Rom 3:4-21

⁴E moa koru! E Sunahan e roron ranga hamana nitoana, noahasina te gi gamo hitonia u katun hoboto. Taraha, u Buk u Goagono e mar ranga mena nei e Sunahan teka: “U ranga i tamulö e haruto nanou alö e matsköm. Te kot naroen lö ba nori te sabie riou u ranga i tamulö e matsköna.”

⁵Kaba te ga haruto neia a markato a omi i tarara te matskö uana e Sunahan, ba ra te neha talara? (Alia e ranga heregi teka a katun tun lasi.) Ara e tatei poiera e Sunahan e ma matskö nei te hahuna mera neien ra?

⁶E moa koru te gi ranga u ra teka! Sanena e Sunahan te ma matskö nei, ba nonei te ma antunan tsimou hamatskö ranei u katun i puta.

⁷Kaba a katun e tatei poe toumena, “Te haruto nena u gamo i tar e Sunahan e ranga hamanana ba te here nei u gamo i tar e soloseie nen, gaha tsiponi te poe mene ien alia gi hahune iou?”

⁸A palabir u katun e mar gamo uar teka ba te poier, “Ara gi poe lasi, ‘Ara gi kato homi sil te ga butu u ta ka ta niga.’” Nori e ranga homi nario lia me poier nonei u ranga i tar teka. Kaba e moa. E Sunahan e hala rano ien a nihahuna te matsköna i taren.

⁹Na lia e hohou rangata leligu, a nikaka turu Jiu e niga nena a nikaka turu katun te halhal ria turu Jiu? E moa koru. A barebana hoboto, u Jiu nu katun has te halhal ria turu Jiu, nori hoboto e ka puta ria tara markato a omi.

¹⁰U ranga teka i koloto nia turu Buk u Goagono: “E moa ta katun te ga matskö, e moa koru ta toa.

¹¹E moa ta katun te ga atei. E moa ta katun te ga sake e Sunahan.

¹²U katun hoboto i hagelo ban a maroro a matskö. Nori te omi hobotor e hereri a kannou te magoliana. E moa ta katun te ga kato haniga, e moa koru ta toa.

¹³U ranga i taren e omi here nei a kioun mate te kaho poutse ier ba te soka homi koruna. Hena, nori e gamogamoeri a tana katun a miaren. U ranga u omi, te here nei a matuna te ka mena a kukutsi, te kana i iahana penrungren.

¹⁴A rungren e saputena u ranga u mal.

¹⁵Nori e hasesei siler te gi na atung hamate meni a tana katun.

¹⁶Tara mamana han te la uaren, nori e habutser a ninomi ba te kato hatiamer a torina tana katun.

¹⁷Nori e ma atei sileri a markatona tara masalohana.

¹⁸Nori e ma matoutseri e Sunahan.”

¹⁹Ara e atei silera a mamana ka te poiena u lo tere Moses e la uana turu katun te ka puta ria turu Lo teka. A ka teka e kato silena te go kato hahalongolo meri u katun hoboto na te go haruto meni u barebana hoboto e omi ria i matane Sunahan.

²⁰A katun te kukutiena a mamana ka te poiena u Lo e ma matskö nei i matane Sunahan, taraha u Lo e harutsena a katun e kato homina.

²¹Kaba tara poata teka e Sunahan e haruto nena a maroro halhal te kato hamatskö mena neien a katun i matanen, na nonei e ma maroro uanei turu Lo tere Moses. E moa. Nonei e maroro uana tara nihamana tere Iesu. I romana e Sunahan e kato hamatskö rena u katun hoboto te hamana ria tere Iesu Kristo. U Lo tere Moses nu ranga turu propet i hatein a ka teka. A pal barebana hoboto e kato has uar i iesana i matane Sunahan i romana.