Sɑkɑri 6

1

2

3

4

5

6

7

8

9

10

11

12

13

14

¹Sɑkɑri u mɑɑ nɔni seeyɑ mɑ u tɑbu kɛkɛ nnɛ wɑ yi dumi gɑwe yi yɑriɔ guunu yirun bɑɑn di. Guu ni, nu sɑ̃ɑwɑ sii gɑnduginu.

²Tɑbu kɛkɛ gbiikɑɑ, dum swɛ̃ɛyɑ yi gɑwe. Yiruse, kɔnkɔrɔbɑ.

³Itɑse, kɑɑbɑ. Nnɛse, dumi yi yi bɑu swɑ̃ɑsu mɔ.

⁴Mɑ u gɔrɑdo wi u kɑ nùn gɑri mɔ̀ bikiɑ u nɛɛ, berɑ̀ mi nɛn Yinni.

⁵U nùn wisɑ u nɛɛ, wɔllun goonu nnɛn wosɑ si su rɑɑ wɑ̃ɑ Gusunɔ, tem kpuron Yinnin bɔkuɔ. Siyɑ su tɛ̃ doonɔ.

⁶Dum kɔnkɔrɔ be bɑ tɑbu kɛkɛ yen tiɑ gɑwe mi, bɑ dɔɔwɑ sɔ̃ɔ yɛ̃sɑn nɔm geu giɑ. Mɑ dum kɑɑ be, bɑ swĩi. Adɑmɑ dum bɑu swɑ̃ɑsugii yi, yi dɔɔwɑ sɔ̃ɔ yɛ̃sɑn nɔm dwɑru giɑ.

⁷Dum swɛ̃ɛ yi, yi yɑrɑ mɑ yi kɑnɑ yi dɑ yi tem bukiɑnɑ. Mɑ gɔrɑdo wi, u yi sɔ̃ɔwɑ u nɛɛ, yi doo yi tem mɛ bukiɑnɑ. Mɑ yi tem mɛ bukiɑnɑ.

⁸Gɔrɑdo wi, u nùn sokɑ u nɛɛ, ɑ mɛɛrio ɑ wɑ. Dumi yi yi dɑ sɔ̃ɔ yɛ̃sɑn nɔm geu giɑ mi, yi Gusunɔn mɔru suresiɑwɑ berɑ mi.

⁹Yinni Gusunɔ u Sɑkɑri sɔ̃ɔwɑ u nɛɛ,

¹⁰ɑ yoo beni, Hɛlidɑi kɑ Tobiyɑ kɑ Yedɑyɑn kɛ̃nu mɔɔ kpɑ ɑ dɑ Yosiɑsi, Sofonin biin yɛnuɔ mi yoo be, bɑ wɑ̃ɑ sɑnɑm mɛ bɑ tunumɑ Bɑbiloniɔ.

¹¹Kpɑ ɑ sii geesu kɑ wurɑ suɑ ɑ kɑ sinɑ furɔ ko ge kɑɑ doke Yosue, yɑ̃ku kowo tɔnwero, Yosɑdɑkin biin wirɔ.

¹²Kpɑ ɑ nùn sɔ̃ ɑ nɛɛ, ɑmɛniwɑ nɛ, Gusunɔ wɔllu kɑ tem Yinni nɑ geruɑ. Nɑ nɛɛ, goo wɑ̃ɑ wi bɑ mɔ̀ kpii pɔturɑ. Sɑɑ win min diyɑ wɑ̃ɑrɑ koo yɑri kpɑ u nɛn sɑ̃ɑ yee te bɑni.

¹³U koo sinɑ yɑ̃nu sebe, kpɑ u sinɑ win sinɑ gɔnɑɔ u tɔmbu kpɑrɑ. Yɑ̃ku kowo ko n wɑ̃ɑ win bɔkuɔ kpɑ bɑ n nɔɔ tiɑ sɑ̃ɑ mɑm mɑm.

¹⁴Sinɑ furɔ ge, gɑ ko n wɑ̃ɑwɑ nɛ, Yinni Gusunɔn sɑ̃ɑ yerɔ. Geyɑ gɑ koo de bu Helɛmu kɑ Tobiyɑ kɑ Yedɑyɑ kɑ Hɛni, Sofonin bii yɑɑyɑ.

¹⁵Mɑ Sɑkɑri u nɛɛ, be bɑ wɑ̃ɑ n tomɑ, bɑ koo nɑ bu sɑ̃ɑ yee te bɑni. Sɑɑ ye sɔɔrɑ bɑ koo giɑ mɑ nɛ, Gusunɔ wɔllu kɑ tem Yinniwɑ nɑ nun gɔrimɑ. Yeni kpuro yɑ koo koorɑwɑ ì n nɛ, Gusunɔ bɛɛn Yinnin gere mɛm nɔɔwɑ mɑm mɑm.