꞌin. Na rukꞌ ta kꞌu riꞌ, puqꞌabꞌ ri Dios kꞌo wi saꞌ rusipanik kuya chikijujunal. Ma chike jujun uyaꞌom kachbꞌiꞌil, yey chike jujun chik uyaꞌom kekꞌojiꞌ kitukel.
8Kuaj kambꞌiꞌij chike ri achijabꞌ na e ta kꞌulanik y rixoqibꞌ e malkaꞌnibꞌ, e lik utz we rike kekanajik e laꞌ kitukel pachaꞌ ri nuꞌanom riꞌin.
9Noꞌj we rike na kakichꞌij taj e kꞌo kitukel, más utz we kekꞌuliꞌik, ma na utz taj we e kakiya kinaꞌoj puwi ri kirayibꞌal y jekꞌulaꞌ kakikꞌis kibꞌ.
10Chike kꞌu ri e kꞌulanik, kambꞌiꞌij waꞌ: Na utz taj we rixoq kujach kan ri rachijil. Y wa jun taqanik na xa ta nuchꞌaꞌtem riꞌin, waꞌ re ri Qanimajawal.
11Pero we rixoq kujach kan ri rachijil, na utz taj we kakꞌuliꞌ rukꞌ jun chik. Ri chuꞌanaꞌ e kanaja na kan utukel o tzeleja tanchi rukꞌ ri rachijil y kꞌola chi utzil chomal. Yey jelaꞌ rachi, e mujach kan ri rixoqil.
12Chike ri nikꞌaj chik kambꞌiꞌij, tobꞌ waꞌ xa in kimbꞌiꞌn re, na e ta utaqanik ri Qanimajawal: We juna hermano kꞌo rixoqil na ukojom ta rubꞌiꞌ ri Cristo, yey waꞌ wiꞌxoq karaj kakꞌojiꞌ rukꞌ, na utz ta kꞌu riꞌ we ri hermano kujach kanoq.
13Yey jelaꞌ rukꞌ ri hermana kꞌo rachijil na ukojom ta rubꞌiꞌ ri Cristo, we waꞌ waꞌchi karaj kakꞌojiꞌ rukꞌ, na utz ta kꞌu riꞌ we ri hermana kujach kanoq.
14Ma we e laꞌ juna ixoq ukojom rubꞌiꞌ ri Cristo yey ekꞌu ri rachijil kꞌamajaꞌ kukojo, ruqꞌabꞌ ri Dios kakꞌojiꞌ puwi waꞌchi ruma ri rixoqil. Ma we na e ta uꞌanom riꞌ, ruqꞌabꞌ ri Dios na kakꞌojiꞌ ta pakiwi ri ralkꞌoꞌal. Pero na e ta uꞌanom, ma ruqꞌabꞌ ri Dios kꞌo pakiwiꞌ.
15Yey we e laꞌ juna achi o juna ixoq na ukojom ta rubꞌiꞌ ri Cristo y karaj kujach kan ri rachbꞌiꞌil ukojom rubꞌiꞌ ri Cristo, kijacha na kꞌu kibꞌ. Ma che ri ukojom rubꞌiꞌ ri Cristo, na mak taj we na e ta rire xtzukun ri jachanik. Ma ri Dios ojusikꞌim re kojkꞌojiꞌ chi utzil chomal.
16Kꞌola kꞌu utzil chomal riꞌ chixoꞌlibꞌal alaq, ma kꞌaxtaj uma rilal hermana, kakolobꞌetaj ri achijil la; o kꞌaxtaj uma rilal hermano, kakolobꞌetaj ri ixoqil la.
17E chirij taq kꞌu ri kiꞌanom echiriꞌ xesikꞌix ruma ri Qanimajawal, chikijujunal utz chekanajoq jelaꞌ pachaꞌ ri ebꞌuyaꞌom wi ri Dios. Y waꞌ wa nubꞌiꞌim che ralaq, e taqanik kanꞌan chike konoje ri kakimol kibꞌ pubꞌiꞌ ri Cristo.
