1 ጴፅሮሳ 3

1

2

3

4

5

¹ሄሳꬆካ ማቼቶ! ኢንቴ ኢንቴ ኣዚናታስ ኣዛዜቲቴ። ሄሳꬆ ኢሲ ኢሲ ኣዚናቲ ፆሳ ቃላ ኣማኖንታይታ ጊዲኮካ ጮ ሜላ ባ ማቼታ ሎዔቴꬃን ፃላላ ሲሞንታ ኣጌቴና።

²ኢስቲ ሲማና ዳንዳዪዛይ ኢንቴ ጌሻቴꬃኔ ኢንቴ ኣሴ ቦንቺዛ ዱስ ዲዛይሳ ቤዪዲኮ።

³ኢንቴ ሎዔቴꬂ ጮ ሜላ ሁዔ ዳꬃኒኔ ዎርቃን ጌፄቴꬃን፥ ኣልዖ ማዮ ማይዖን፥ ጮ ሜላ ኣይፌን ቤቲዛ ጌፄን ጊዶፖ።

⁴ኢንቴ ሎዖይ ፆሳ ሲንꬃን ዋጋራ ዲዛ ኬሂ ቦንቼቲዳዚኔ ꬋዮንታ ጌፄን፥ ኣሽኬቴꬃን፥ ኣዳቴꬃኒኔ ኣያናን ጌፄቲዳ ዎዝና ጋርሳን ቆቴቲ ዲዛ ጊዶ ዎዝና ሎዔቴꬅ ጊዶ።

⁵ቤኒ ዎዴ ባ ሂዶታ ፆሳን ኦꬂዳ ጌሻ ማጫሳቲ ጌፄቲዳይ ሃይሳ ማላና። ኢስቲ ባ ኣዚናታስ ኣዛዜቲዳ።

⁶ኢስቲ ኣዛዜቲዳይካ ሳራይ ኣብራሃሜ “ታ ጎዶ!” ጋዳ ኣዛዜቲዳይሳ ማላ። ኢንቴካ ሎዖ ሚሽ ኦꬂኮኔ ኢሲ ኢታ ሚሺ ኢንቴና ዳጋንꬆንታ ኣጊኮ ኢንቴ ሳራ ናይታ።

⁷ኣዚናቶ! ኢንቴ ኢንቴ ማቼታራ ኣኬካን ኢሲፌ ዴዒቴ። ኢስቲ ኢንቴፌ ዳቡራንቻ ሜꬌቴꬅ ጊዲዳ ጊሺኔ ቃሴካ ፆሲ ጮ ሜላ ኪያቴꬃን ኢሚዛ ዴዖ ኢስቲ ኢንቴናራ ኢሲፌ ላታናይሳ ጊሽ ኢንቴ ኢስታ ቦንቺቴ። ኢንቴ ሄይሳꬆ ኦꬂኮ ኢንቴ ዎሳ ꬉጲዛ ሚሺ ዴና።

⁸ሄሳፌ ኣሳ ባጋራ ቃስ ኢንቴ ኢሶይ ኢሳራ ሲቆን ዲቴ። ሃራ ኣሳ ቦላ ጋኪዛ ሜቶ ኢንቴ ሜቶ ማላ ፄሊቴ። ኢንቴ ኢንቴ ጋርሳን ኢሻንታ ማላ ሲቄቲቴ። ኣሺኬታኔ ኪያታ ጊዲቴ።

⁹ኣንጂቴ ኣቲን ኢስታስ ኢታ ጫሻስ ጫሽ ዛሮፒቴ። ኢንቴ ፄይጌቲዳይ ሄሳꬆ ኦꬂዲ ኣንጆ ላታናሳ።

¹⁰ጌሻ ማፃፋይ ጊዛ ማላ “ዴዖን ዳና ኮዪዛይኔ ሎዖ ጋላሳታ ቤያናስ ኮዪዛ ኣሲ ባ ዱናፔ ኢታ ሃሳዮንታ ማላኔ ባ ሜቴርሻቲካ ጌኔ ሃሳዮንታ ማላ ናጌቶ።

¹¹ኢታ ዮዖፔ ሃኮ፥ ሎዖ ኦꬆ፤ ሳሮቴꬅ ኮዮኔ ካሎ።

¹²ጎዳ ኣይፌቲ ፂሎታ ባጋ ፄሌቴስ። ኢዛ ሃይꬄቲካ ኢስታ ዎሳ ሲያናስ ዶያ ዴቴስ። ሂንኮ ኢታ ኦꬂዛይታ ቃስ ጎዳይ ባ ሃንቆ ኣይፌሶ ቤሳና” ጊዴስ።

¹³ኢንቴ ሎዖ ኦꬃናስ ሚኔቲኮ ኢንቴ ቦላ ኢታ ሚሽ ጋꬃናይ ኦኔ?

