YƐSÃÃ 79:1-13

¹Asɑfu kó fɛyɛ̀nfɛ̀. Áú Kuyie! Yɛbotɛ̀ yɛɛ̀ do ɑ nìtìbɛ̀ tenkɛ̀. Kɛ sɑ̃ũ nhɑ cɛ̃sɑ̀ɑ̀tɛ̀, kɛ pɔ̀ntɛ Sedisɑdɛmmu kòò nɑɑ́ tidobontì.

²Kɛ kùɔ ɑ kó bɛtɔ̃mbɛ̀ kɛ dɔúnko kɛ̀ timɑncòntì bɛ̀ cɔ̀, ɑ kɔbɛ nɑɑ́ ntikpɑsĩ̀ntì kó mudiì mmu.

³Kɛ̀ bɛ yĩ̀ĩ̀ ncòú kɛ pɔ̃ntɛ́ mɛniɛ nkɔ̃mɛ kɛ fitɛ́ Sedisɑdɛmmu, kɛ̀ bɛ̀ duɔ́ bɑ́ òmɔù í bo wèè bo bɛ̀ kũnnɛ́.

⁴Kɛ̀ ti pɛɛtitɔbɛ̀ ti sɑ̃́ɑ̃́, bɛ̀ɛ̀ ti fitɛ́ kɛ̀ bɛ̀ ti sènkɛ̀rì kɛ ti dɑú.

⁵Ti Yiɛ̀ nKuyie, dɛ̀ yó nkɑ̃́ɑ̃́kɛ́ dɛ kɑ̀ɑ miɛkɛ do? Dɛ̀ yó ndɑ yóùmu kɛ dɑ cɔ́ú nsɑ̃́ɑ̃̀ muhɑ̃ɑ̃́ nkɔ̃mɑɑ̀?

⁶Yóu kɑ̀ɑ miɛkɛɛ do ibotí tɛì ìì í dɑ yɛ̃́, nɛ̀ yɛkpɑ̀ɑ̀tìyɔ yɛ̀ɛ̀ í yu ɑ yètìrì.

⁷Kɛ yɛ̃́ bɛɛ̀ pɔ̀ntɛmɛ̀ Sɑkɔbu yɑɑ̀bí, kɛ cɑ̀kɛ Isidɑyɛɛribɛ tenkɛ̀.

⁸Bútínnɛ́ ti yɛi mmɛkótímɛ̀, nɛ̀ ɑ mɔkɛmɛ̀ mɛnitisémmɛ̀ wɛ̃ɛ̃tɛní mɛcɑ̃ɑ̃ nti bíɛ́kɛ̀, ti nɑɑ́ mbɛsénnìbɛ̀ mbɛ.

⁹Yɑ̀ɑ̀ ti dɛɛtɛ́ fɔ̃́ nKuyie nti dɛɛtíwè, ɑ yetìsɑ̀ɑ̀rì bɑ́ɑ́ cɑkɛ mɛ̀ɛ̀ kpɛ́í, ũtɛ́ ti yɛi nkɛ́ ti dɛɛtɛ́ kɛ́dɛ́úkùnnɛ ɑ yètìrì.

¹⁰Bɑ́ɑ́ yóu kɛ̀ bɛ̀ɛ̀ í tũ nfɔ̃́ nKuyie nkɛ̀ bɛ̀ɛ yĩ́: Yé Kuyie mbɛ̀ tũ nkù bo dɛ̀? Dɔɔ̀ kɛ̀ bɛ̀ɛ bɑntɛ́ ɑ pɛ̀ìtɛmɛ̀ ɑ kó bɛtɔ̃mbɛ̀ bɛ̀ kùɔ bɛ̀, kɛ̀ tí dɛ̀ yɑ̀ nɛ̀ ti nuɔ.

¹¹Keè tikpetíntì kó yɛdɑbùò, ɑ kpeńnìmu, nkɑ̃nkɛ́ bɛ̀ dɔ́nɛ̀ bɛ̀ mukṹṹ.

¹²Ti Yiɛ̀ nKuyie nti pɛɛtitɔbɛ̀ dɑ sɑ̃̀ḿmú yɛ̀ɛ̀ sɑ̃́ɑ̃m̀bɛ̀, ɑ yɛ̀ mbɛ̀ fɔ̀ɔ́ nkucɛ mɛ̀yiekɛ̀.

¹³Tínti ɑ nìtìbɛ̀, tínti ɑ kó kupecɛ̃nku ɑ cɛ̃mmù kù, ti sɑ̃ntí fɔ̃́ nwe ti yó ndɑ sɑ̃ntímu nɛ̀ ti bo mbomɛ̀.