Mark 8:24-32

²⁴Artwa aparrng ra ilelhek Jesus-warl, “Ya, artwernem atha areyel-anem, arwerl-apenyarl arrkay alherleweyel.”

²⁵Jesus-el annga artwa aparrng renh arnep-arnek arrpem. Artwa Jesus-warl ilelhek, “Atha anaynt-anem areyel.” Ra ingkerrenh-anem arek.

²⁶Jesus-el artwa renh ilek, “Kel-anem apmer-warl alpa! Tawen-angkwarr alpey-angenh, akwerrel-antey alpa! Ingwerel-rnem-anem ngenh ayerney-ayntekerr, ayenh arlkarewerl-anekerr.”

²⁷Jesus kwertengerl ikwerenh-rnem-akert apmer Caesarea Philippi-ampeny-warl alhek. Jesus-el kwertengerl ikwerenh-rnem ayernek, “Nthakenh atyeng angkerreyel akngerran?”

²⁸Rernem ikwer ilek, “Ingwer-rneman ngkweng iterreyel John baptise-emiley-angker-arrpanteyarl, ngan ipmepenh itethirremel apey-alpenty-arrpantey. Ingwer-rneman ngkweng iterreyel angkakert Elijah-arrpanteyarl, ahern nhewarl apey-alpenty-arrpanteyarl, irrwerl-they. Ingwer-rneman ngkweng iterreyel angkakert ingwer-arrpanteyarl, ipmepenh itethirremel apey-alpenty-arrpanteyarl.”

²⁹Jesus-el kwertengerl ikwerenh-rnem ayernek, “Angwenh-arrpantey arrantherr iterl-areyel ayenhan?” Peter ra ilek, “Ngan Christ-arl, Akngeyel awankarl anwernenhantherr alhelekarl, ngenh thwenetyek anwernekantherr-warl, ahern nhewarl.”

³⁰Jesus-el renh-rnem artwerilek, “Alerl, iley-angenh-antey, ayengarl inngan Christ-an, ingwer-ingerant artwa ingwer-rnem ilenherr-arey.”

³¹Jesus-el kwertengerl ikwerenh-rnem ilek, “Moses-kenh-rneman atyeng irrpelthirremel angkerreyel ayenh rernem atwetyek, atyetyart ilkwa tyaty-areny-rnem-then. Ayeng ipma ayntem ingwa atherrel. Ingwa atherr-penh, Akngey-kenh Artwa Anyent Impen ayeng ipmepenh itethirremel akwenteyenh.”

³²Jesus-el aketh-antey anayntilek, angka arraty rarl ingwa atherr-penh ipmepenh akwenteyenh. Peter arleng-antey rtney-alhek, ingwer-rnem-kety, ratherr angkerretyek. Peter arrkngert angkek Jesus ikwer-warl, “Nthakenh rernem ngenh ipmek atwey-angenh, nga intem iteth aneyenh.”