18We kꞌo kꞌu juna achi kꞌo chi ri retalil re circuncisión che echiriꞌ xsikꞌix ruma ri Qanimajawal, utz jelaꞌ kakanaj kanoq. O we kꞌo juna achi na jinta ri retalil re circuncisión che echiriꞌ xsikꞌix ruma ri Qanimajawal, na chirajawaxik taj kakoj che.
19Ma ri chirajawaxik wi na e ta we jun ukojom ri retalil re circuncisión o we na ukojom taj, ma ri lik chirajawaxik wi che jun e kuꞌan ronoje rutaqanik ri Dios.
20Ekꞌu chirij ri kꞌo wi jun echiriꞌ xsikꞌix ruma ri Dios, utz we jelaꞌ kakanaj kanoq.
21We lal kꞌo la puqꞌabꞌ ri ajaw la echiriꞌ xsikꞌix la ruma ri Dios, mubꞌisoj kꞌuꞌx la; yey we kayaꞌtaj che la kel la puqꞌabꞌ ri ajaw la, lik utz riꞌ.
22Ma e junoq kꞌo puqꞌabꞌ rajaw echiriꞌ xsikꞌix ruma ri Qanimajawal, riꞌ kesax lo puqꞌabꞌ ritzel ruma ri Qanimajawal. Yey e junoq na jinta puqꞌabꞌ rajaw echiriꞌ xsikꞌix ruma ri Dios, woꞌora puqꞌabꞌ ri Cristo kꞌo wi.
23Ekꞌu ralaq alaq re ri Dios, ma Rire uloqꞌom chi alaq rukꞌ rukamik ri Cristo. E uwariꞌche, maya ibꞌ alaq pakiqꞌabꞌ ri tikawex xa ruma e lik kataqej alaq ri kinaꞌoj.
24Hermanos, ekꞌu chirij ri kꞌo wi jun echiriꞌ xsikꞌix ruma ri Dios, lik utz we jelaꞌ kakanaj kan chwach ri Dios.
25Chike kꞌu ri na e ta kꞌulanik, na jinta taqanik uyaꞌom ri Qanimajawal chwe puwi waꞌ, pero kanya kꞌu ri nupixabꞌanik riꞌin chwi waꞌ. Y kanchꞌobꞌ kꞌut utz kakubꞌiꞌ kꞌuꞌx alaq wukꞌ puwi ri kambꞌiꞌij, ma yaꞌtal chwe riꞌin rutoꞌbꞌal ri Qanimajawal.
26Chinuwach riꞌin, ruma ri kꞌaxkꞌobꞌik oj kꞌo wi woꞌora, e utz we junoq kakanaj kanoq jelaꞌ pachaꞌ ri uꞌanom.
27Pero we kꞌo chi awixoqil, majach kanoq. Noꞌj we na jinta awixoqil, muꞌan e ubꞌis akꞌuꞌx katzukuj awixoqil.
28Pero we katkꞌuliꞌik, utz; ma na mak taj we jun kakꞌuliꞌik. Jenelaꞌ juna ali we kakꞌuliꞌik, na mak taj. Pero e ri kekꞌuliꞌik kape ukꞌayewal che ri kikꞌaslem. Ekꞌu wa yaꞌl kꞌayew na kuaj ta che alaq.
29Hermanos, ri kuaj kꞌut kambꞌiꞌij che alaq e waꞌ: E taq ri qꞌij kꞌo chiqawach na naj ta chik. E uwariꞌche e rachi kꞌo rixoqil, muꞌan ri xew lik e kꞌo unaꞌoj puwi ri rixoqil.
30Jekꞌulaꞌ janipa ri kebꞌoqꞌik, makiya kibꞌ xew che ri kibꞌis. Janipa ri kekiꞌkotik, makiya kibꞌ che ri kiꞌkotemal. Janipa ri kakiꞌan loqꞌoj, meꞌek kikꞌuꞌx rukꞌ rubꞌitaq ke.
