Rome Embokena 3:4-21

⁴Tefo, nu jo doyae arira. Evetu genembo isasambu ne gungubo seraera tano. O God nu geka beká vanembo seraira. Nunda Geka jokáda aindae eminge resira: “Ni geka sise, geka beká vanembo seraesa, ava isagha ari evetu genembo kasama arera. A kotugo ni ijujaresa da sifo aminda, evetu genembo ni gido geka beká arera,” nunda Geka aminge resira.

⁵Avata evetu genembo mendeni erekotera amo: “Namonde ari ekoko arera amo, God nu eveva vanembo arira aindae, evetu genembo nunda javo jighoro erarira. Amo, namondeda ari ekoko eraera aimi, God da binó sonembari teria arira. Ava sedo, God redae namonde ari ekoko embo dari dae resi?” (Emo, na evetu genembo mendeni da kotari ava resena.)

⁶Avata amo jo geka beká iraeri. God nu ari ekoko da mino, jo inononda mutae aetira amo, nu nange enda kaifa use evetu genembo ijujari?

⁷Evetu genembo daba aimi, eminge erekotera: “Namonde gungubo seraera aimi, God da binó sonemberaira. Ainda beká mo: namonde gungubo seraera aindae sedo, God geka beká ava ijugari dae sedo geka beká seraira. Amingeari, God da Geka beká isagha eari kasama edo, natofo God dae sakai seraera. Ava sedo, God jo namondeda ari ekoko ijujari dae jo sae aeti.”

⁸A gido, ari eveva isagha are dae sedo, ekoko vanembo use irore!” aminge seraera amo, geka sembaeri. Evetu genembo mendeni nandae unongu sise, na amingaoro dae sariá sise seraera. Avata na geka eko amo jo sae eraena. A unongu sari kakato setena amo, God ijujedo, nenda unongu sari aindae darira amo, eveva arira.

⁹Ava sedo, namane Jusi embo jo eminge sae arera, “Namane evevari, namanenda gitofu ekokori,” ava jo sae arera. Tefo, na geka anakora seteno ningeva amo, eviri. Jusi embo a Jusi embo da gitofu, ne inonori. Ne isasambu, ari ekoko da amboda amboda use irá gheraera.

¹⁰God da Geka aindae eminge resira: “Genembo eveva eni, tefo bekári.

¹¹Genembo eniimi jo kasama use God tava ae eraira.

¹²Evetu genembo isambu, eveva da emboro gukai mutudo, eko da emboroda udo ya gheraera. Evetu genembo isambu sembae use irá gheraera.

¹³Kau ambari embo da ofofo gomoda ghe, masa ombege foa gheraira aminga ava, geka eko nenda bekada ghe foa buvuraira. Amo, ne gungubo sise irá gheraera. Kau kae eko jingabukena iriari gamburaira aminga ava, geka eko nenda békada irise buvuruturureari, dara siroreraira.

¹⁴Nenda bekaimi simbora use, dubo ekoko use geka seraera.

¹⁵Tataya da bino ningarera amo, ne anakora sumbu ya buvudo tataya use, mendeni daoro mema itatamarera, a mendeni daoro sirivo arera.

¹⁶Ne reda ya buvarera amo, reighi sosighi edo, ekoko ururoro dubo mema sirorarira.

¹⁷Mainungari da emboro amo, ne berefori.

¹⁸Ne God jo itako kakara use, igheghi ae eraera,” God da Geka aminge resira.

¹⁹Ainda beká mo: namonde kasama erera, Agho Dari rea resira amo, nu evetu genembo Agho Dari da emboro+ aminda ise irá gheraera, nemokena resira. Agho Dari resira amo, nu evetu genembo isambu nange God da ijujari ava darige ya buvaetera ainda emboro+ ava, gajari dae sise resira.

²⁰Jo genembo eniimi Agho Dari da emboroda+ ise inononda ururari, God nundae ‘eveva’ jo sae arira. Amo, God Agho Dari futusira da susu mo: namonde evetu genembo ari ekoko eraera, ava totofo kasama aoro dae sedo futusira.

²¹God evetu genembodae ‘eveva’ sari da emboro mo, oroko isagha etiri eregosera. Avata evetu genembo Agho Dari da emboro aminda udo yarera aikena, nendae jo ‘eveva’ sae arira. God emboro+ seka numokena afigarira ava, Agho Dari da geka a feroveta da geka jokáda gembero resira.