YƐSÃÃ 71:3-16

³A ntú n kó dipèrì n sɔri dìì borɛ̀. A yĩmu ɑ yó nni ndɛɛrí, fɔ̃́ɔ̃̀ tu dipèrì dìì n kɑ̃nkɛ́, fɔ̃́ɔ̃̀ tu n cɛ̃kpetɛ̀.

⁴Kuyie nkùù n te n dɛɛtɛ́nɛ̀ bɛyɛibɛ, kɛ́ n fietɛnɛ̀ bɛkɔ̀ùbɛ̀ nɛ̀ bɛyonkubɛ nɔu miɛkɛ.

⁵N Yiɛ̀ nKuyie m búɔ́ fɔ̃́ nwe, n yɛ̃́ fɔ̃́ɔ̃̀ kpɛ́í nɛ̀ m bɛmmɛ̀.

⁶Nɛ̀ bɛ̀ m pɛitɛ́nímɛ̀ m buɔ́ fɔ̃́ nwe, fɔ̃́ɔ̃̀ n dènnɛní n yɔ̃ pɔutì miɛkɛ, kɛ̀ n dɑ sɑ̃ntí sɑ̃́ɑ̃̀.

⁷Bɛsṹkùbɛ̀ ɔ̃ɔ̃ n yɑ̀ kɛ̀ dɛ̀ɛ̀ bɛ̀ dimu, kɑ̀ɑ nɛ́ tú n kó disɔ̀rì kperì.

⁸A sɑ̃nni mbo n nùù miɛkɛ, kɛ̀ nni ndɛ́úkùnko ɑ yètìrì sɑ̃́ɑ̃̀.

⁹Kɛ̀ n kòtɛ́, ɑ bɑ́ m bɔntóo, kɛ̀ n wɛ̃rímú dèè ɑ bɑ́ n yóu.

¹⁰N dootitɔbɛ̀ nɑ́ɑntɛ n kpɛ́í nkɛ, bɛ̀ɛ̀ m pɑkíí bɛ̀ dɑ̀kiimu n kpɛ́í.

¹¹Kɛ tú: Kuyie nhò dootóomu, bɛtinɛ̀ we, pĩ́nnɛ̀ we, òmɔù í yóó ò dɛɛtɛ́.

¹²Kuyie mbɑ́ n dɛ́tɛ́nɛ̀, mɔ́nnɛ́ní mɛcɑ̃ɑ̃ kɛ́ n teennɛ̀.

¹³Ifɛi nɛ̀ mɛyɛi ndɛ̀ɛ do bɛ̀ɛ̀ n wɑ́tìrì, bɛ̀ɛ̀ n dɔ́nɛ̀ mɛyɛi mbɛ̀ɛ bɛ̀ sènkɛ̀rì kɛ̀ bɛ̀ɛ di ifɛi.

¹⁴Mí m búɔ́ fɔ̃́ nwe sɑ̃́ɑ̃̀, kɛ yó ndɑ sɑ̃ntí sɑ̃́ɑ̃̀, kɛ bɑɑ dɑ sɑ̃ntí kɛ dɑ sɑ̃ntí.

¹⁵N níí bo ntṹṹ nkɛ nɑ́ɑ́ nhɑ túmɛ̀ timɔ́mmɔnti yiɛ̀, kɛ nɑ́ɑ́ nhɑ dɛɛrímɛ̀, kɑ̀ɑ sɑ̀ɑ̀ nsũ kɛ í dò nkɑɑ̀ nkɛ́deè.

¹⁶N Yiɛ̀ nKuyie m bo pĩ́ mmutɔ̃ndiɛmù nɛ̀ ɑ kó muwɛ̃rímú, kɛ́nnɑ́ɑ́ nhɑ kó timɔ́mmɔnti kpɛ́í mmɑ́ɑ̀.