Rom 3:4-21

⁴Avele ako. Aveto aro ve toko alavusnga ake ru a ulue o velpol ini toko le apaltetonga, God kene aro i panes vengveng ile riong nunganga aken. Na i ranga ve ini a God ile erere ako i ri nge ve: “Toko alavusnga aro olemi mire ako, God, lom riong i vengveng rintet, na aro ve o pamit ong nge riong, aro lom mong riong aken.”

⁵Na aro ve tokokoere o avrum pel nge them Judare lemem vothung kerenga tomo nge a God ile vothung vengvenga, akennga lemem vothung kerenga i pathengal tokokoere ako God i vengveng, ma aro them ria ol uneke? Na i vava, aro them ri ve God i vengveng avele nge ako ilemi klingtun them Judare? (Lek riong aken i ranga ve ini toko ulue angare ole.)

⁶Avele ako! Aro them ri venen aken avele. Aro ve i venen aken, God i pavurvur avele ako aro i paomelal tokokoere ake ru a ulue nge ole vothung kerenga.

⁷Na ava toko Juda e aro i ri ve, “Lek vothung kerenga i pathengalpot a God ile vothung vengvenga mo i nine, mako tokokoere o papomnga i. Na i vova ako God aro i paomelal tho ranga ve ako tho oma vothung kerenga, e? Eneke lek vothung kerenga aken i pavelpol iriseanga.”

⁸Na aro ve toko aken ile riong aken i nunganga, i pavurvur ako aro o ri ve, “Aro te oma vothung kerenga mo aro vothung sivenga i velpol a i nge.” Na areko o ri venen aken, o pavurvur nge a God ile paomelaling ako aro i sungu i a or nge. Aveto toko pelie o ri ve na o ri tangatun nge tho ve, “I re aken, aken ini a Pol ile riong.”

⁹Na i vava, them Judare, them sivenga nge areko or ini Judare avele, a God itheki? Avele! Eneke tho pathengal thomu nge lale ako ve, Judare tomo mun nge areko or ini Judare avele, or alavusnga o voth a vothung kerenga lemi.

¹⁰Na i ranga ve ako God ile erere i ri nge ve, “Toko e avele ini toko vengveng a God itheki, na e ol e avele.

¹¹Na toko e avele ile mire i vengveng, na e avele i ortet a God.

¹²Na toko alavusnga o lel okime nge a God, na or alavusnga o velpol ini ur polpolnga inga a itheki. Na toko e avele i oma ol vothung sivenga, na e ol e avele.

¹³Na riong ako i espot a owo me i plot ranga ve ini vuvepun. Na o patelek tokokoere nge ole riong le apaltetonga. Na ole riong i pakerenga tokokoere ranga ve ini pilimo iwo einga kerenga ako i pun rin tokokoere nge.

¹⁴Na owo i vual nge voltitetong na riong ako i welwel.

¹⁵Na opisleonga olemi inga ako nge toko so rinnga.

¹⁶Na pen elonga ako o es nge, o pamen kerere vet inga ako ini tokokoere, na o pavelpol vet inga ako ini matheongre nge.

¹⁷Na olemi mire nge tokokoere opamensenunga avele.

¹⁸Na mimiong ako nge a God ingeipnga i voth vet a or nge avele.” God ile riong i ri nge venen aken.

¹⁹Na lemir mire nge ako, ur kathnga ako God ile torong i ri nge, kene them Judare them voth a lemi, eneke God i sungu i a them nge lale. Na i sungu i a them nge mo aro toko e avele i pavurvur aro i kelelal ve, “Tho oma vothung kerenga e avele.” Na i sung mun i mo aro toko alavusnga ake ru a ulue aro o voth a ile paomelaling lemi.

²⁰Eneke toko e avele i pavurvur aro i velpol ini toko vengvenga a God itheki nge patorong panesnga, ave patorong ile omaing ve aro i pathengal it ve, ler vothung i kerenga.

²¹Aveto ponange, God i parong pat sovengalo relnga e ako aro te velpol ini toko vengvenga a itheki, na ini a Moses ile patorong panesnga avele, ini sovengalo ako Moses ile patorong tomo nge a God ile riong elngare o ri nge nomenga.