Ʒare Biri 10:3-12

³Me mâmâc jaha qapie dâŋehapire kikefuŋ jaŋe manarâ tutumaŋ qoruc bozere motâcko gorao fisinʒepieŋ.

⁴Me qeŋ mocjaha sawa qapie dâŋeme ine Israe ŋic gurune gurune jaŋere micnefâc jaŋe sawa gorao tumaŋnenʒepieŋ.

⁵Ŋoŋe qeŋ bâsokahuc qapie ine ŋic ʒoaŋ wewefunaopec teuŋ âterâ ŋec foc eeŋgopieŋ jaŋe fuŋkerâ hatackenʒepieŋ.

⁶Eme qeŋ bâsokahuc qapie arec jajahec eme ine juwic mâreŋkopec ŋec foc eeŋgopieŋ jaŋe hatackenʒepieŋ.

⁷Kikefuŋ hetumaŋ‐jopaniŋte qeŋ bâsokahuc mâcne, bâpitiwahuc qanʒepieŋ.

⁸Qeŋte dâŋ mukopac izi ŋoŋerao mimiŋzi ɋâric dâŋsanaŋ erâ forahuc juzejec.

⁹Râsifâc‐ŋeŋic fific bacŋopaeŋgopieŋ jaŋe jopaniŋte ʒikao rahuc qeŋ bâsokahuc qapie Wofuŋ Anutu‐ŋeŋiczi ŋoŋere manasuhuc râsifâc‐ŋeŋic jaŋere meonec batarac‐ŋopazejec.

¹⁰Ʒeri hombaŋ‐ŋeŋicko me hombaŋ muŋarekicnao, me mosa fufuŋkenao ira qowi bâzi me wama bâzi rikehuc qeŋ qanʒepieŋ wâc; qeŋ jahe ŋoŋere erâ Anutu‐ŋeŋicte maio dâŋepire Anutuzi manasuc‐ŋopazejec. Noni hâcne Wofuŋ Anutu‐ŋeŋic jukopac.”

¹¹Jara 2 irec mosa 2‐re ʒoaŋ gie bapa 20 ira karoraczi sâcmutâc dâŋte tiri bozeonec fahare fewec.

¹²Eme Israe ŋic jaŋe biri‐jeŋic sâc Sinai mâreŋ burocnaonec fahare rahapie karoraczi Paraŋ mâreŋ burocnaonec waha herâ ŋewec.