1 ጴፅሮሳ 1

1

2

3

4

5

¹ዬሱስ ኪርስቶሳ ሃዋሬ ጊዲዳ ጴፅሮሳፔ፥ ኣሳ ቢታን ቤቴን ዲዛይታስ ጳንፆሳን፥ ጋላቲያን፥ ቃጶዶቂያን፥ ኢሲያኒኔ ቢቲኒያ ቢታን ላሌቲ ዲዛ ኢንቴስ፥

²ኣዋይ ፆሲ ካሴ ኢንቴና ኤሪዳ ማላ ዶሬቲዳይታስ፥ ዬሱስ ኪርስቶሳስ ኣዛዜታናሲኔ ኢንቴ ኢዛ ሱꬃን ኣራጬቲዲ ጌያና ማላ ፂሎ ኣያናን ዱማቲዳ ኢንቴስ ኪያቴꬂኔ ሳሮቴꬂ ዳሮ።

³ዬሱስ ኪርስቶሲ ሃይቆፔ ዴንዲዳ ጊሽ ኑስ ዴዖ ጊዲዳ ሂዶታ ኢሚዳይሲ ባ ጊታ ማሮቴꬃን ኑና ባስ ኦራꬃ ናይታ ሂስቲዳ ኑ ጎዳ ዬሱስ ኪርስቶሳ ኣዋይ ፆሲ ጋላቴቶ።

⁴ኢዚ ꬋዮንታ፥ ሞሬቶንታኔ ጬጎንታ ላታሶ ኢንቴስ ሳሎን ጊጊሲ ዎꬂዴስ።

⁵ኢንቴካ ዉርሴꬃ ጋላሳን ቡሮ ቆንጫና ኣቶቴꬃስ ኣማኖ ጌዶን ፆሳ ዎልቃን ናጌቲዴታ።

⁶ሃዒ ጉꬃ ዎዴስ ዱማ ዱማ ፓጬቲ ኢንቴና ዋይሲኮካ ኢንቴ ሄሳን ኡፋዬቲቴ።

⁷ሄሲ ሄ ፓጬዚ ኢንቴ ቦላ ጋኪዛይ ኢንቴ ኣማኖዚ ቱሙ ጊዲዳይሳ ቆንጪሳናሳ። ꬋያና ዎርቃይካ ታማን ፓጬቴስ። ዎርቃፌ ኣꬊ ቦንቾ ጊዲዳ ኢንቴ ኣማኖይካ ሄሳꬆ ፓጬታናስ ቤሴስ። ሄሲ ሄ ፓጬቲዳ ኢንቴ ኣማኖይ ዬሱስ ኪርስቶሲ ቆንጪዛ ጋላስ ጋላታስ፥ ቦንቾሲኔ ሳባስ ኢንቴና ጋꬃና።

⁸ኢንቴ ዬሱስ ኪርስቶሳ ኣይፌራ ቤዮንታ ኣጊኮካ ኢንቴ ኢዛ ዶሴታ፤ ሃዒካ ኢንቴ ኢዛ ቤዮንታ ኣጊኮካ ኢዛ ኣማኔታ፤ ጮ ቃላን ቆንጪሳና ዳንዳዮንታ ጊታ ቦንቾ ኡፋይስ ኢንቴ ኡፋዬቴታ።

⁹ኢንቴ ናጊዛ ኢንቴ ሼምፖይስ ኣቶቴꬅ ኢንቴ ኣማኖን ዴሚዴታ።

¹⁰ሄ ኣቶቴꬃዛ ጊሽ ኢንቴስ ኢሜታና ኪያቴꬃስ ካሴ ናቤቲ ሎዔꬂ ዎዝናፔ ፒልጊ ፄሊዳ።

¹¹ካሴ ኢስታን ዲዛ ኪርስቶሳ ኣያናይ ፆሳፌ ቲዬቲዳይሳ ቦላ ጋካና ዋዬዛኔ ሄ ዋዬዛፔ ጉዬ ኢዚ ዴማና ቦንቾዛ ጊሽ ካሴ ባስ ዎꬂዴስ። ኢስቲ ቃስ ሄሲ ዉሪካ ኣይዴ ዋኒ ሃናናኮኔ ዩሺ ቆፒዳ።

