YƐSÃÃ 9:1-15

¹Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ dɛbémbénnɛ̀ mɛtɑmmɛ̀ dɑɑmɛ̀ kpɛrɛ.

²N Yiɛ̀ nKuyie n yó ndɑ sɑ̃ntí nɛ̀ n yɛ̀mmɛ̀ mɛmɔu ndi, kɛ́nnɑ́ɑ́ nhɑ kó tidiɛtì.

³Fɔ̃́ɔ̃̀ te kɛ̀ nh ɑunɛ̀ diwɛ̀ì, kɛ diènnɛ̀ dɛbémbénnɛ̀ kɛ dɑ sɑ̃ntí, fɔ̃́ nKuyie nhɑ bɑkɛ́mu kɛtenkɛ̀ nɛ̀ kɛĩ́nkɛ̀.

⁴N dootitɔbɛ̀ bótìrì bɛ fɔ̃nkó nyɛ, kɛ duò kɛ kɔ̃ nhɑ ììkɛ̀.

⁵Fɔ̃́ɔ̃̀ n kòḿmú kɛ kpɑ n kpɛ́í, kɛ kɑri ɑ kpɑ̀ɑ̀tìkɑ̀rì kɛ bekùnɛ̀ timɔ́mmɔnti.

⁶A puotìmu bɛ̀ɛ̀ í dɑ bɑ́ɑ́, kɛ kɔù bɛnitiyɛibɛ, kɛ ũũtì bɛ yètɛ̀ pɑíí sɑ̃́ɑ̃̀.

⁷Fɔ̃́ɔ̃̀ kùɔ ti dootitɔbɛ̀ kɛ bɛ̀ dèè, kɛ pùɔ mbɛ ɛkɛ̀ pɑ́í pɑ́í, kɛ̀ ti yɛ̃̀ mbɛ kpɛ́í.

⁸Kuyie nkpɑ̀ɑ̀tirìmu sɑ̃́ɑ̃̀, kɛ fìí nku kpɑ̀ɑ̀tìkɑ̀rì tibeéntì kpɛ́í.

⁹Kuù bɑkɛ́ kutenkù nɛ̀ timɔ́mmɔnti, kɛ bekùnɛ̀ ibotí kɛ̀ dɛ̀ sìɛ́.

¹⁰N Yiɛ̀ nKuyie nfɔ̃́ɔ̃̀ tu bɛ̀ fɛ̃́ũnko wè kó disɔ̀rì, Bɛ̀ sɔ̀rì fɔ̃́ɔ̃̀ borɛ̀ mɛyɛǹcɑɑ̀rìmɛ̀ mɔ̀nnì.

¹¹Bɛ̀ɛ̀ dɑ yɛ̃́ bɛ̀ dɑ duɔ́mmu bɛmɑ́ɑ̀, kɛ yɛ̃́ fɔ̃́ nKuyie nhɑ í yóumɛ̀ bɛ̀ɛ̀ dɑ wɑɑ̀.

¹²Ndiènnɛ̀ kɛ́dɛ́úkùnko ti Yiɛ̀ nKuyie, kuù kɑ̀ri ku kpɑ̀ɑ̀tìkɑ̀rì ĩ́nkɛ̀ Siyɔ̃ɔ̃, mpĩɛ̃kùnɛ̀ Kuyie ndɔ̀ɔ̀ mɛ̀ɛ̀ dɔɔ̀rìmɛ̀ diɛmɛ̀ ibotí miɛkɛ.

¹³Kuù bekùnɛ̀ bɛnitikɔ̀ùbɛ̀, kɛ yɛ̃́ bɛcĩ̀rìbɛ̀ kpɛ́í, kù í yɛ̃̀ mbɛ̀ɛ̀ kuɔ̀ mbɛ kpɛ́í.

¹⁴N Yiɛ̀ nKuyie, n kuɔ́ mmɛsémmɛ̀, wéntɛ́ n níim̀bɛ̀ n diinko mɛ̀ɛ̀ sémmɛ̀, fɔ̃́ɔ̃̀ n dɛɛrínɛ̀ mukṹṹ.

¹⁵Kɛ̀ nní ndiènnɛ̀ diwɛ̀ì kɛ dɑ sɑ̃ntí Siyɔ̃ɔ̃ kɔbɛ tĩ̀nnì miɛkɛ, ɑ n dɛɛtɛ́mɛ̀.