ROMANOS 3:4-21

⁴Ngwüy, Teat Dios apmarang leaw lamapiüng, cos nej ngo mawaiich, masey meáwan nipilan awaijchaw. Aag ayaj apiüng tiül Mipoch nej, cos apiüng: Apmajaraw naleaing meáwan leaw indeac. Wüx apmajaraw wüx isoet, apmapiüngüw ique ngo mejiür nicuajind nisoet, aw.

⁵Sitiül wüx arangaats ngo majneaj, quiaj ajüiquichaats Teat Dios arang más najneaj, ¿cuane apmapiüngaats wüx aag ayaja? ¿Apmapiüngaatsa Teat Dios ngo majneaj arang sitiül apmüüch icoots mamongochiiüts ngo majneaja por aaga ngo majneaj arangaats? (Sandeac atquiaj cos nipilan atquiaj apiüngüw.)

⁶¡Ngwüy, Teat Dios nómban ngondom marang ngo majneaj! Cos sitiül Teat Dios ngo majneaj arang, ¿nguineay apmajaw wüx asoet nipilan?

⁷Nganüy sitiül xique sawaiich, quiaj sajüiquich Teat Dios nómban ngo mawaiich; ¿neol apmanderac wüx ximbas at xic nop nejiür nisoete?

⁸Sitiül atquiaj ajlüy, ¿neol ngo marangaats ngo majneaj para majlüy más najneaja? Cos atquiaj andeacüw acas nipilan apiüngüw xicona atquiaj saquiajchiün. Aag ayaj apiüngǘwan cos andeacüw ngo majneaj wüx ximbasan. Ajcüwa nipilan quiaj apmamongochiw xeyay ngo majneaj cos áag netam nejiw.

⁹Nganüy cuane ipiüngan, ¿jowa icootsa nipilan judío, más najneaj majaw icoots Teat Diosa, ngo mat icoots meáwan pálwüx nipilana? Aag ayaj ngo maleaing, cos lanapiüng meáwan nipilan arangüw ngo majneaj, masey judíos, masey nipilan ngome judío.

¹⁰Atcüy apiüng tiül Mipoch Teat Dios: Ngo majlüy nejinguind nerang palan najneaj, ngome nop;

¹¹nejinguind ngo mandiüm majaw leaw andiüm Teat Dios, nejinguind ngo mayamb nej.

¹²Meáwan nipilan lambiüjlajow wüx arangüw ngo majneaj; nómban lamandüjpiw aaga ngo majneaj tiiüd. Ngo majlüy nejinguind marang najneaj, ngome nop.

¹³Xeyay ngo majneaj poch aw teombeayiw nejiw, atnej najmboc naw tiül niüng amiüraad mondeow. Oniweaw nejiw ayac nejiw wüx mewaijchaw. Apal ombeayiw nejiw ajlüy atnej micüy napat ndiüc;

¹⁴apaijchaw, ngo mandeacüw najneaj poch.

¹⁵Najénan acuiürrüw mambiyaw alinop.

¹⁶Nguiajantanej mambüw androjchiw ombas cuajantanej, üjchiw mamix omeaatsaran.

¹⁷Nómban ngondom mayajcüw monajneaj.

¹⁸Ngo mapiüngüw wüx mimboloj mandüyiw Teat Dios.

¹⁹Icootsa ajawaats meáwan leaw apiüng tiül aaga poch tüünd Moisés, aag ayaj nembeat ocueajiw ajcüwa nipilan leaw ajiürüw aaga poch quiaj. Aaga poch quiaj ajüiquich nguineay meáwan nipilan arangüw ngo majneaj. Aaga poch apal ombeayaran, quiaj nejinguind ngondom mapiüng Teat Dios ngondom mayac nej asoet.

²⁰At nejinguind ngondom mapiüng apmaw asoet nej, cos arang atnej apiüng tiül aaga poch tüünd Moisés. Cos aaga mipoch Moisés quiaj, üüch icoots majawaats cuane nisoet ajiüraats.

²¹Nganüy Teat Dios lamüüch icoots majawaats nguineay alndom mawün asoetiiüts. Aaga poch tüünd Moisés ngo mambeol nicuajind, masey naleaing tandeac wüx. At mondeac andeac Teat Dios tapiüngüw wüx aag ayaj.