Galesia 1

1

2

3

4

5

6

¹Iau o Pol, a aposel, a tumus a pas ri torom mot. Katutaio taginin upiso i pilok pas iau sur an aposel, ma awu sur a taro kai det tulu iau sur an pam a pinapam ri. O Iesu Karisito ut ma o God o Tamano der tulu iau, o God ra i ukatutur melet pas o Iesu gusun a minat.

²A kum tistising rop ra met kis tomo nin, det mulaot tomo nam iau sur an tumus a pas ri torom mot, a kum tene nurnur rop tiro una papor Galesia.

³A marmaris ma a malmal tan o God a Tamandat ma a Labino o Iesu Karisito in kis tomo nam mot.

⁴O Iesu i ubek ru anun a nilaun una anundat a kum sakino petutna, sur in ulaun dat gusun a kum sakino petutna ra a taro det pami una kum kilalo ri. I elar nama nemnem anun anundat a God a Tamandat.

⁵Dat in ulabo pasi ma ken rop. Amen.

⁶A kisin doko lena, ke suano i ra mot sa wan gisen pas gusun o God, i ra i kabo pas mot una marmaris anun o Karisito. Ra uniri, mot sa tupukus sur a se etowo.

⁷A etowo ra, awu sur a Wakak na Wasiso. Ara taro det ulokolokor a nuknuki mot ma det lari sur det in pukus a Wakak na Wasiso anun o Karisito.

⁸Ikut ra met ut, o tu ensel kai tagisapat una langit in warawai nam tu se etowo, ra ke elar nama Wakak na Wasiso ra met sa warawai taru nami torom mot, i wakak ra in iru tukum una warkurai anun o God.

⁹A sa inanos mugu tar mot, ma iri an watung meleti lena, ra taio in warawai torom mot nam tu etowo ra ke elar nama Wakak na Wasiso ra mot sa utur ukai pasi, i wakak ra in iru tukum una warkurai anun o God!

¹⁰Ka nemi sur a taro det in ulabo pas iau, a nemi sur o God ut in gas nam iau. Ka nem na ugasgas a taro kut. Ra an ugasgas a taro kut, awu sur iau a tultul anun o Karisito.

¹¹A kum tistising, a nemi sur mot in tasmani lena a Wakak na Wasiso ra a warawai nami, awu sur a etowo ra tan a taro taginin upiso.

¹²Ka losi tan a taro, ma katu musano kai i ususer iau nami. O Iesu Karisito ut i upuaso tari tang.

¹³Mot sa longoro tar anung a ngas na nilaun tagitiro numugu, ra a tur dekdek una lotu Juda, ma a ser ban laulau a taro na nurnur anun o God, ma a lari sur an kamar ru det.

¹⁴A tur dekdek una lotu Juda, ma anung a mananos una lotu i labo taun det rop ra anumet a kilalo i elar. A dekdek doko sur an mur wakak a kum petutna anun a taro Juda tagun numugu.

¹⁵Ikut, o God i sa pilok tar iau, ra ka di usus iau utmakai, ma una nun a marmaris, i kabo pas iau. Ma i nemi

¹⁶sur in upuaso o Iesu a Nutunu torom iau, sur an warawai nami torom a taro ra awu sur a taro Juda. Katu musano i ususer iau uni.

¹⁷Ma ka wan usapat o Jerusalem sur det ra det sa aposel mugu tang det in ususer iau, awu. A wan mut utong o Arebia, ra numur a milet melet sur a tamon Damaskus.

¹⁸Ra a tulu kilalo i sa rop, a wan maragom usapat o Jerusalem sur an tama o Pita, ma a kis tomo nami a noino ma limo na bung.

¹⁹Ka tama a ramano kum aposel kai, o Pita kut der nam o Jems a tisin a Labino.

²⁰Tama i! A liliman umatan o God lena a utna ri a tumusi torom mot i lingmulus ut, ka toro!

²¹Numur a wan utong una papor Siria, ma una papor Silisia.

²²Ikut a taro na lotu anun o Karisito tong una papor Judia ka det tasman iau.

²³Det longoro i kut a taro ra det wasiso puaso un iau lena, “A musano ra i nem na ban laulau dat, uniri i warawai mukut nama petutna na nurnur, ra numugu i nem na kamar tari.”

²⁴Ra det watung ulabo pas o God uni i papam una nung a nilaun.