Loma 3:4-21

⁴Daa, etete dopa napita! Endakali dupa pitakame sambo latala lataminoli napitamiaka doko, Goteme sambo laa nayao latamoli pyoo kiningi pita. Pii pepa pyapae singi dokonya, “Embame mana tolao minilino dupa pii leleno dokome panenge. Embame kopeta pilinona lao endakali dupame emba kosimi latamino kandao doko, embame ita minatena,” lapae silyamo.

⁵Naimame mana koo miningi dokome Goteme mana tolao miningi doko laitaka pingi. Dopa pingi dokonya naimame aipa latamape? Endakalimi lengeli pyoo lelyona, Goteme naimanya koo pingi dupanya imbu kayao yanu nyingi doko kopeta pingina latamape?

⁶Daa, etete dopa nalapenge! Baame tolao napingi pyali kandao doko, aipa petala baame yuunya endakali palenge dupa yapapala yanu nyetana lapumalipi?

⁷Nambame sambo lao mana koo minio dokome Goteme lelyamoli pyoo kiningi mana miningi doko minao andasoo baa lalyia. Dopaka doko, “Gote embame aipuma namba koo pingi endakali joo kalyenona latala yanu nyilipina?” latope?

⁸Nambame dopa lapuli kandao doko, naimame dapa apata lapumaliaka: “Mana epe dupa pyakaliyina mana koo dupa minama,” lapumali. Kini, endakali yangi dupame naima kandao pii koo lao naimame dopaka lengena lelyamino. Dopa lelyamino endakali dupa-kisa Goteme yanu nyeta doko kapa.

⁹Dopana, naimame endakali waka dupa ita minao katengepe? Daa, naimame dupa mendeme ita naminingi. Doko nambame latelyo. Juta dupapi tata waka dupapi dupa pitaka koonya pupu lapae dokonya pundipundi anjetae katenge.

¹⁰Dokonya dapa lao pepa pyapae silyamo: “Endakali mendaipi mende epe tolatae daa. Kini mende etete daa!

¹¹Endakali mendaipi mendeme masala naenge. Endakali mendaipi mendeme Gote kutala naenge.

¹²Endakali dupa pitakame kaitini tolatae doko yakinatala uanga pyoo payami. Endakali dupa pitaka awapa koyami. Endakali mendaipi mendeme mana epe naminingi. Kini etete mendaipi mendeme daa!

¹³Endakali dupanya nenge-kaita pii pyakalyilyamo doko endakali malu lopapae silya dupanya aii pyakalyingi dopale joo pyakalyingi. Dupame nyakamanya keke kambupi dokome sambo pii koo dupa lengema. Dupanya kambu dokonya endakali pyao kumasingi tomakai jepae pii dupa palenge.

¹⁴Endakali dupame nyakamanya nengekaita dokome koyasingi piipi pii kaa pipaepi dopale dupaka longo lao lao katengema.

¹⁵Dupame endakali pyao kumasalanya mona lyaa latae katengema.

¹⁶Endakali dupa kaita paelyamino dupanya kenda pipaepi mana koo minapaepi dupa singi.

¹⁷Epe yuu yongena lao katenge mana doko dupame nakandao katengema.

¹⁸Gote andanda semaiyoo katapenge doko dupame masala nayao katengemana,” lapae silyamo.

¹⁹Dee mana setapae dupame lelyamo dupa pitakame endakali dupa-kisa mana setapae silyamo dupa kandao lengena lao naimame masilyamano. Mana setapae dupame lelyamo dupa endakali mendaipi mendeme nenge-kaita nasina lao, Goteme yuunya endakali palenge dupa pitaka kosimi lao yanu nyina lao lenge.

²⁰Doko, mana setapaenya lapae silyamoli pingi dokonya Goteme endakali mendaipi mende baanya enomba dokonya tolataena nalenge. Mana setapae dupame koo pingi dupa panasoo singi.

²¹Dopaka doko, endakali dupame mana setapae mendenya lapae silyamoli napilyaminopa, Goteme mee tolataena lenge doko baame epapu laitaka petea. Moseseme piipi manapi pepa pia dupapi, potopesa dupame pii pepa piami dupapi dupanya dopa lapae silyamoaka.