ROMA 3:4-21

⁴Dia unuheto. Dirava be momokani, a taunimanima iboudiai na e koikoimu; buka ai e torea heḡereḡerena eto, Oi emu hereva iboudiai bae momokani, Bena bae hahemaoro henimu negana ai ba kwalimu.

⁵A iseda kara dika ese Dirava ena kara maoromaoro baine hahedinaraia negana ai, ede baita gwau toma? Dirava ese baine badu henida, ia na baine kerere a? Lau ese taunimanima edia hereva kava mo na gwauraiamu.

⁶Lasi, dia unuheto. Unu bema heto, Dirava ese tanobada ede bema hahemaoro henia toma?

⁷Badina be lauegu koikoi ese Dirava ena momokani bona ena hairai bema habada, dahaka dainai egu kara dika davana bema henigu?

⁸Ai na asiato “Dika baita kara, namo ihavarana helaoreana”. Haida ese e habadelaimai koikoimu, e tomamu ai na unu a gwau toma; edia koikoi davana bae abia hari namo.

⁹O edeheto? Ai Iuda taumai be heherea a? Lasi ona lasi vaitani. Badina be Iuda taudia bona Helene taudia vada e habadelaidia, hahebade tamona: iboudiai na mai edia kara dika.

¹⁰Buka Helaḡa ai e torea heḡereḡerena eto, Ta dia maoro, lasi ona lasi vaitani;

¹¹Lalo-parara tauna ta lasi, Dirava itahuna tauna ta lasi;

¹²Iboudiai vada e raka oho, vada e dika bou; Kara namo tauna ta danu lasi vaitani.

¹³Gadodia na gara e hekehomu na heto, Maladia ese koikoi mo e gwauraimu, Bibinadia na hekori gaigaidia ese mase muramurana e loalaimu na heheto,

¹⁴Ududia na heuduguirai bona ere daḡedaḡe ai e honumu.

¹⁵Aedia e heaumu, rara ihahebubuna totona;

¹⁶Hahebua-tari bona hisihisi na edia dala ai mimia,

¹⁷Bona maino dalana na asi dibadia.

¹⁸Dirava garina asie garimu, lasi vaitani.

¹⁹Dibada taravatu ese e gwauraimu herevadia iboudiai ese taravatu henunai e nohomu taudia e gwaurai henidiamu, taunabunai udu ihoudiai bae hekou, bena tanobada idoinai na Dirava ese baine hahemaoro henia.

²⁰Taunabunai, tau ta basine maoro taravatu ibadinana dainai; badina be taravatu ena amo taunimanima na kara dika mai dibadia.

²¹Harihari Dirava ena kara maoromaoro vada eme hedinarai, dia taravatu amo, a taravatu bona peroveta bukadia ese vada e hamomokania dalana amo;