Loma 3:4-21

⁴Anana na lahe na ba, “Nigeya! Yehoba wana bateli ni paolaolaek ya. Bwagana gamagalau gegewel nihi kakawi, Yehoba iya tobaaba tunahot. He i ola Buki Bwabwalena ana baaba, Yehoba bana i ba: Sauga ebo nu baaba, gamagalau gegewel nihi atena wam baaba i tunahot, ge ebo gamagalau nihi wolewa, inoke nu gasisi ge wam kot ni sapu.”

⁵Yaa gamagalau enuna nihi ba, “Inoke sauga ebo ama Yudiya gegi ha ginol, yaka eliyana gamagalau hi kite bubun age Yehoba wana ginol i sapu. Inoke ga i ola? Tabam nige i sasapu te Yehoba wama gegi o ni lahe.”

⁶Analiya na lahe na ba, “Nigeya! Yehoba wana sapu i gan te wami gegi ni lahe. Ebo nige i sasapu Yehoba wami gegi ni lahe, abwe ga ni ola ge panayawi gamagaliliyau gegewel ni pakotil?”

⁷Tabam gamagalau enuna al nihi ba, “Sauga ebo wama bateli Yehoba elana ha apanak, yaka eliyana gamagalau hi atena bubun Yehoba wana bateli i nunuwahikan, inoke Yehoba hi tobalan. Inoke hauna kaiwena ge Yehoba i pakotima i ola ama togegi?”

⁸Analiya na lahe na ba, “Nige bosowaina ta ba ola to. Ebo ta ba ola o, inoke binimala al ta ba, ‘Pagan nanakina ta ginol inoke enona waisi ni masal!’” He gamagalau enuna hi awa naknakagau tage ya ba ola, yaa wali baaba nige i sasapu. Amwahika te Yehoba abwe ni lahel.

⁹Inoke ga i ola? Age ama Yudiya wama waisi i gan ge bolo nige Yudiya i oola ha waisi lakel? Nigeya hot! Iyaka ya liwanan haba Yudiya ge bolo nige Yudiya i oola, gegewela ta minaa gegi gamwanaa.

¹⁰He i ola Buki Bwabwalena ana baaba i ba: Nige tosasapona etega i gagan, nige etega.

¹¹Nige toatena etega i gagan, nige etega i kukululuek Yehoba elana.

¹²Gegewel Yabowaine ana en hi pek, inoke hi nogegi, nige etega wana ginol i wawaisi, nige etega.

¹³Baaba toto i tagilem gamwaniniliyaa bosowaina avaliyau ni lolil ge nihi aliga. Memeliya kakawi ana baaba i baubaunan, ge baaba toto i soguem hohopeliyaa i ola mwata lelamwina.

¹⁴Ba nuwamut ge pihigelgel ana baaba awaliya i kalaopopwi.

¹⁵Aeliya i mweyaha te nihi na gamagal nihi tagapaaligal,

¹⁶ebo ga nihi noek, yaka gamagalau nihi apapanak-agil ge nihi papalomwan-agil,

¹⁷mibubun ana minamina nige hi aatena.

¹⁸Yehoba ana lovakun nige i gagan elal.

¹⁹Baaba bolo ya i neem Logugui ana buki elana, ge ta atena hauna gun Logugui i baunan, he Yudiya kaiweliya to, heliya hi miminaa Logugui o gabulanaa. Inoke heliya ge gamagalau gegewel panayawiya hi minaa Yehoba wana yatala elana, ge nige etega bosowaina ni ba, “Nau nige no gegi i gagan.”

²⁰He nige tage gamagal logugui ni henapuan inoke Yehoba gamagal o ni awa sapusapu-an. Yaa logugui wana tuwalali te wala gegi ni pankitela.

²¹Inoke sauga ya Yehoba kamwasa iyaka i pamasal ge eliyana gamagalau ni awa sapusapu-agil, yaa nige logugui ana henapuan eliyana i oola. Kamwasa o Mosese wana Logugui ge palopitau iyaka hi wasaan.