Waroma 3:4-21

⁴Mbe, si pfipfo bae! Leka Imulungu yoneke kolongesa, na chila imunu kamghutsu. Ka pfayandikighwe mne Ghamaandiko Maenzeluka, “Chila haulonga mbuli tsako chila munu kakona tsolongesa na hauhigha ghweghwe kwohuma.”

⁵Lekeni ka ukwiha kwetu kwolangusa Imulungu kotenda pfinoghile, lelo tulonge choni? Tulonge Imulungu kototsa hayotuhigha? Ahano nolonga ka imunu.

⁶Si pfipfo bae! Ing'awile apfo, Imulungu ang'adahiletse kuihigha isi?

⁷Imunu yumwe kodaha kulonga, “Ka ughutsu wangu wakongetsa ukulongesa kwe Imulungu na wakongetsa utunitso wake, lelo ule nohighighwa ka nina nzambi?”

⁸Ule ng'atulonga, “Leka tutende ghehile ili ighanoghile ghatse?” Iwanu wangi wandigha, walonga ka nene nolangulitsa apfo. Watsohighighwa ka pfawobamighwa.

⁹Tulonge choni lelo? Twetwe Wayahudi tunogha kubita iwanu wangi? Mbe! Ka pfaniwalongele aho mwanduso ka Wayahudi na iwanu wangi wose wana nzambi.

¹⁰Ka pfayandikighwe mne Ghamaandiko Mahenzeluka; “Kuduhu hata yumwe iyanoghile,

¹¹kuduhu hata yumwe iyotanga, kuduhu hata yumwe iyombama Imulungu.

¹²Wose wamleka Imulungu, wose wawa ka wola, kuduhu yotenda ghanoghile, kuduhu hata yumwe.

¹³Mimelo yawo iwa ka tsikabuli itsili mwatsi milimi yawo yolonga ughutsu. Mmilomo mwawo wana tsimbuli tsine sumu ka ya nzoka.

¹⁴Milomo yawo imema ukulighita na usungu mkulu.

¹⁵Ghamaghulu ghawo ghotsumilila ukukoma.

¹⁶Hohose hawoghenda wohinya na woleka maghayo.

¹⁷Ng'awamanyile bae kukala tseghamba.

¹⁸Ng'awompfuka Imulungu bae.”

¹⁹Lelo twomanya ka Ghamalaghitso gha Musa hagholonga, gholonga ne iwanu wala iwobamighwa kulongotsighwa na Ghamalaghitso ili chila munu yaleke kudaha kwiyamila, na wanu wose wahighighwe ne Imulungu.

²⁰Apfo kuduhu imunu wowose yatsopetighwa kanogha hambele he Imulungu kwa kutenda pfaghobama Ghamalaghitso, ila Ghamalaghitso ghotutenda twalangitse kutenda nzambi.

²¹Lekeni sambi, Imulungu kaitenda inzila yake ya kuwatenda iwanu kuwa wanogha hambele hake imwenyegho imanyike. Inzila ino ng'aihuwila ghamalaghitso bae. Hata ipfitabu pfa Ghamalaghitso ipfiandikighwe na Musa na pfa manabii pfolangusa chinu chino.