Yatɛne 13:7-23

⁷Isakari bɔnsɔnna: Yusufu a diin Yigali.

⁸Efirami bɔnsɔnna: Nunu a diin Hoseya.

⁹Bunyamin bɔnsɔnna: Rafu a diin Paliti.

¹⁰Sabulon bɔnsɔnna: Sodi a diin Gadiyɛli.

¹¹Yusufu a dii Manase bɔnsɔnna: Susi a diin Gadi.

¹²Dan bɔnsɔnna: Gemali a diina Amiyɛli.

¹³Aseri bɔnsɔnna: Mikeli a diin Seturi.

¹⁴Nafatali bɔnsɔnna: Fofisi a diin Naxabi.

¹⁵Gadi bɔnsɔnna: Make a diin Gewɛli.

¹⁶Muxune xinle nan ne ra, Musa naxanye xɛ Kanan yamanan matodeni. Musa yi Nunu a dii Hoseya xili sa “Yosuwe.”

¹⁷Musa to yi e rasigama Kanan yamanan matodeni, a yi a fala e xa, a naxa, “Ɛ mini Negewi nin, siga geya yireni.

¹⁸Ɛ xa yamanan mato. Ɛ a mato xa muxune sɛnbɛn gbo, xa a mi gbo, xa e wuya, xa e mi wuya.

¹⁹Ɛ a mato xa e yamanan fan hanma xa a mi fan, xa e taane findixi banxidɛne nan na hanma xa yinne soxi e ma.

²⁰Ɛ a mato xa bɔxɔn fan, xa a mi fan, xa wudine na, xa e mi na. Ɛ yixɔdɔxɔ, ɛ fa yamanan wudi bogine ra.” Manpa bili bogi singene waxatin nan yi a ra.

²¹Nayi, e yi siga yamanan matodeni, keli Sini tonbonni siga han Rexobo yi, Lebo-Xamata dɛxɔn.

²²E yi so Negewi yi, e siga han Xebiron yi, Anaki bɔnsɔnna muxune yi dɔxi dɛnaxan yi, Aximan, Sɛsayi, e nun Talamayi. Xebiron bata yi ti ɲɛɛ solofere benun Soyan xa ti Misiran yamanani.

²³E yi siga han Esikoli lanbanni, e manpa bili yiin sɛgɛ tɔnsɔn keden yi singanxi naxan na. E na singan tami kuyen na alogo muxu firin xa a xali e nun girenada nun xɔdɛ bogina ndee.