¹⁴ኢንቴ ሎዖ ኦꬂዳ ጊሽ ዋዬ ቤዒኮካ ኢንቴ ኣንጆ ኤካና። ኣሳይ ኢንቴ ቦላ ኢታ ኦꬃናስ ማንዴቲዛይሳስ ባቦፊቴኔ ዳሮ ቆፖፍቴ።

¹⁵ጎዳ ኪርስቶሳ ኢንቴ ዎዝናን ቦንቺቴኔ ኢዛ ኢንቴ ዴዖስ ጎዳ ሂስቲቴ። ኢንቴስ ዲዛ ሂዶታ ጊሽ ኢንቴና ኦይቺዛይታስ ኡባስ ዛሮ ኢማናስ ኡባ ዎዴ ጊጌቲ ኡቲቴ።

¹⁶ኢንቴ ኢስታስ ኢማና ዛሮይ ቃስ ኣሽኬቴꬃኒኔ ቦንቾን ጊዶ። ኢንቴ ኪርስቶሳይታ ጊዲዳ ጊሽ ኢንቴስ ዲዛ ሎዖ ኣማሌዛ ጊሽ ኢታ ሃሳዪዛ ኣሳይ ባ ኢታ ሃሳያን ዬላታና ማላ ኢንቴስ ሎዖ ቆፋይ ዴዖ።

¹⁷ፆሳ ሼኔ ጊዲኮ ኢንቴ ኢታ ኦሶ ኦꬂዲ ዋዬታናይሳፌ ሎዖ ኦሶ ኦꬂዲ ዋዬቲኮ ሎዖ።

¹⁸ኪርስቶሲካ ኑና ፆሳኮ ሺሻናስ ኢዚ ባ ሁዔስ ፂሎኮ ሺን ሃንኮ ፂሎ ጊዶንታ ኑ ናጋራ ጊሽ ናምዓንꬄቶንታ ማላ ኢሲቶ ዋዬቲዲ ሃይቂዴስ። ኢዚ ኣሾን ሃይቂዴስ ሺን ኣያናን ቃስ ፓፂዴስ።

¹⁹ሄሳ ሄ ኣያናን ቃሾ ኬꬃን ዲዛ ሼምፖታኮ ቢዲ ኢስታስ ሚሺራቾ ቃላ ዮቲዴስ።

²⁰ሄይቲ ሄን ዎይኔ ኬꬃን ዲዛ ሼምፖቲ ካሴ ኖሄ ዎዴ ማርካቤዚ ኦꬄቲ ጊጊሺን ኢስቲ ሲማና ማላ ፆሲ ዳንዳያን ናጊሺን ኑኒ ኔስ ኣዛዜቶኮ ጊዳይታ። ሄ ማርካቤዛን ጌሊን ሃꬄፌ ኣቲዳይታ ቆዳይ ኦሱፑን ጊዲዳ ጉꬃ ኣሳታ ፃላላ።

²¹ሄሲ ሄ ሃꬃይ ሃዒ ቃስ ኢንቴ ኢዛን ኣቲዛ ፂንቃቴ ሌሚሶ። ሃይሲ ፂንቃቴይ ቂታ ቦላ ጌያናስ ሜጬቴꬂ ጊዶንታ ጌሻ ቆፋ ኤካናስ ፆሳኮ ሺሺዛ ዎሳ። ኢዚ ኢንቴና ኣሻናይካ ዬሱስ ኪርስቶሳ ዴንꬃ ባጋራ።

²²ኢዚ ፑዴ ሳሎ ቢዲ ሃዒ ፆሳ ኣቻን ዴስ። ኪታንቻቲኔ ጎዳቴꬂ ኢስታስ ዲዛይቲ ዎልቃማታካ ኢዛስ ሃሬቲዳ።