Markus 8:24-32

²⁴A nesaned na hapa ya mata na kiden, a “Maitak de ya tolay kiden nga magpapa-yat, ammi awan ta pagdaduman da ikid na kayu kiden,” kunna hapa.

²⁵A gafu ta kumanen a sini-ged na ha ya mata na kiden, a tentu ha pake nagladdang a nagmappyan ya mata na kiden, a pake madakar na ya pakaita na ta ngamin.

²⁶A pinadatang ni Hesus ta bali na, ammi dana nebar na ta “Awem la magsibsibal ta kadwan kiden babali,” kunna hapa tentu.

²⁷A tekiden nagduldulot ta ili na Sesariya Pilipo a itta ya pinohutan ni Hesus ta ituldu na kiden; “Anu kan ya pangitan na tolay kiden teyak am inya yak?” kunna tekid.

²⁸“A pahig na kadwan ta iko i mina Hwan nga nangzigut ta tolay nga napapasi ta kwa en sina. Ammi ta kadwan a pahig da ta iko ya aglavunen Eliyas nga magtoli kan ta lutakin. A ta kadwan para a pahig da ta iko ya takday na aglavun nga nasi ta palungu araw,” kunda.

²⁹“A ikamuy ay, anu hapa ya pangitan muy teyak?” kunna ha tekid. A i Simon Pedru ya alistu tumabbag; “A iko ya Mangikerutanen nga netun na Namaratu ta pinakadama mi,” kunna.

³⁰A sangaw pake nebar ni Hesus ta aweda mina bibidan yen ta kadwan kiden tolay.

³¹A ta nekabalin na en a namegafun hapa i Hesus nga mangipadangag ta pasi na tekid. “Mappya ta pakākāllakan da sangaw ya Tolayin taga Langit, te ya kalalaklakayan kiden ikid na padi kiden ikid na mangituldu kiden, a aweyan dak sangaw, kapye dak sangaw papapasi, ammi matolayak hala sangaw am nagpasan ya talluhaw,” kunna, te awena nelemad awa pake nebar na tekid.

³²Ammi ginamid ni Pedru ta sang adayu, a “Awem mina ibar ta mapapasi ka, Afu, te Namaratu ya makkamu teko,” kunna.