Ʒare Biri 19:11-20

¹¹“Ŋic moczi qâŋɋâŋ moc ba bâuac eocmu e wâwânâŋhec juhame ʒoaŋ gie bapa 7 tarazejec.

¹²E ʒoaŋ gie bapa 3 â 7 ira sâqocne tâtâmire opâ ruarâ ɋaɋackezejec, me ʒoaŋ ira opâ i mi ruaocmu ine mi ɋaɋackeocmu.

¹³Moc e ŋic hâmokicne jaŋere qâŋɋâŋ ba bâuac erâ opâ mi ruaocmu e Wofuŋte tiri boze wâwânâŋ ecneocmu, eme ŋic iŋucne e Israe kikefuŋkonec bâsirowezo. Wemocte? E sâqocne tâtâmire opâ mi ruawecte wâwânâŋhec jaha ʒuhuckerâ jukac hâcne.

¹⁴“Ŋic moczi qoruc bozeo hâmome ine sâcmutâc dâŋ kecʒiŋuc fokac irec sâc enʒepieŋ. Boze ira juniŋmu me ira fisirâ raʒiniŋmu jaŋe wâwânâŋhec erâ juhapie ʒoaŋ 7 tarazejec.

¹⁵Ehame boze ira kuʒi hapec wiac tapa tâmiric ŋeocmu i wâc iŋuc jaha wâwânâŋhec eocmu.

¹⁶Me moc e ŋic ʒikazi qâhâmokicne, me qâŋɋâŋ moc, me ŋicsiec ba bâuac ehuc ʒâŋeruŋko rac warec eocmu e iŋuc jaha wâwânâŋhec juhame ʒoaŋ 7 tarazejec.

¹⁷Wiac wâwânâŋhec iŋucnere ine sâqocne tâtâmire bâzi rikekicne irec ʒafe fiarâ râqâcko opâ ɋâricnehec bâsifuckenʒepieŋ.

¹⁸Erâ ŋic moc wâwânâŋ tâmiric e ʒariŋ moc âsunehec irec tieŋne bazurâ opâ ira âke uruckerâ qoruc boze mecne, erâ kuʒi hapec â ŋic sasawa mecne, erâ ŋicsiec bâuambiŋ, me ʒikazi qâhâmoc‐jopakicne, me mâc hâmokicne ba bâuac ejarehuc ʒâŋeruŋko rac warec embiŋ jaŋe tieme rua‐jare‐fârezejec.

¹⁹Ehuc wâwânâŋ tâmiriczi wâwânâŋhec jaŋe ʒoaŋ gie bapa 3 â 7 ira tieme rua‐jarezejec. Iŋuc hâcne ehuc ʒoaŋ 7 ira ʒure ɋaɋac‐jopazejec. Erâ ŋaqi wiac‐ticne ʒurerâ e jahacne wâc opâ ruarâ juha hae ŋafeme ɋaɋackezejec.

²⁰“Ŋic moc wâwânâŋhec juhuc ɋaɋackeocte giene mi baocmu e kikefuŋkonec bâsirowezo. E sâqocne tâtâmire opâ mi ruawecte wâwânâŋhec juhuc Wofuŋte furufic hegâpâreocmu.