Ʒare Biri 19:1-14

¹Eme Wofuŋ e Mose â Aroŋ kecʒiŋuc jasawec:

²“Wofuŋzi sâcmutâc dâŋte dâŋsanaŋ kecʒiŋuc muwec: Ŋohe Israe ŋic jazapire bulimakao biaŋne bâbâroŋzi sahac fâfâsac, erâ upenao kioŋ mi râekicne iŋucne moc noherao bafisinʒepieŋ.

³Bafisipie taha bapa Eleaʒa râcnepire eki teuŋ râpenao jowa hume ere maio qâhâmonʒepieŋ.

⁴Qâhâmopie taha bapa Eleaʒazi memotec‐ticne socko âke uruckerâ tutumaŋ qoruc boze maŋfuŋnao tieme arec 7 ezejec.

⁵Eme eki honehame bulimakao sahac biuc‐ticne â socticne erâ hoticne i ʒocko râepie ʒazejec.

⁶Ehame taha bapa e jâmâzâc jâc erâ wiac âsu biaŋ â muc bâbâroŋ rorâ bulimakao ʒakac ʒoc ira wâc beheme ʒazejec.

⁷Taha bapa e iŋuc erâ ŋaqi wiac‐ticne ʒurehuc e jahacne wâc opâ ruarâ teuŋko risierâ wâwânâŋhec juhame hae ŋafezejec.

⁸Â ŋic bulimakao ʒocko rikeocmu e wâc iŋuc jaha ŋaqi wiac‐ticne ʒurehuc e jahacne opâ ruarâ wâwânâŋhec jaha juhame hae ŋafezejec.

⁹Ehame ŋic moc wâwânâŋ tâmiric juocmuzi bulimakao ʒafe‐ticne hezurâ teuŋ râpenao hae mâreŋ biaŋnao hoŋkezejec. Eme ʒafe i Israe kikefuŋ jaŋe opâhec bâsifuckepie sâqocne tâtâmire opâ eocte irec biŋe fozejec.

¹⁰Â bulimakao ʒafe hezuocmu ŋic e iŋuc jaha ŋaqi wiac‐ticne ʒurerâ wâwânâŋhec juhame hae ŋafezejec. Dâŋ izi Israe ŋic â ŋic jabane ŋondeŋ‐jeŋicko jueŋgopieŋ jaŋere dâŋsanaŋ erâ forahuc juzejec.

¹¹“Ŋic moczi qâŋɋâŋ moc ba bâuac eocmu e wâwânâŋhec juhame ʒoaŋ gie bapa 7 tarazejec.

¹²E ʒoaŋ gie bapa 3 â 7 ira sâqocne tâtâmire opâ ruarâ ɋaɋackezejec, me ʒoaŋ ira opâ i mi ruaocmu ine mi ɋaɋackeocmu.

¹³Moc e ŋic hâmokicne jaŋere qâŋɋâŋ ba bâuac erâ opâ mi ruaocmu e Wofuŋte tiri boze wâwânâŋ ecneocmu, eme ŋic iŋucne e Israe kikefuŋkonec bâsirowezo. Wemocte? E sâqocne tâtâmire opâ mi ruawecte wâwânâŋhec jaha ʒuhuckerâ jukac hâcne.

¹⁴“Ŋic moczi qoruc bozeo hâmome ine sâcmutâc dâŋ kecʒiŋuc fokac irec sâc enʒepieŋ. Boze ira juniŋmu me ira fisirâ raʒiniŋmu jaŋe wâwânâŋhec erâ juhapie ʒoaŋ 7 tarazejec.