Gareisia 1

1

2

3

4

5

6

¹Na Foru, nae afasoro mi, nono emema na afasoro waiya ukeibia weroma na we mune ode dauyaka. Eno dauyakaro iyanu Babae Godi Dawa Yesu Keriso feariroma nono ma uyari, i Godini Yesu Kerisoini emuama na emenu afasoro mi we mune odiyaki. Naini nabairo ibaada Godi imukaisa orouini iyama ya Gareisia orofaro ibinisa orou yama Godi imukada aboro aboroma fare sosiro kuku ukeibaisa orou yabairo arie wake weaisi.

³Babae Godini Yesu Kerisoini emuama ya unu kofisike irauaiai ibeka mafisiro irauaiai ibaada kakawera uke makane ibifone weakune.

⁴Godima Danu arararo uike wei ibake Yesu Kerisoma iyanu merama ukekabake fearike yewa meramawere ukekabairoma iya ma wiro’i.

⁵Ibake Godibairo aine wai ure we ma irauaiai ukeifeisi ie idua irau.

⁶Yama Godi sabu medeibaisa ibake na imuka foria ukakune. Godima Yesue Danu me makeka mafine ukaada Dawama iya yaisina wayo komike ma wiromiro Dawaini demuiro me ibene ibene ibifene ibake we odairo yewa dooro isare aari. Nono awoenae yama Godi meisake imusu i moi orouma yewa wakeye moi imusu irau wakeya eno meo weaisaro yama baya eno imukada emenu wake naukaisa.

⁷Nono Godinu irau wakeye fu demuiro Danu irau wakeye imusu imusu me. Moi orou emenu arara Yesu Kerisonu irau wake ma merama ufisake yanu imuka ma merama ufiakane ibake eno meo wake weaisa.

⁸Nanu wake wemaro ya nauawe. Na o ureroma isare aafeku aneruma i imusu irau me wake uwama meo wefukuie Godima uwa we ma merama umukuro i merama orofaro anifuku. Naini nanu orouini iya adinaro Godinu irau wake weibisiba nono awoena aina ainama yewa imusu irau me wake, i wakema i ba wakeini wasai ukakuba ibake aina ainama eno wefeisaie Godima emua we ma merama ufiaro merama orofaro anifisane weakune.

⁹I wake nono wemaro ya nauawe. Aina ainama Godinu irau wake weaisi i wake mane we dafeisake i wasai uke makaneka wake wefeisaie Godima emua we ma merama ufiaro merama orofaro anifisane ibake weakune.

¹⁰Na arara me emenu arara ukeka. Nae Godinu arara mane umane ibake weakune. Na arara me eme moima nae irau miya weeka. Na emenu arara ukeka ukaadae na Yesu Kerisonu waiya da umau.

¹¹Nanu naiyemuku, imuke eawe, nanu weibisara irau wakeye emenu wake me. I wakeye emebairoma we mune dauero emema nabairo we ma iwoka uke da uyakaro Yesu Keriso Dawama i wake nabairo we ma boroo yakararo naueke iwoka sine.

¹³Nanu adinaro ukeka sineka ya iwoka ukaisa. Nama i Du orounu darawadu imukada ibake i Godi imukeibisa orou yaisina ma feamiane aine wai ure oyakada emuabake nama meramawere uke yareibia.

¹⁴I Du orounu darawadu imukenewaa ueba ibake nanu naiyemukunu i darawadubake imukeibisabai ma berea. Nanu akaemukunu bisararo ukenewaa ueba ibake nanu naiyemuku yaisina nama ma berea.

¹⁵Na eno meramawere ukeibisaraie Godima nabake imukari ukaada na imukeibikara. Danu irau unu koreka mumane ibake nanu amaema na dore me i furo Godima na imukada nae Danu amara we mune odikara ibake nabairo ibai eno wei.

¹⁶Godima Danu arara uike Danu Amara Yesu Keriso nabairo we ma boroo yari. Ibake nama i Godinu wake nauke dakaisa imusu oroubairo Yesunu irauaiai wake wemane ibake Danu Amara nabairo we ma boroo yakara. Dawa eno uiro moi oroubairo riba wake naumane emuabairo ane daue. Na i Derusaremu goiro i dawako ibeibisa afasoro oroubairo riba wake naumane emuabairo amuke ane daueke i Areibia orofaro ane. Iro ane ibeebe medeke owere aare Damasikasi goiro nono aare fare.

¹⁸Godima nabairo wake moi weiro naueke oya buuba me siniro idua Derusaremu goiro owere amuke ane. Nanu ararae Fida fou umake iwoka umane ibake amuke ane fareke odo fifidini (15) iro ibeibisara.

¹⁹Na iro ibaadae Godinu moi afasoro orou ere dauiyake iyanu Dai Waria Minu nabue Deimisi mane ere.

²⁰Na meo wake we mero ba wake mane weakune. Godinu ibooro enare ibaada ba wake weakune.

²¹Iro odo fifidini (15) mane ibeebe medeke iroma Siriaini Sirisia orofayairo owere ane.

²²I furo Diudia orofaro ibeibisake Yesu Kerisonu wake naukada fare sosiro ku ukeibisa orou emuae na iwoka me ibake moi orouma eno weisa, iyabake meramawere uke yareibi mima awoena Godinu wake we enarakua eno weisa. Dawa adinaroe iyanu Godi imukeka imuka ma merama ufine uike nono awoena Godinu wake we enakua weisaro Diudia orofaro Godinu wake naukeibisa orouma i wake nauisa. Nae eno ukeibisara ibake i orouma Godibairo we ma irauaiai ukeibisa.