1Neda' Pablo chzoja' le'e chdop chžagle chonxenḻe Criston' yež ca' zjachi' distritw c̱he Galacia. Neda' len yogo' beṉe' ḻježcho ca' nite' nga chguapto' le'e tiox. Gague beṉac̱h gwlej neda' cont gona' xšine', san Jesucriston' txen len X̱e' Diosen' ben' bosban ḻe' ladjo beṉe' guat ca', ḻegaque' gosebeje' neda' cont naca' postlw c̱hegaque'.
3Na' chṉaba' lao X̱acho Diosen' len X̱ancho Jesucriston' yesaclene' le'e na' yesone' cont soa cuezle binḻo len xbab da' yo'o ḻo' yic̱hjlažda'ole.
4Jesucristnan' bnežjw cuine' ṉec̱he xtoḻa'chon' cont bich goncho txen len da' malen' chac ḻo yežlio nga. Bene' ca' ḻe can' gwyazlaže' X̱acho Diosen'
5ben' cheyaḻa' gonxencho toḻi tocaṉe. Na' ca'šcacze goncho.
6Diosen' gwleje' le'e cont Xi'iṉe' Criston' gaclene' le'e. Na' chebanda' can' chonḻen' bedao'nez ba chbejyic̱hjle Diosen' na' chzenagle c̱he yeto da' chaquele naquen diža' güen.
7Perw bi naquen diža' güen. Con nita' beṉe' chososed chosolo'ede' xtiža' Diosen' clele na' chesone' cont chacžejlaže'le c̱he diža' güen c̱he Criston' dan' bsed blo'eto' le'e.
8Šaca' neto' c̱hix̱jue'eto' yeto da' bi naquen diža' güen c̱he Criston', chṉabda' Diosen' gone' cont cuiayi'to'. Na' ḻa'czḻa' to angl beṉe' za' gan' zoa Diosen' c̱hix̱jue'ede' yeto da' bi naquen diža' güen c̱he Criston', ḻecze chṉaba' gon Diosen' cont cuiaye'e.
9Can' ba gwnian', ḻecze can' žia' da' yoble ṉa'a: še note'teze beṉe' ba chyix̱jue'ede' xtiža' Criston' nža'le can' ba nsedlen, chṉaba' gon Diosen' cont cuiaye'e toḻi tocaṉe.
10Chnia' ca' cont ṉa Diosen' chona' güen, gague cont yesena beṉac̱hen' chona' güen, na' gague cont yebe beṉac̱hen' neda'. Šaca' chi' yic̱hja' nacle gona' cont yebe beṉac̱hen' can' chonan', bi chzenaga' c̱he Criston' šaca'.
11Beṉe' migw, che'nda' ṉezele diža' güen c̱he Criston' dan' ba be'lena' le'e bitw naquen xbab c̱he beṉac̱h.
12Gague beṉac̱hen' bzenden' neda', na' ṉeca ṉacho beṉac̱hen' bene' cont gwyejni'idan', san cuin Jesucriston' bzejni'ide' neda' diža' güen c̱hen'.
13Ba beneczele diža' can' ba bena' cate' ṉe' na'ogua' costumbr c̱he neto' beṉe' Israel. Ḻeca bc̱hi bsaca' beṉe' ca' chesonxene' Criston', goclaža' yesyeṉite'.
14Na' gwche'chgua yic̱hja' c̱he costumbr dan' gosa'o da' x̱ozxta'ogua' ca' na' bsedchan' clel ca zan beṉe' ḻ gualja' beṉe' ḻecze zjanac beṉe' Israel.
15Perw cate' biṉa' galjtia', Diosen' bžie' bia' gona' xšinen'. Gwleje' neda' cont gonan', ḻe nži'ide' neda'. Na' cate' bžin ža ben Diosen' can' gwc̱hoglagüen' gone',
16nach bene' cont bembi'a Xi'iṉe' Jesús. Na' bzejni'ide' neda' cont chyix̱jue'eda' xtiža' Jesúsen' len beṉe' ca' bi zjanac beṉe' Israel. Na' cate' ben Diosen' ca' len neda' notno gwṉabda' gwzejni'ide' neda'.
17Na' ṉeca gwya'a Jerusalénṉa' cont postlw ca' yososed yosolo'ede' neda', beṉe' ca' gwlej Diosen' cont chesone' xšine' cate' neda' za' gonan'. San ḻa' gwya'atia' gan' nzi' Arabia, na' gwdechle beza' Arabia bežina' Damasco.
18Na' gocch šoṉ iz gwya'a Damascon', nach beza' beya'a Jerusalénṉa' cont bembi'a Pedron' na' jasoa' len ḻe' žta'gwbiž.
19Perw bitw bšaga' yezica'chle postlw ca' san toze Jacobo beṉe' biše' X̱anchon'.
20Ṉezecze Diosen' da' nga chzoja' naquen diža' ḻi.
21Nach gwya'a yež ca' zjachi' gan' nzi' Siria na' Cilicia.
22Na' beṉe' ca' chesedop chesežag chesonxene' Criston' yež ca' zjachi' distritw Judean', ḻegaque' biṉa' yesombi'e neda' ca hora'.
23Con ba gosende' chesena beṉe' c̱hia': “Ben' bc̱hi bsaque' neto' bich chone' ca'. Ba chyix̱jue'ede' cheyaḻa' šejnilaže'cho Criston', ḻa'czḻa' cana' goclaže' gone' cont nono yesejnilaže' Criston'.”
24Na' beṉe' Judea ca' chesejnilaže' Criston' gosonxene' Diosen' cate' gosende' can' chonan'.
