1 ጴፂሮሳ 1

1

2

3

4

5

¹ታኒ፥ ዬሱስ ኪሪስቶሳ ሃዋሬይ ጴፂሮሲ፤ ጳንፆሳን፥ ጋላቲያን፥ ቃጳዶቂያን፥ ኢሲያኒኔ ቢቲኒያን ቤታንቾዳ ላሌቲዲ ዴዒያ ፆሳይ ዶሪዳ፥ ኣሳስ ሃ ዳብዳቢያ ፃፋስ።

²ዬሱስ ኪሪስቶሳስ ሂንቴ ኪቴታና ሜላኔ ኢያ ሱꬃን ጌያና ሜላ፥ ፆሳ ኣዋይ ባ ካሴ ኤራን ዶሪዳይሳታሲኔ ጌሻ ኣያናን ጌዪዳ፥ ሂንቴው ኣꬎ ኬሃቴꬃይኔ ሳሮቴꬃይ ጊዶ።

³ዬሱስ ኪሪስቶሳ ሃይቆፔ ዴንꬂዲ ባ ጊታ ማሮቴꬃን ናምዓንꬆ ዬሌቴꬃኔ ꬋዮና ኡፋይሳ ኢሚዳ ኑ ጎዳ ዬሱስ ኪሪስቶሳ ኣዋይ፥ ፆሳይ ጋላቴቶ።

⁴ቃሲ ፆሳይ ሂንቴው ꬋዮና፥ ኢቶናኔ ቡቆና ላታ ሳሎን ጊጊሲስ።

⁵ሄ ላታይ ዎዴ ዉርሴꬃን ቆንጫናው ዴዒያ ኣቶቴꬃስ ፆሳ ዎልቃን ኣማኖን ሂንቴው ናጌቲዲ ዴዔስ።

⁶ሃዒ ጉꬃ ዎዴስ ሂንቴ ዱማ ዱማ ፓጬን ኡንዔቲኮካ ሄሳን ኡፋይቲቴ።

⁷ሄ ፓጬይ ሂንቴና ጋኪዳይ፥ ታማን ዬጊን ꬋያ ዎርቃፌ ሂንቴ ኣማኖይ ኣꬎኔ ቱማ ጊዴይሳ ቤሳናሳ። ሄ ፓጬቲዳ ኣማኑዋን ዬሱስ ኪሪስቶሲ ቆንጪያ ዎዴ ጋላታ፥ ቦንቾኔ ሳባ ሂንቴ ኤካና።

⁸ሂንቴ ዬሱሳ ቤዒቤኬታ፥ ሺን ኢያ ሲቄታ። ሂንቴ ሃዒ ኢያ ቤዒቦናባ ጊዲኮካ፥ ኢያ ኣማኔታ። ቃሲ ኦዳን ቆንጪሳናው ዳንዳዔቶና ኡፋይሳኒኔ ቦንቾን ኩሚዴታ።

⁹ሂንቴ ኣማኖን ናጊያ ሂንቴ ሼምፑዋ ኣቶቴꬃ ኤካና።

¹⁰ኣꬎ ኬሃቴꬃ ባጋራ ሂንቴው ጊጊዳ ሃ ኣቶቴꬃባ ናቤቲ ኤራናው ጊታ ኮሻኒኔ ናጎን ኮዪዶሶና።

¹¹ኤንታን ዴዒያ ኪሪስቶሳ ኣያናይ ኢያ ዋያባኔ ሄሳፌ ጉዬ ያና ቦንቹዋባ ካሴቲዲ ማርካቲሼ፥ ኣዉዴ ዎይኮ ዋኒዲ ሃናኔኮ ኣኬካን ፒልጊዶሶና።

