SAN JUAN 15

1

2

3

4

5

6

7

8

9

10

11

12

13

14

15

16

17

18

19

20

21

¹’Naꞌ lkaǎn ñaꞌan tiꞌ ska suun yka kwiñii, kwiꞌ nu ndyoꞌo siꞌyu chi kutun lo ran ―ndukwin Jesús ꞌin neꞌ―. Loꞌo yka ꞌin Stiǐn Ndiose lka yka kanꞌ.

²Suꞌwe ꞌa ñaꞌansiin Stiǐn ꞌin nchga stanꞌ yka kanꞌ, loꞌo naꞌ lkaǎn yka kanꞌ. Bra nu ja ska nan ndyoꞌo lo stanꞌ yka kanꞌ, nsiꞌyu Ni ꞌin ran. Nsuwii Ni chinꞌ loo yka nu nda suꞌwe nan, chaꞌ ti kaꞌan la nan tyoꞌo lo ran.

³Loꞌo ꞌwan ni ―ndukwin Jesús―, wa lka msuwiǐn ꞌwan bra nu msñi wan chaꞌ nu nchkwiǐnꞌ loꞌo wan.

⁴Kuꞌni suꞌwa tiye wan loꞌoǔn, chaꞌ suꞌwa ti nchka tiyeěn loꞌo wan. Lka chaꞌ ñaꞌan tiꞌ si naꞌ lkaǎn ska suun yka, loꞌo ꞌwan lka wan ñaꞌan tiꞌ stanꞌ yka kanꞌ ―ndukwin Jesús―. Ska stanꞌ yka kwiñii ni, ja tyoꞌo nan lo ran bra wa msiꞌyu neꞌ kiyaꞌ ran; ska ti si ti ngaluu ran, si ti nxñi kaꞌan ran ꞌin suun, tyoꞌo nan lo ran bra kanꞌ ―ndukwin―. Loꞌo ꞌwan, ja ka xuꞌwi chaꞌ suꞌwe niꞌ kasiya ꞌwan chaꞌ tayaꞌ wan ꞌin xka la nten bra nu ja suꞌwa nchka tiye wan loꞌoǔn.

⁵’Sa ñaꞌan lka suun yka kwiñii, ngwañaꞌan lkaǎn chaꞌ ꞌwan, chaꞌ naꞌ lkaǎn suun chaꞌ suꞌwe nu ndiya ꞌwan ―ndukwin Jesús ꞌin neꞌ―. Sa ñaꞌan lka stanꞌ yka kanꞌ, ngwañaꞌan lka wan xa nu msñi wan chaꞌ ꞌñaǎn, suꞌwa ti ka tiye wan loꞌoǔn bra kanꞌ. Kanꞌ kaja kaꞌan la chaꞌ suꞌwe nu xuꞌwi niꞌ kasiya ꞌwan seꞌen ndiꞌin wan lo chalyuu, bra nu naꞌ lkaǎn suun chaꞌ suꞌwe ꞌwan. Ja ska chaꞌ suꞌwe ka kuꞌni wan xa nu ja suꞌwa nka tiye wan loꞌoǔn ―ndukwin Jesús―.

⁶Kulaa yaꞌ Stiǐn ꞌin nten nu ja suꞌwa nka tiye loꞌoǔn, sa ñaꞌan nu nxkwan nten stanꞌ yka nu wa wtyi; nxoꞌ tiꞌin neꞌ stanꞌ yka wtyi kanꞌ, nxtya neꞌ ꞌin ran lo kiiꞌ chaꞌ tyii ran skin ran bra kanꞌ.

⁷’Xa nu suꞌwa ti nka tiye wan loꞌoǔn ―ndukwin Jesús―, xa nu kanun chaꞌ nu nchkwiǐnꞌ niꞌ kasiya ꞌwan, bra kanꞌ ka jñan wan ska chaꞌ ꞌin Stiǐn, loꞌo ta Ni chaꞌ kanꞌ ꞌwan.

⁸Kuꞌni tnun nten ꞌin Stiǐn Ndiose, bra nu ñaꞌan neꞌ chaꞌ suꞌwe ꞌa ngiꞌni wan loꞌo xka ta nten. Ka biyaꞌ tiꞌ neꞌ chaꞌ nten nu ngiꞌni xaꞌan chaꞌ ꞌñaǎn lka wan bra kanꞌ―ndukwin―.

⁹Sa ñaꞌan nu suꞌwe ꞌa nsuꞌwi tiye Stiǐn ñaꞌan Ni ꞌñaǎn, ngwañaꞌan suꞌwe ꞌa nsuꞌwi tiyeěn naꞌaǎn ꞌwan.

