Yesu Tɔ̃rɛ̀ 16:10-21

¹⁰Kɛ̀ ti bɑntɛ́ kɛ dò nKuyie nkuù kɛ̀ n ti yu kɛ̀ ti bo nɑ́kɛ́ Tinɑ́ɑǹsɑ̀ɑ̀tì, kɛ̀ ti pɑ̃̀nkɛɛ ítɛ́ Todowɑɑsi,

¹¹kɛ́tɑ bɑ̀tóò kɛ́kɔtɛ Sɑmmutɑɑsi dihɛì dìì sokɛ́ mɛniɛ mmiɛkɛ. Kɛ̀ dɛ̀ɛ wentɛ́ kɛ̀ ti kɔtɛ Nɛɑpodii.

¹²Kɛ ítɛ́ dɛborɛ̀ kɛ́kɔtɛ Fidipu Mɑseduɔnni kó kutempɛ̃ nkó dihɛì kètirì kɛ̀ Odommu kɔbɛ dì bɑkɛ́, kɛ̀ tí nkɛ mbo kɛ dɔ̀ yɛwe sɑ́m̀pɔ́.

¹³Tɛom̀pùtɛ̀ yiè kɛ̀ ti yɛ̀, kɛ́tɑ kukó nkɛ bo yɑ̀ Sifubɛ bo nkɛ bɑ̀ɑ́ nKuyie. Kɛ sɔ̃́nkɛ́ bɛnitipòbɛ̀ mɑbɛ̀ dɛborɛ̀ kɛ́kɑroo kɛ́ mbɛ̀ nɑ̀ɑ́ Kuyie nnɑ́ɑǹtì,

¹⁴kɛ́yɑ̀ onitipòkù mɔù bɛ̀ tú wè Didii kòò bonní Tiyɑtiiri, kɛ fiiti tiyɑɑ̀kpetì tiwũɔ̃tì kɛ tũ nKuyie, kɛ̀ Kuyie nkpetɛ́ o yɛ̀mmɛ̀ kòò nkémmú Pɔɔri nɑ̀ɑ́ ntì.

¹⁵Kɛ̀ tí ò ɑ̃nnɛ́ bɑ̀tɛ́mmù nɛ̀ o cĩ́ɛ̃̀tɛ̀ kɔbɛ. Kòo nyetíróo kɛ tú: Kɛ̀ di yie nkɛ dò m mɛ̀nkɛ cɔutɛ́ Yesu kɔtɛnɛ̀ní kɛ́mbo n cĩ́ɛ̃̀tɛ̀.

¹⁶Diyiè mɑrì kɛ ti nkɔri mubɑ́ɑmmu kɛ́conɛ̀ osɑpɑ̀ɑ̀ mmɔù kòò tu kudɑɑkù, kɛ̀ dibɔɔ̀ ò tɑ, kòò pɑ̃ũ̀ kòo yɛmbɛ̀ pɛ̀ú idíítí.

¹⁷Kòo nti tũ nkɛ wékíí kɛ tú: Bɛnìtìbɛ̀ biɛ ntú Kuyie ndiɛkù tɔ̃mbɛ̀ mbɛ, kɛ di nɑ́ɑ́ mmɛdɛɛtímɛ̀ kó tinɑ́ɑǹtì.

¹⁸Kòo mmɛ nhɔ̃ nyɛwe yɛmɔu kɛ̀ dɛ̀ɛ ɔu Pɔɔri kòo wɛ̃ɛ̃tɛ kɛ́pɛ́i ndibɔɔ̀ kɛ dɔ̀: Nɛ̀ Yesu Kirisi kó diyètìrì yɛ̀ onitipòkù yie mmiɛkɛ! Dɛndɛ bɑ̀mbɑ̀ nkɛ̀ dìi yɛ̀.

¹⁹Onitipòkù yɛmbɛ̀ sɔ̃́ ndìì mɔ̀nnì bɛ̀ tɛ̃́nkɛ í yó mpɛ́ú idíítí, kɛ pĩ́ mPɔɔri nɛ̀ Sidɑɑsi kɛ́kɔtɛnɛ̀ bɛbeémbɛ̀ borɛ̀.

²⁰Kɛ dɔ̀: Bɛnìtìbɛ̀ biɛ ntú Sifubɛ mbɛ kɛ kɔ̀tɛnní diɛ mmɛkɔɔ̀mmɛ̀.

²¹Kɛ bɛnkú bɛ kó ikuɔ́ tínti Odommu kɔbɛ ti í dò nkɛ́ntũ nyì.