ማርቆሳ 8:24-32

²⁴ቢታኒ ꬎቂዴ፥ «ታኒ ኣሳ ቤዓይ፤ ሺን ኣሳይ ሃሜቲዴ፥ ሚꬃ ማላቴ» ያጌዳ።

²⁵ሄዋፔ ጉዪያን፥ ዬሱሲ ሺሬቲዴ ቢታኒያ ኣይፊያን ባሬ ኩሺያ ዎꬄዳ። ኣ ኣይፊ ፓፄዳ፤ ቢታኒካ ሎይꬂ ፄሌዳ፤ ቃሲ ኡባባካ ጌሺዴ ቤዔዳ።

²⁶ዬሱሲ ቢታኒያ፥ «ሄራ ጌሎፓ» ያጊ ኣ ሶይ ዬዴዳ።

²⁷ዬሱሲ ባሬና ካሊያዋንቱና ቂሳሪያ ፒሊጶሳ ዴዒያ ቄሪ ሄራቱዋ ቤዳ፤ ኢ ቢሺን ኦጊያን ዬሱሲ፥ «ታና ኣሳይ ኦና ጊ?» ያጊዴ ባሬና ካሊያዋንታ ኦቼዳ።

²⁸ኣ ካሊያዋንቱ፥ «ኢቲ ኢቲ ኣሳይ ኔና፥ ‹ፃማቂያ ዮሃኒሳ› ጌ፤ ሃራንቱ፥ ‹ኤላሳ› ጊኖ፤ ቃሲ ሃራንቱ፥ ‹ናባቱዋፔ ኢቱዋ› ጊኖ» ያጌዲኖ።

²⁹ዬሱሲ ኡንቱንታ፥ «ሂንቴሺ ታና ኦና ጊቴ?» ያጊዴ ኦቼዳ። ጴፂሮሲ፥ «ኔኒ ዶሬቴዳ ኪሪስቶሳ» ያጊዴ ዛሬዳ።

³⁰ዬሱሲ፥ «ታባ ኦሲኔ ኦዶፒቴ» ያጊዴ ኡንቱንታ ኣዛዜዳ።

³¹ዬሱሲ ባሬና ካሊያዋንታ፥ «ታኒ፥ ኣሳ ናዓይ፥ ዳሪ ዋዬታናው ቤሴ፤ ጪማቱ፥ ቄሳቱዋ ካፓቱኔ ሂጊያ ታማርሲያዋንቱ ታና ኢፃናው ቤሴ፤ ኡንቱንቱ ታና ዎꬋናዉኔ ታኒ ሄዜንꬂያ ጋላሳፔ ጉዪያን፥ ሃይቁዋፔ ዴንዳናው ቤሴ» ያጊዴ ታማሪሱዋ ዶሜዳ።

³²ሄዋ ኢ ኡንቱንቶ ጌሺዴ ኦዴዳ፤ ጴፂሮሲ ኣ ኢቲ ባጋ ዛሪዴ፥ ዞሬታ ዶሜዳ።