ROMANOS 3:4-21

⁴Niicxe teḻ zharaa quiayuṉctal miech xtoḻ zho, saṉgue Dios ctsëëd me xtiidz me. Zigne zhobneeque lo Xtiidz me, zaatne rnee: “Miṉe rnee Dios, diidzli naca; niicle zha ne gacladz, guieṉd pe ncuaaṉe glisqui zho lo me.”

⁵Sca nac Dios, gacxe waa rnee me grëse zha ne ruṉctal xtoḻ, rieguiaḻ ygaa zho guieḻnë ne cxeeḻ me. Ga nagoṉ, rlu ne miṉe nac diidzli, miṉ co ruṉ me. Nana, ¿pe ziab ne nonguieḻd miṉe ruṉ me ga?

⁶Miṉe nonguieḻ ga goṉ ruṉ me, sac teḻ gdziguien me grë zha ne ruṉctal xtoḻ, ¿zha naczhe guieḻwxtis ne dzigo guṉ me?

⁷Nana, nogaa zho gnë, ¿per pe nacne glisqui Dios doḻ ne rdziuuṉ ne, ni teḻ por lëëw rlu ne diidzli nac miṉe ruṉ me?

⁸Per teḻne sca naca, rrieequia dzigo ib none guṉctal ne xtoḻ ne parne yquiaraa zdoo me ne. Ni nzian zha ne nobee xquieḻto naa, rnee zho ib miṉ co noseed naa miech. Ni zha ne sca rnee, ib tedlaad zho lo guieḻnëdox ne rieguiaḻ zho.

⁹Nana, ¿pe zdzieets ne dzigo ne nac ne zha Israel, nziuuraa ne lo grëraa miech stib guiedz? ¡Led scada goṉ! Niina blozh bzeet naa lo to, grëse ne ngoopdoḻ nac ne, zigtaa zha Israela, zigtagaa zha stib guiedza.

¹⁰Zigne zhobneeque lo Xtiidz Dios, zaatne rnee: ¡Guieṉd miech ne zienaḻpaa miṉe racladz Dios! ¡Ni tib zho guieṉd!

¹¹Guieṉd zha ne niini guic; guieṉd zha ne tsoxco yguib xnëz Dios.

¹²Grëse zho laa zho zie nëz ne nitlo zho; niapse guieḻntseeb zienaḻ zho. ¡Guieṉd zha ne zienaḻ miṉe racladz Dios! ¡Ni tib zho guieṉd!

¹³Ro zhow, masaque beeṉ cuent naca zig nac leṉ grë baa ne noyodz ngutoo; niapse diidz ne rquidie zho zhoob lo ludz zho. Grë diidz ne rnee zho, masaque naca zig nac xvenen grë meeḻ dox;

¹⁴niapse grë diidz dox, niapse grë diidznë rrieeche ro zho.

¹⁵Ni zhow, masaque zombëzlew dieṉ pa tsiegut zho samiech zho;

¹⁶loxaque guieḻnë, loxaque guieḻzi rsaṉ zho zaatne rded zho.

¹⁷Ib naṉd zho ne zaacse gbannie zho samiech zho;

¹⁸per ni Dios rdziebdraa zho.

¹⁹Gacxe waa nroob nac guieḻnëdox ne ygaa grë zha ne ruṉbey ley ni mband zho zigne naca, leḻ ruṉ zho grëtaa guieḻntseeb zig nac grë miṉe goquiet nu. Ni niicle grëraa miech ne ruṉbeyd ley, scaque ngoopdoḻ nac zho, ni ro zho guieṉd pe guiab zho lo Dios.

²⁰Goḻgaṉ sca gaṉle, grieelod guiaaṉmbe ne lo Dios, niicle paraa yquia ne guṉ ne miṉe rnee ley; sinque par guieṉ ne gaṉle ne ngoopdoḻ nac ne, gane biaaṉ ley.

²¹Saṉgue niina, tib ladle biaaṉ ley, laa Dios bneedz stib mod ne guiaaṉwen ne lo me. Ni lo grëque guits ne ziaad ley, lo grë guits ne pquiaa zha ne biadteed Xtiidz Dios padzeela, ga raquieta.