¹²ሄ ካሴ ናቤቲ ኢንቴስ ኦꬂዳ ኣቲን ኢስቲ ባስ ኦꬆንታይሲ ኢስታስ ቆንጬን ኤሬቲዴስ። ኢስቲ ኢንቴስ ኦꬂዳይ ቦላ ሳሎፔ ኪቴቲዳ ፂሎ ኣያና ባጋራ ሃዒ ኢንቴስ ሚሺራቾ ቃላ ዮቲዳ ኣሳቲ ኢንቴስ ዮቲዳይሳ ቆንጪሳናሳ። ሄሳ ኔ ቃላ ኪታንቻቲካ ቤያናስ ኣሞቲዳ።

¹³ሄሳ ጊሽ ኢንቴ ኢንቴ ዎዝና ሱሪሲዲ ኦሶስ ጊጌቲቴ። ዎጋራ ዴዒቴ። ዬሱስ ኪርስቶሲ ቆንጪዛ ዎዴ ኢንቴ ኢዛ ኪያቴꬃ ዴማናስ ኢንቴስ ኩሜꬃ ሂዶታይ ዴዖ።

¹⁴ኢንቴ ኣዛዜቲዛ ናይታ ጊዲዲ ኤሮንታ ዲሼ ኢንቴ ካሴ ኢዛን ዲዛ ኢታ ቆፋ ካሎፍቴ።

¹⁵ኢንቴና ፄይጊዳ ፆሳይ ዱማ ጊዲዳ ማላ ኢንቴካ ኢንቴ ዱሳን ኡባን ዱማቲቴ።

¹⁶ጋሶይካ “ታኒ ጌሽ ጊዲዳ ጊሽ ኢንቴካ ጌሽ ጊዲቴ” ጌቴቲ ጌሻ ማፃፋን ካሴ ፃፌቲዴስ።

¹⁷ኦናካ ዱማ ሻኪ ማዶንታ ኢሳ ኢሳስ ኢዛዴ ኦሶ ማላ ፒርዲዛ ፆሳ “ኢዚ ኑ ኣዋ” ጊዲ ኢንቴ ፄይጊኮ ሃይሳ ኣላሜዛን ኢንቴ ኢማꬄኔ ቤቴ ኣስ ጊዲዲ ዲዛ ዎዴ ኡባን ኢዛስ ባቢቴ።

¹⁸ኢንቴ ካሴ ኢንቴ ኣዋታፔ ላቲዳ ጮ ሜላ ሃዳ ዱሳፌ ዎዜቲዳይ ꬋዪዛ ቢራን ዎይኮ ዎርቃን ጊዶንታይሳ ኢንቴ ኤሬታ።

¹⁹ጊዶ ኣቲን ኢንቴ ዎዜቲዳይ ኢታይኔ ዎሶይ ኢዛ ቦላ ባይንዳ ጌሻ ዶርሳ ማላ ጊዲዳ ኪርስቶሳ ቦንቾ ሱꬃና።

²⁰ኢዚ ኤሬቲዳይ ሃይሲ ኣላሜዚ ሜꬌታናፔ ካሴ ጊዲሺን ሃዒ ቃስ ዉርሴꬃ ዎዴን ኢንቴስ ቆንጪዴስ።

²¹ኢንቴስ ኣማኖይኔ ኢንቴ ሂዶታይ ፆሳን ጊዳና ማላ ዬሱስ ኪርስቶሳ ባጋራ ሄ ኢዛ ሃይቆፔ ዴንꬂዲ ኢዛስ ቦንቾ ኢሚዳ ፆሳን ኢንቴ ኣማኔቴታ።

²²ኢንቴ ኣማኒዛይታ ሱሬ ዎዝናፔ ሲቃና ማላ ቱማስ ኣዛዜቴꬃን ኢንቴ ኢንቴ ኣሳቴꬅ ጌሺዴታ። ሄሳ ጊሽ ኢንቴ ኢንቴ ጊዶን ኢሶይ ኢሳራ ሎዔꬂ ሲቄቲቴ።

²³ኢንቴ ናምዓንꬆ ዬሌቲዳይ ሜርናስ ሚኒ ዲዛ ꬋዮንታ ዴዖ ፆሳ ቃላን ꬋዮንታ ዜሬꬃፌ ኣቲን ꬋዪዛ ዜሬꬃፌ ጊዴና።

²⁴ጌሻ ማፃፋይ ጊዛ ማላ “ኣሾ ማይዒዳይ ዉሪካ ማታ ማላ፤ ኢዛ ቦንቾይካ ዉሪካ ዎራ ጪሻ ማላ፤ ማታይካ ሜሌስ፤ ጪሻይካ ቆኬስ።

²⁵ጎዳ ቃላይ ጊዲኮ ሜርናስ ኤቂ ዴስ።” ኢንቴስ ሳባኬቲዳ ሚሺራቾ ቃላይካ ሄሳ።