¹²ናቤቲ ኦዲዳ ቲንቢቴይ ባንታው ጊዶናሺን ሂንቴው ጊዴይሳ ፆሳይ ሂንቴው ቆንጪሲስ። ሃዒ ኣሳይ ሂንቴው ኦዲዳ ዎንጌላ ሳሎፔ ኪቴቲዳ ጌሻ ኣያና ዎልቃን ሂንቴው ኦዲዶሶና። ኪታንቾቲካ ሄሳ ቤዓናው ኣሞቲዶሶና።

¹³ሄሳ ጊሾ፥ ኦሶስ ሂንቴና ጊጊሲቴ፤ ሂንቴና ሃሪቴ። ዬሱስ ኪሪስቶሲ ቆንጪያ ዎዴ ሂንቴ ኤካና ኣꬎ ኬሃቴꬃ ኡፋይሳን ናጊቴ።

¹⁴ፆሳ ናይታዳ ኢያው ኪቴቲቴ፤ ሂንቴ ካሴ ኤሮና ኦꬂዳ ኢታ ኣሙዋ ካሎፊቴ።

¹⁵ሺን ሂንቴና ፄጊዳ ፆሳይ ጌሺ ጊዲዳይሳዳ ሂንቴካ ሂንቴ ዱሳ ኡባን ጌሺ ጊዲቴ።

¹⁶ጌሻ ማፃፋን፥ «ታኒ ጌሺ ጊዲዳ ጊሾ ሂንቴካ ጌሺ ጊዲቴ» ጌቴቲ ፃፌቲስ።

¹⁷ኣሳ ሶምዖ ቤዖና ኢያ ኦሱዋዳ ፒርዲያ ፆሳ፥ «ኑ ኣዋው» ጊዲ ፄጊያባ ጊዲኮ፥ ሃ ሳዓ ኢማꬃቴꬃ ዱሳ ያሻን ዴዒቴ።

¹⁸ሂንቴ፥ ሂንቴ ኣዋታፔ ላቲዳ ፓꬆና ዴዑዋፔ ዎዜቲዳይሲ፥ ꬋያ ቢራን ዎይኮ ዎርቃን ጊዶናይሳ ኤሬታ።

¹⁹ቦሬይ ዎይኮ ቦርሶይ ባይና ዶርሳ ሱꬃዳ ኣልዖ ጊዲዳ ኪሪስቶሳ ሱꬃን ዎዜቲዴታ።

²⁰ፆሳይ ኣላሜይ ሜꬌታናፔ ካሴ ኪሪስቶሳ ዶሪስ፥ ሺን ሃ ዉርሴꬃ ዎዲያን ኪሪስቶሲ ሂንቴ ጊሾ ቆንጪስ።

²¹ሂንቴ ኣማኖይኔ ሂንቴ ኡፋይሳይ ፆሳን ጊዳና ሜላ ኢያ ሃይቆፔ ዴንꬂዲ፥ ቦንቺዳ ኪሪስቶሳ ባጋራ ፆሳን ኣማኔታ።

²²ሂንቴ ቱማቴꬃስ ኪቴቲዲ ሂንቴናቴꬃ ጌሺዴታ። ሂንቴ ኢሶይ ኢሱዋ ዎዛናፔ ሲቄታ፥ ሺን ሃዒካ ቱማ ዎዛናፔ ሚንꬂዲ ሲቂቴ።

²³ሂንቴ ናምዓንꬆ ዬሌቲዳይ ꬋያ ዜሬꬃፌ ጊዶናሺን ሜሪናው ዴዒያ ፆሳ ቃላን ꬋዮና ዜሬꬃፌ ዬሌቲዴታ።

²⁴ፆሳ ቃላይ፥ «ኣሲ ኡባይ ማታ ሜላ፤ ኢያ ቦንቾ ኡባይ ጪሻ ሜላ። ማታይ ሜሌስ፥ ጪሻይካ ቆሌቴስ።

²⁵ሺን ጎዳ ቃላይ ሜሪናው ዴዔስ» ያጌስ። ሂንቴው ኦዴቲዳ ዎንጌላ ቃላይ ሃይሳ።