Galatia 1

1

2

3

4

5

6

¹Hara masodak numa au mai, Paulus. Au haitua susurak ia soa-neu toranoo hatahori kamaherek kara fo marai saranik kara rai profensi Galatia. Toranook kara fo mana sama-sama ro au rai ia oo haitua hara masodak fee ei boe. Au fee nesenedak neu ei ae, Amak Manetualain no Yesus Karistus ndia radenu au, ta hatahori dae-bafok ndia nadenu. Yesus Karistus naa, ndia Hatahori fo Manetualain nadenun mai ena. Karistus mate, tehuu Manetualain tao nasoda falik kana numa mamaten mai. Boe ma Sira raa, ndia radenu au fo uu tui-bengga neu hatahorir laꞌe-neu Hara Lii Malole.

³Au hule-haradoi neu Manetualain, ndia ita Aman, ma Yesus Karistus, ita Lamatuan. Au oke-hule fo Sira ratudu dale susuen nara reu ei, mita fo ei bisa leo-laꞌo no mole-damek ma lino-lendek.

⁴Karistus mate fo koka heni basa ita sala-singgon nara ma nakamboꞌik ita numa manggarauk manai dae-bafok hatematak ia. Basa naar tungga Amak Manetualain hihii-nanaun.

⁵Huu naa de ita muste koa-kio takandoo neun! Tebe naa!

⁶Toranoo nggara ein! Au ta duꞌa bubuluk eir ia bali! Manetualain here nala ei ena, nahuu Ana nau fo ei malela Ndia dale susuen. Tehuu tao hata de ei masadea neuk ka fo miu mamahere nenorik laen

⁷fo ta ndoos? Fai bakahulun au fee nenorik hata fo ndoos laꞌe-neu Yesus Karistus Hara Lii Malolen ena. Tehuu hatematak ia mana kedi-irak kara mai ena fo puputa-papata Hara Lii Malole naa, losa tao rala ei panggananaa.

⁸Besa-besa, ee! Neu ko Lamatuak nandoo hatahori mana maik fo fee nenorik laꞌe-neu Hara Lii Malole ta sama no fai bakahulun fo au fee nenorik naa. Leo mae hatahori naa numa ai mai, do, Manetualain atan esa numa nusa tetuk do inggu temak mai oo, nendook daka nalan boe.

⁹Ai mafada memak dedeꞌak ia numa fai uluk mai ena. Tehuu hatematak ia au nau fee nesenedak seluk bali, talo ia: mete ma hambu hatahori mai fo fee nenorik laen numa Hara Lii Malole fo fai bakahulun ei simbo malak naa mai ena, naa fo Manetualain oo nandoon boe.

¹⁰Au ambarani kokolak talo naa, nahuu au nau tao amahoko Manetualain dalen, ta hatahori dae-bafok dalen. Ei duꞌa mae au sorodododo nai hatahori dae-bafok matan, do? Taa! Mete ma au tao talo naa, na, au ta andaa dadi uu Karistus neondan.

¹¹Toranoo nggara ein! Au afada no ledo-ledo ae, Hara Lii Malole fo au anorik neu ei naa, hatahori dae-bafok ta ndia aꞌadun.

¹²Au ta simbon numa hatahori dae-bafok mai, ma ta hambu hatahori dae-bafok nanori au. Yesus Karistus mesa kana ndia nafada sosoa-ndandaan neu au.

¹³Ei mamanene mala tutuik ena laꞌe-neu au leleo-lalaꞌong fai bakahulun, neu au bei tungga anggama Yahudi, hetu? Lelek naa, au tuni-ndeni ala Lamatuak hatahorin sudi selik kana, fo ae akalulutu sara.

¹⁴Faik naa oo, au daleng mbena nalan seli boe fo anori laꞌe-neu anggama Yahudi, lena heni hatahori Yahudi laen fo teun sama leo au. Ma au ia, manggaten lenak fo akalalaꞌok basa ai bei-baꞌin nara dala-hadan ma anggama hohoro-lalanen lalaꞌen.

¹⁵Leo mae talo naa oo, tehuu Manetualain naketu nala ena, fo nalelelak au ua Ndia Anan boe. Au inang bei ta bonggi au, te Ana here nala au memak ena, nahuu Ana sangga natudu dale susuen neu au. Ana oo nadenu au boe, fo uu anori hatahori ta Yahudir. Neu Ana nadenu au talo naa, au ta uu oke hatahori laen nenori-nefadan.

¹⁷Ma au oo ta uu atonggo ua lasi-lasi Karisten nara fo mana dadi reu Yesus nedenun numa Yerusalem boe. Tehuu au laꞌo memak uni dae Arab uu. Basa boe ma au fali uni kota Damsik uu bali.

¹⁸Basa teuk telu boe ma au uu atonggo ua Petrus numa Yerusalem fo au nau bubuluk hata fo ana tuin fee au. Boe ma au leo taak numa naa, losa faik salahunu lima.

¹⁹Faik naa, au oo atonggo ua Lamatuak Yesus fadi bonggin boe, nade Yakobis. Tehuu au ta atonggo ua Lamatuak nedenun laen nara. Kada sira dua sara.

²⁰Hata fo au surak ia, memak tetebes leo naak! Au ta pepeko-leleko! Te Manetualain bubuluk na!

²¹Basa boe ma au laꞌo uni profensi Siria ma profensi Kilikia uu.

²²Faik naa, Karistus hatahorin nara marai Yudea bei ta ralela au.

²³Ara kada ramanene harak rae, “Hatahori fo fai bakahulun tao doidoso ita naa, hatematak ia ana fee nenorik laꞌe-neu Karistus Hara Lii Malolen. Naa te fai bakahulun ana ndia nae soba nakalulutu ita.”

²⁴Basa sara ramanene rala naa, boe ma ara rakadedemak Manetualain, nahuu au amahere neu Yesus Karistus ena.