Roma 3:4-21

⁴Sonde mungkin! Te biar samua orang di ini dunya tukang putar-balek, ma Tuhan sandiri omong yang batúl tarús! Inga te ada tatulis dalam Tulisan Barisi soꞌal Tuhan pung diri bilang, “Ada orang yang lempar sala bilang, Dia sonde putus parkara deng adil. Ma nanti dong dapa tau bilang, apa yang Dia omong tu, memang batúl. Dia pasti manáng, tagal Dia sonde mungkin omong sala.”

⁵Ma kalo kotong ada bekin sala, ais, itu kasi tunju lebe taráng sang samua orang bilang, apa yang Tuhan bekin tu, memang batúl. Kalo bagitu, kotong mau bilang apa? Mau bilang, Tuhan sonde adil kalo Dia kasi hukum sang kotong, ko? (Te ada orang saparu yang omong bagitu na.)

⁶Sonde mungkin! Tuhan sonde sala kalo Dia kasi hukum sang kotong. Te Dia ada pung hak ko kasi hukum orang yang bekin sala di ini dunya.

⁷Naa! Kalo beta omong kosong, itu kasi tunju bilang, Tuhan pung hukuman tu, batúl. Kalo beta su kasi tunju Dia pung hebat bagitu, akurang ko Dia pareksa beta pung idop, ais putus beta pung parkara bilang, apa yang beta bekin tu, sala?

⁸Jang bagitu! Te kalo mau iko pikiran bagitu, bosong iko orang yang bilang, “Biar ko kotong bekin jahat lebe banya, ko biar yang bae ju batamba banya!” Orang yang omong bagitu, pantas kaná hukum. Ma ada orang yang omong bekin rusak beta pung nama bilang, beta ada ajar orang bagitu.

⁹Jadi karmana? Bosong pikir kotong yang orang Yahudi lebe bae dari orang bukan Yahudi dong? Sonde mungkin! Te beta su kasi tunju sang bosong bilang, samua orang jato sala, biar dia orang Yahudi ko, orang bukan Yahudi ko.

¹⁰Te ada tatulis dalam Tuhan pung Tulisan Barisi bilang, “Sonde ada orang yang idop lurus tarús. Sonde ada satu ju!

¹¹Sonde ada orang yang mangarti batúl soꞌal Tuhan. Sonde ada satu ju yang cari kanál sang Tuhan.

¹²Dong samua su serong dari jalan idop yang lurus. Ais dong su sonde laku-laku lai. Sonde ada orang yang kasi tunju hati bae. Sonde ada satu ju!

¹³Dong pung omong, baboo busuk, sama ke kubur yang orang su gali ulang. Dong pung mulu cuma tau kasi kaluar putar-balek sa. Dong pung kata-kata yang kaluar dari dong pung mulu, sama ke ular pung racon.

¹⁴Dong pung mulu cuma tau maki orang, deng omong yang busuk ko bekin saki hati orang sa, te itu yang kaluar dari dong pung hati busuk.

¹⁵Dong sonde taku-taku mau bunu orang.

¹⁶Dong pi mana, na, dong suka bekin kaco di situ, deng bekin susa macam-macam sang orang.

¹⁷Dong idop sonde tau badame, deng sonde tau idop deng hati tanáng.

¹⁸Dong sonde bisa tahan diri, tagal sonde ada rasa taku sang Tuhan sadiki ju.”

¹⁹Naa! Kotong tau bilang, Tuhan kasi Dia pung Atoran sang orang yang musti tondo deng itu Atoran dong. Deng bagitu, dong sonde ada pung alasan apa-apa lai. Nanti samua orang di ini dunya musti mangada sang Tuhan Allah, ko Dia putus dong pung parkara bilang, dong sala, ko sonde.

²⁰Andia ko sonde ada satu orang ju yang bisa omong bilang, “Tuhan cap sang beta bilang, orang hati lurus, tagal beta bekin iko Dia pung Atoran samua.” Sonde bisa! Te Tuhan pung Atoran yang kasi tunju bilang, kotong samua ada bekin sala.

²¹Jang bingung soꞌal Tuhan pung rancana yang tunju jalan ko kotong bisa babae kambali deng Dia. Yang batúl, kotong bisa babae deng Dia, ma bukan tagal bekin iko Dia pung Atoran. Te Dia pung Atoran sandiri ada tulis bagitu, deng Dia pung jubir dolu-dolu dong ju kasi tau bagitu dalam Tuhan pung Tulisan Barisi.