Ʒare Biri 20:6-21

⁶Iŋuc mupie Mose â Aroŋ jahe kikefuŋ behec‐joparâ tutumaŋ qoruc bozere motâcko rarâ mâreŋko hetutuckerâ fopic. Ehame Wofuŋte huriri qâreŋzi batamaec‐jofame

⁷Wofuŋzi Mose ʒiŋuc âzâcnewec:

⁸“Go gunuge rorâ kikefuŋ sasawa hetumaŋ‐joparâ hahacge Aroŋhec ŋohe ʒâŋe fai‐jeŋicko qânâ dâŋ âzâcnepire opâ wahame kikefuŋ jaŋe â bulimakaofâc‐jeŋic opâ gumec‐jopa‐fârezepirec.”

⁹Eme Mose e Wofuŋzi mutâcnecnewec irec sâc eocte gunu‐ticne rowec.

¹⁰Eme Mose â Aroŋ jahe kikefuŋ sasawa qânâ maŋfuŋko hetumaŋ‐jopa‐fârerâ Mosezi ʒiŋuc muhuc jazawec: “Ŋic râŋgeŋ qaŋqaŋne ŋoŋe mananiŋ! Nâhe sâcne ŋoŋere opâ qânâ ʒirecnec bâfua‐ŋarenacmu me?”

¹¹Mose e iŋuc muhuc meticne bafahararâ gunu‐ticnezi qânâ qame arec jajahec ewec; iŋuc eme opâ sâro sâko jâmbâŋ wahahuc domawec, eme kikefuŋ jaŋacne â bulimakaofâc‐jeŋic mâmâc nâfârembiŋ.

¹²Eme Wofuŋzi Mose â Aroŋ ʒiŋuc jasawec: “Ŋohe wemocte Israe kikefuŋ jaŋere maio ʒâŋe‐nane bâtirihuc mi manasiŋnupirec? Irec erâ ŋohe kikefuŋ jaŋe mâreŋ biŋe qajarepo ira jowac‐joparâ sâcne mi ranicmu.”

¹³Eme opâ irec ʒâŋe Meriba mumbiŋ, ira hâcne Israe kikefuŋ jaŋe Wofuŋ mana sâqorecnehapie eki tiri juju‐ticnere fuŋne jaŋerao bataniŋkewec.

¹⁴Eme Mose e Kadesi haeo juhuc Edom ŋicwofuŋtao dâŋ ʒiŋuc râeme rawec: “Qomâfâcge Israe ŋic nâŋe ʒiŋuc muŋgopeneŋ: Ʒârâ hâriŋ maŋko juwefumbeŋ i go manaekic.

¹⁵Mamacfâc‐nâŋec jaŋe Aigita mâreŋko hurâ ira dameŋ ʒora jumbiŋ; ehame Aigita ŋic jaŋe mamacfâc‐nâŋec jaŋe mecne â nâŋe mecne boc bomac‐nâpombiŋ.

¹⁶Iŋuc epie Wofuŋ wira wâwâsic ecnepene dâŋnâŋec manarâ aŋelo‐ticne moc soreme eki Aigita mâreŋkonec jowac‐nâpo wefume gore mâreŋ qaŋeŋnao Kadesi haeo warembeŋ juŋgopeneŋ.

¹⁷Irec mana‐nârehaŋ mâreŋge fotâcnenaŋte muŋgopeneŋ. Nâŋe giegaŋ me waiŋ gie‐ŋeŋic mi fotâcnenaŋmu, erâ opâ nombâŋ forakac irecnec opâ nanaŋte wâc mi manasuŋgopeneŋ; nâŋe fâreopec me qanaopec mâcne, hata sâkooa rahuc juku mâreŋge fotâcnenaŋte muŋgopeneŋ hâcne.”

¹⁸Edom ŋicwofuŋzi ine ʒiŋuc muwec: “Ŋoŋe mâreŋ‐nane moc mi fotâcnerâ ranʒepieŋ, sifu raniŋmuo ine râsi eŋarehuc ʒikazi ŋopa jâpec eŋarenaŋmu.”

¹⁹Iŋuc mume Israe ŋic jaŋe dâŋ ʒiŋuc bâtikiecnembiŋ: “Nâŋe hata sâko sawa bâjâperâ ranaŋmu, ehuc nâŋe nâŋâcne mecne bulimakaofâc‐nâŋec mecne nâŋe opâ wiacge moc nanaŋmuo ine furine râenaŋmu, nâŋe mana‐nârehaŋ mâreŋge mâc fotâcnerâ ranaŋte muŋgopeneŋ.”

²⁰Edom ŋicwofuŋ eki ine dâŋ kecʒiŋuc bâtikie‐jarewec: “Aricne, ŋoŋe mi fotâcnenʒepieŋ.” Ŋicwofuŋ e iŋuc murâ momorifâc‐ticne bocjaha rocjopame haeonec wahambiŋ.

²¹Edom ŋic jaŋe iŋuc ehuc Israe ŋic jaŋe mâreŋ‐jeŋic fotâcnenʒipiŋte aka hejarembiŋ. Iŋuc epie Israe ŋic jaŋe behec‐joparâ hata kizurâ rambiŋ.