¹⁰Nchga tsan tyuꞌwi tiꞌ wan seꞌen ndiꞌin wan chaꞌ suꞌwe ꞌa nsuꞌwi tiyeěn naꞌaǎn ꞌwan. Loꞌo ka suꞌwe ꞌa ka tiyeěn ñaꞌaǎn ꞌwan si kunan wan nchga chaꞌ nu nchkwiǐnꞌ loꞌo wan ―ndukwin Jesús―. Loꞌo naꞌ, wa yꞌniǐn ngwañaꞌan, nchga tñan nu ngulo Stiǐn ꞌñaǎn wa ndukwaǎn ꞌin ran. Kanꞌ chaꞌ jlyo tiǎnꞌ chaꞌ suꞌwe ꞌa nsuꞌwi tiye Ni ñaꞌan Ni ꞌñaǎn nchga seꞌen ndiꞌiǐn.

¹¹’Ykwiǐnꞌ loꞌo wan ngwañaꞌan, chaꞌ ka biyaꞌ tiꞌ wan chaꞌ suꞌwe nka tiyeěn ngiꞌniǐn tñan ꞌin Stiǐn Ndiose; ti kwiꞌ ngwañaꞌan loꞌo wan, ja ndiꞌin chaꞌ tyii chaꞌ suꞌwe nka tiye wan.

¹²Nde lka tñan nu taǎn ꞌwan ―ndukwin Jesús―, chaꞌ suꞌwe ti xuꞌwi tiye wan ñaꞌan wan ꞌin taꞌa nten wan, sa ñaꞌan nu suꞌwe ꞌa nsuꞌwi tiyeěn naꞌaǎn ꞌwan.

¹³Si ngwañaꞌan suꞌwe nsuꞌwi tiyean ꞌin taꞌa suꞌwe nsuꞌwian, bra kanꞌ tyoꞌo laa neꞌ kanꞌ ꞌin seꞌen kuxi, ni siya kajaan, ti ykwiinꞌ tian; ja ndiya xka tñan tlyu la nu ka kuꞌnian chaꞌ tayaanꞌ ꞌin taꞌa suꞌwe nsuꞌwian.

¹⁴Ti kwiꞌ taꞌa suꞌwe nsuꞌwiǐn lka wan si tukwa wan chaꞌ nu nchkwiǐnꞌ loꞌo wan ―ndukwin Jesús―,

¹⁵ja chkwiǐnꞌ chaꞌ msu ꞌñaǎn lka wan. Ska msu ti, ja jlyo tiꞌ yu nchga tñan nu nsuꞌwi ꞌin xꞌnan yu. Wa niǐn chaꞌ taꞌa suꞌwe nsuꞌwiǐn lka wan, chaꞌ wa ngwaꞌuǔn nchga chaꞌ nu wa ynaǎn seꞌen ndiꞌin Stiǐn ꞌwan.

¹⁶Siꞌi chaꞌ ngulo suwi wan ꞌñaǎn chaꞌ tyaꞌan wan loꞌoǔn ―ndukwin Jesús―, naꞌ lkaǎn nu wa ykwiǐnꞌ loꞌo wan kulo ndukwa la. Ti bra kanꞌ nguloǔn tñan ꞌwan chaꞌ xkwiꞌ chaꞌ suꞌwe xuꞌwi niꞌ kasiya ꞌwan, chaꞌ ja tsaa tii ꞌa tñan suꞌwe nu ngiꞌni wan ngwañaꞌan; kuꞌni Stiǐn nchga chaꞌ nu jñan wan ꞌin Ni chabiyaꞌ ꞌñaǎn bra kanꞌ.

¹⁷Kanꞌ chaꞌ ska ti tñan re ndloo ꞌa ꞌwan chaꞌ kuꞌni wan chaꞌ suꞌwe ꞌa xuꞌwi tiye wan ñaꞌan wan ꞌin taꞌa nten wan.

¹⁸Ti ngwaꞌu la Jesús ꞌin neꞌ nu ngiꞌni xaꞌan chaꞌ ꞌin yu bra kanꞌ: ―Chañi chaꞌ tiya bra nu ka tiꞌí tiꞌ taꞌa nten wan ꞌwan. Ja kuwe ꞌa tiꞌ wan bra kanꞌ, wa jlyo tiꞌ wan chaꞌ ti kulo kwiꞌ ngwañaꞌan ngwa tiꞌí tiꞌ neꞌ ꞌñaǎn ―ndukwin Jesús―.

