1Me, o Peter, o apoštolos le Ježišoskero Kristoskero, pisinav tumenge, save san avrikidle le Devlestar – tumenge, save dživen sar o cudzinci a san rozčhide andro Pontus, Galacija, Kapadokija, Azija the Bitinija.
2O Del amaro Dad peske tumen angloda kidňa avri pre peskero planos a prekal peskero Duchos tumen sentňarďa, hoj te šunen le Ježiš Kristus a te aven obžužarde leskere rateha. Mi del tumen o Del pherdo lačhipen (milosť) the smirom!
3Lašaras le Devles, savo hin o Dad amare Rajeske le Ježišoske Kristoske! Bo peskere bare lačhipnaha amen diňa o nevo dživipen the o džido užaripen (naďej), sar uštaďa le Ježiš Kristus andral o meriben.
4Oda užaripen hin, hoj chudaha sar ďeďictvos o barvaľipen, so šoha (ňikda) na preačhela, na musaľola aňi na kirňola a hino garudo andro ňebos prekal tumende.
5E zor le Devleskeri tumen ľikerel prekal o pačaben, hoj te aven zachraňimen. Odi zachrana hiňi pririchtimen a sikavela pes andro posledno časos.
6Radisaľon olestar, choc akana pes tumenge kampel sikra te cerpinel andro všelijake probi (skuški),
7hoj pes te sikavel, hoj hino probaľimen avri (skušimen avri) tumaro pačaben, so mol buter sar o somnakaj, so našľol. Tumaro pačaben pes mušinel andre jag te probaľinel, hoj te chuden vaš oda o lašariben, e slava the e pačiv andre oda džives sar pes sikavela o Ježiš Kristus.
8Les šoha na dikhľan a the avke les kamen; aňi akana les na dikhen, ale pačan andre leste a san pherarde slavne radišagoha, so pes aňi na del avri te phenel le lavenca.
9Bo dochuden oda, pal soste džanas andro pačaben: E zachrana prekal tumare duši.
10O proroka, so prorokinenas pal le Devleskero lačhipen (milosť) prekal tumende, igen rodenas a dophučenas pes pal kadi zachrana.
11A dophučenas pes pal oda, kana oda časos ela, the sar oda avela, a o Duchos le Kristoskero, savo sas andre lende, anglal phenelas avri pal o cerpišagi le Kristoskere the pal e slava, so avela paľis.
12Lenge sas sikado, hoj na služinde peske, ale tumenge oleha, so tumenge hin akana vakerdo prekal ola, save tumenge vakerenas o evaňjelium andre zor le Sentne Duchoskeri, savo sas bičhado andral o ňebos. The o aňjela pre oda igen kamen te dikhel, hoj te achaľon.
13Vašoda gondoľinen pal oda, so keren. Aven strižbe a muken tumen igen pre le Devleskero lačhipen (milosť), so tumenge ela dino, sar pes sikavela o Ježiš Kristus.
14Aven sar ola čhave, save šunen le Dades a ma den tumen te ľidžal ole žadoscenge, so tumen sas varekana, sar mek na džanenas o čačipen.
15Ale aven sentna andre savoreste, so keren, sar hino sentno Oda, ko tumen vičinďa.
16Bo hin pisimen: “Aven sentna, bo me som sentno!”
17A te vičinen “Dado” le Devles – savo na dikhel pro manuš, ale sudzinel pal oda, ko so kerel – ta dživen daraha anglo Del, medik san pre kadi phuv.
18Oda purano dživipen, so sikľilan tumare dadendar, sas bi e chasna. No, džanen, hoj sanas cinde avri andral oda dživipen a na sas vaš tumenge počimen le somnakaha aňi le rupoha – so našľona –
19ale le dragane (vzacne) Kristoskere rateha. Ov, sar o bakroro bi e chiba the bi o binos,
20sas pre oda imar anglal avrikidlo mek angle oda, sar o Del kerďa o svetos, ale sas sikado andro posledna dživesa prekal tumende.
21Prekal leste pačan andro Del, savo les uštaďa andral o meriben a diňa les e slava, hoj tumaro pačaben the užaripen te el andro Del.
22No, te imar žužarďan tumare jile oleha, hoj kerenas oda, so phenel o čačipen a hoj kamenas le phralen čače kamibnaha, avke the akana kamen jekh avres žuže jileha.
23Se uľiľan (narodzinďan pes) mek jekhvar – na andral o semenos, so kirňol – ale andral o semenos, so na kirňol: Andral o džido the večno lav le Devleskero.
24Bo hin pisimen: “Savore manuša hine sar e čar a caľi lengeri slava hiňi sar e čarakeri kvitka. E čar šučiľa avri a lakeri kvitka peľa tele,
25ale o lav le Rajeskero ačhel pro furt.” Oda lav hin o evaňjelium, so pes tumenge vakerďa.
