Romanos 3:4-21

⁴¡Manamari! Masqui lluy mana allin artillacta niyalcaptinpis, pay'a rasuncällactam nin'a. Chaymi Diospa shiminćhüpis niyan: “Limaptiqui'a rasuncäćhu caśhayquita lluyćha yaćhapäcun'a; chaymi cärayculpis llallinqui” nil.

⁵Ichaćh waquinnincuna: “Juchanchiccunam Tayta Dios maynu sumä caśhanta camalaycayächin; chayurá mućhuycachimänanchicwan'a allin cayninmannüchu manaćh lulaycun” niyalcan.

⁶¡Chay manam chaynüchu! Tayta Dios tincüninman mana licaycü cayal'a, manaćh imaypis cay pachäta cäraycuyanmanchu.

⁷Waquincunañatacćha nin'a: “Articuynïwan Tayta Diospa rasun caynin mas-mas altuman juluycuśha cayaptin'a, ¿imapïtan-nila jucha-sapapa cäraycayämanman?

⁸Chayurá mana allincällacta lulaycuśhun allinca śhaycamunanpä” nil. “Caynümi yaćhayächin” nil tumpapämanlä canpis. Paycunacta Tayta Diospa mućhuycachiyninmi tincüninmannuy alcaycuyan.

⁹Chayurá ¿Israelcunaca mas allinchun cacuyanchic? ¡Manamari! Tantiaycälichicñam Israel mana-Israel caśhtapis juchap maquillanćhu caśhanchicta.

¹⁰Chaymi Diospa shiminćhüpis cayta niyan: “¡Manam mayan nunallapis mana juchayu canchu! ¡Jucllayllapis manam canchu!

¹¹¡Manam mayanpis Tayta Diosman licaćhacü canchu! ¡Jucllayllapis ashiycü manam canchu!

¹²Lluypis pintïlälinmi; lluy lluymi pampaman muyülälin. ¡Manam mayanllapis allincäta lulaycü canchu; manam jucllayllapis canchu!

¹³Tuncurincunapis nïchu quićhalayäcänümi cayan; alluncunapïpis articunallam yalayämun; shimincunaćhüpis culibraypa bininuncunallam winalayalcan.

¹⁴Shiminpi piñacuycunallawan mana allin juyu cananpä limaycunallam juntäśha cayan.

¹⁵Ćhaquinpis nuna-masinta wañuchinanpämi pinquiylla pinquiyan.

¹⁶Chaymi pulishancunaćhu mana allinllacta, llaqui pulumäśhacta caćhaycamun.

¹⁷Jawca cawsayćhu yaćhayta manam lisipäcunchu.

¹⁸Umanćhu manam caycunchu Tayta Diosta manchacuywan licaycälinanpäpis” nil.

¹⁹Canan yaćhanchicmi camachicuyca maquinćhu cäcunällapä caśhanta. Chay jinantin pachäćhu cäcunaca imaniculcäśhantapis upällachil Tayta Diospa cäraycuyninman puśhamunanpämari.

²⁰Ñatac camachicuyta lulaśhanchicpachu manam Tayta Dios allinpa licaycamanchic. Aśhwanpa camachicuycá tantiaycachimanchic jucha-sapa caśhallanchictam.

²¹Cananñatacmi ichá Tayta Dios camalaycachimanchic nunacunaca imanuypa paywan allinpa licachicunapäpis. Cay manam camachicuypïchu śhamun. Ñatac cay rasun caśhanta camachicuywan Diospa willacünincuna isquirbishanćhümi niyan.