YƐSÃÃ 94:9-22

⁹Kuyie nkùù ɑ̃nnɛ́ onìtì yɛto, kù bo yĩɛ̃kɛ kù bo keèmɑ̀ɑ̀? Kunku kùù ɑ̃nnɛ́ onìtì inuɔ kù bo yĩɛ̃kɛ kù bo yɑ̀mɑ̀ɑ̀?

¹⁰Kunku kùù tiè nyɛbotɛ̀ kù bɑ́ɑ́ nɑ kɛ́ bɛ̀ potɑ́ɑ̀? Kuù í duɔ̀ mbɛnìtìbɛ̀ mɛciìnɑ̀ɑ̀?

¹¹Ti Yiɛ̀ nKuyie nyɛ̃́mu onìtì kó iyɛǹtotí, kù yɛ̃́mu ì tumɛ̀ kuyɑɑkù.

¹²Dɛ̀ nnɑɑti onìtì ti Yiɛ̀ nKuyie ntié nwè, kù ciìkùnko wè nɛ̀ ku kuɔ́.

¹³Dɛɛ̀ yó nhò kɑ̃nkɛ́ diyiè yɛiri yiè, kɛ bɑɑnɛ̀ bɛ̀ bo keúmɛ̀ oyɛiwe fɔ̃ti.

¹⁴Kɛ yɛ̃́ ti Yiɛ̀ nKuyie nhɔ̃ í ndootóomɛ̀ ku kó bɛnìtìbɛ̀, kù í yóó yóu ku te bɛ̀.

¹⁵Obeéntì sɑ̀ɑ̀wè yóó cɔutɛ́mu tibeéntì. Bɛ̀ɛ̀ yɛ̀mmɛ̀ wenni kɛ̀ bɛ̀ nhò tũ.

¹⁶We mbo n kónnɛ́ kɛ̀ tí dokɛ́nɛ̀ bɛyɛibɛ? We mbo n teennɛ̀ kɛ̀ tí kpɑnnɛ̀ mɛyɛi ndɔɔ̀rìbɛ̀?

¹⁷Kɛ̀ ti Yiɛ̀ nKuyie ndo í n teennɛ̀ nɛ̀ yíe n do bo kudɔmbìùkù nku.

¹⁸Kɛ̀ n nɑɑ̀cɛ̀tɛ̀ dɔ́ kɛ́seitɛ. Ti Yiɛ̀ nKuyie nkó mɛsɑ̀ɑ̀ mmɛɛ̀ ɔ̃ɔ̃ n cɔ́útɛ́.

¹⁹Kɛ̀ iyɛǹtotí n sũ̀ṹnnɛ̀, ɑ ɔ̃ɔ̃ m bɑ́ntɛ̀mu kɛ nɑ́ríkùnnɛ n yɛ̀mmɛ̀.

²⁰A bo wɛ̃nnɛ́nɛ̀ bɛbeémbɛ̀ bɛ̀ɛ̀ tu bɛnitikɔ̀ùbɛ̀, bɛmbɛ bɛ̀ɛ̀ fɛ̃́ũnko bɛnìtìbɛ̀ nɛ̀ ikuɔ́ kó diyètìrɑ̀ɑ̀?

²¹Bɛmbɛ bɛ̀ɛ̀ ɔ̃ɔ̃ dɑkɛ kɛ bo kuɔ onitisɑ̀ù, kɛ̀ dɔ̀ ò cɑ̀ɑ̀rɛ̀, bɑ́ ò í cɑ̀ɑ̀rɑ̀ɑ̀?

²²N Yiɛ̀ nKuyie nkuù mɛ ntú n kó tɛcɛ̃kpetɛ̀. Kuyie nkuù tu dipèrì dìì n kɑ̃nkɛ́.