¹⁹Si kuꞌni wan ti kwiꞌ sa ñaꞌan nu ngiꞌni nten kuxi lo chalyuu nde, chkwiꞌ suꞌwe neꞌ loꞌo wan bra kanꞌ, ñaꞌan tiꞌ si lka wan taꞌa neꞌ. Loꞌo ni, ja ndiꞌin ꞌa chaꞌ ꞌwan loꞌo chaꞌ kuxi nu ndiꞌin lo chalyuu, chaꞌ wa ngulo suwiǐn ꞌwan chaꞌ ka wan nten ꞌñaǎn; kanꞌ chaꞌ ka tiꞌí tiꞌ nten ꞌwan ―ndukwin Jesús―.

²⁰Tyuꞌwi tiꞌ wan chaꞌ nu ngwaꞌuǔn ꞌwan nu ngwa xkanꞌ: Nten nu nka ndloo, kanꞌ nu ndlo tñan, siꞌi msu ti. Sa ñaꞌan ngwa tiꞌí tiꞌ nten chalyuu ꞌñaǎn, kwiꞌ ngwañaꞌan kuꞌni tiꞌí tiꞌ neꞌ ꞌwan. Ja nnan neꞌ chaꞌ nu nduꞌuǔn ꞌin neꞌ, kwiꞌ ngwañaꞌan ja kunan neꞌ chaꞌ nu chkwiꞌ wan loꞌo neꞌ kanꞌ.

²¹Kuꞌni neꞌ ngwañaꞌan loꞌo wan chaꞌ ꞌñaǎn ―ndukwin Jesús―, chaꞌ ja nsuꞌwi lyo neꞌ ti ka nu msuꞌwa ꞌñaǎn chaꞌ ndijyaǎn lo chalyuu.

²²’Ja tyukwi neꞌ kanꞌ kiꞌya si ja ya kaǎn lo chalyuu, si ja ya chkwiǐnꞌ loꞌo neꞌ; loꞌo ni, ja kuꞌni Ndiose chaꞌ tlyu tiꞌ ꞌin neꞌ kanꞌ ꞌin chaꞌ xaꞌan nu ngiꞌni neꞌ.

²³Xa nu tiꞌí tiꞌ neꞌ ꞌñaǎn, kwiꞌ ngwañaꞌan tiꞌí tiꞌ neꞌ ꞌin Stiǐn ―ndukwin Jesús―.

²⁴Ja ndukwi neꞌ kanꞌ kiꞌya ti kulo, loꞌo ni, wa mdiꞌiǐn seꞌen ndiꞌin neꞌ kanꞌ, wa yꞌniǐn tñan nu ja ka ꞌin xka la nten kuꞌni; wa naꞌan neꞌ nchga chaꞌ tnun nu ngiꞌniǐn, kanꞌ chaꞌ tiꞌí tiꞌ neꞌ ꞌñaǎn. Kwiꞌ ngwañaꞌan tiꞌí tiꞌ neꞌ ꞌin Stiǐn, kanꞌ chaꞌ wa nganun yuweꞌ chunꞌ neꞌ kanꞌ ―ndukwin Jesús―.

²⁵Ngwañaꞌan ndiꞌin chaꞌ ka chaꞌ nu ndukwa lo kityi kula ꞌin neꞌ kanꞌ: “Liyeꞌ tiꞌ neꞌ ꞌñaǎn, ni siya ja ndiꞌin chaꞌ kuꞌni neꞌ ngwañaꞌan.” Ngwañaꞌan nchkwiꞌ lo kityi ꞌin Ndiose.

²⁶’Chunꞌ ndiꞌin la suꞌwaǎn nu lka Tyiꞌi Ndiose chaꞌ kan Ni lo chalyuu, Tyiꞌi Ni ykwiꞌ, nu mdoꞌo seꞌen ndiꞌin Ndiose nde niꞌ kwan ―ndukwin Jesús―. Kanꞌ lka nu kwaꞌu ꞌwan nchga chaꞌ nu ñi, kanꞌ lka nu tayaꞌ ꞌwan nchga bra chabiyaꞌ ꞌñaǎn. Bra nu kan Ni kanꞌ lo chalyuu, bra kanꞌ kwaꞌu Ni nchga chaꞌ nu ñi ꞌwan, nchga chaꞌ nu nsuꞌwi ꞌñaǎn ―ndukwin Jesús―.

²⁷Loꞌo ꞌwan, wa mdiꞌin wan loꞌoǔn ti kulo, kanꞌ chaꞌ ka ꞌwan chkwiꞌ ñi wan chaꞌ ꞌñaǎn loꞌo ya ñaꞌan ti nten.