31Yey janipa ri kakiꞌkot kikꞌuꞌx rukꞌ taq ri kꞌo che ruwachulew, meꞌek kikꞌuꞌx puwi waꞌ. Ma ronoje ri kilitaj che ruwachulew, xa kikꞌowik.
32Ri kuaj riꞌin che alaq e ri na jinta ubꞌis kꞌuꞌx alaq. Ri hermano na kꞌulan taj, ruma na jinta yaꞌl kꞌayew che, puqꞌabꞌ kꞌowi lik kuya ribꞌ che ri chak re ri Qanimajawal y kutaqej janipa ri karaj Rire.
33Noꞌj ri hermano kꞌulanik e kutaqej suꞌanik kebꞌuchajij rufamilia wara che ruwachulew y kutaqej saꞌ ri karaj ri rixoqil.
34Jekꞌulaꞌ na xa ta jun uwach ruchak, ma kuꞌan ri kajawax pa ruchak ri Dios y kuꞌan ri kajawax chike rufamilia. Y jenelaꞌ kukꞌ ri hermanas. Ma ri hermana na jinta rachijil, na jinta yaꞌl kꞌayew che lik kutaqej saꞌ ri karaj ri Qanimajawal, ma utz kꞌu riꞌ kuya ribꞌ puqꞌabꞌ ri Dios rukꞌ rucuerpo y ronoje ranimaꞌ. Noꞌj ri hermana kꞌulanik e kutaqej suꞌanik kebꞌuchajij rufamilia wara che ruwachulew y kutaqej saꞌ ri karaj ri rachijil.
35Ekꞌu waꞌ wa ximbꞌiꞌij che alaq re toꞌbꞌal e alaq, na re ta kankoj qꞌatbꞌal chiwach alaq; ma e chaꞌ kakꞌojiꞌ alaq pa saqil wi y jekꞌulaꞌ na jinta yaꞌl kꞌayew re kaya ibꞌ alaq che ruchak ri Qanimajawal.
36Laj kꞌo junoq kꞌo umiꞌal na jinta rachijil y kuchꞌobꞌ kꞌu raqan: «Laj na usukꞌ taj we na kanya ta luwar che ri numiꞌal kakꞌuliꞌik, ma kꞌo chi rujunabꞌ.» We rachi kuchꞌobꞌ kꞌu raqan taqal che rumiꞌal kakꞌuliꞌik, e chuꞌana riꞌ, ma na mak taj.
37Noꞌj we kꞌo juna achi lik kunaꞌ chukꞌuꞌx utz kakꞌojiꞌ rumiꞌal utukel, puqꞌabꞌ rire kꞌo wi we kukꞌulubꞌaꞌ rumiꞌal o na kukꞌulubꞌaꞌ taj. Utz we na kukꞌulubꞌaꞌ taj, pero xew we lik ujikibꞌam uwach ri kuꞌano y na jinta junoq xminow uwach chupa.
38E junoq kukꞌulubꞌaꞌ rumiꞌal, utz ri kuꞌano; yey ri na kukꞌulubꞌaꞌ taj, más ne utz ri kuꞌano.
39Juna ixoq kꞌulanik na jinta puqꞌabꞌ kakꞌuliꞌ rukꞌ jun chik we kꞌa kꞌas ri rachijil. Noꞌj we ri rachijil xkamik, puqꞌabꞌ kꞌo wi kakꞌuliꞌ china rukꞌ karaj wi rire, xew tane we rukꞌ junoq uyaꞌom ribꞌ puqꞌabꞌ ri Qanimajawal.
40Pero kꞌu chinuwach riꞌin e más kꞌo kiꞌkotemal che rixoq malkaꞌn we na kakꞌuliꞌ ta tanchik, yey riꞌin kanchꞌobꞌo wa kambꞌiꞌij e ruma ri Ruxlabꞌixel ri Dios kꞌo wukꞌ.
