1Mↄkↄ̃n sↄ̃, ǹ yã kũ àdi kↄ̃ sɛ́ kũ yãzɛdedannɛnaao dańnɛ.
2Ǹ da mare zↄ̃kↄ̃nↄnɛ ògↄ̃ ń zĩda kũna dↄ̃ gbɛ̃ bɛ̀ɛrɛdenↄ ũ, laakaridenↄ ũ. Ò zɛ́ sɛ́ súsu kũ yenyĩo kũ mɛnao.
3Ǹ da nↄgbɛ̃ zↄ̃kↄ̃nↄnɛ dↄ ń kunna gↄ̃ de donyĩri mananↄ kunna ũ. Òsungↄ̃ de gudɛri ke wɛ̃ zↄ̀nↄ ũro. Ò yã mana dańnɛ,
4de ò lɛ́ da nↄzãrenↄa ń baadi gↄ̃ ye a zãi kũ a nɛ́nↄo,
5ògↄ̃ de laakaridenↄ ũ gbãsĩ sari, ò laakari dↄ ń ↄn zĩa, ń baadi mì natɛ a zãnɛ de òsun Luda yã vãni boro yãi.
6Ǹ lɛ́ da kɛfɛnnanↄa dↄ ògↄ̃ laakari vĩ.
7Ǹ yãmanakɛna zɛ́ mↄńnɛ a pínki gũn. N yãdannɛna gↄ̃ bɛ̀ɛrɛ vĩ à kↄ̃ sí kũ n yãkɛnaao
8kũ yãzɛde kũ oni fↄ̃ ò a ɛ́kɛ boroo, de wé'i gbɛ̃ kũ ò bò n kpɛnↄ kũ, òsun yã vãni le ò o ó yã musuro yãi.
9Ǹ lɛ́ da zↄ̀nↄa ò mì natɛ ń dikirinↄnɛ yã sĩnda pínki gũn, ò yã kũ ani káńgu kɛ. Òsun yã liḿmaro.
10Òsun kpãni oḿmaro. Ò tó ògↄ̃ ń dↄ̃ gbɛ̃ náanidenↄ ũ manamana, de Luda ó Surabari yã kũ odì dańnɛ wɛ́ bo yã sĩnda pínki gũn.
11Zaakũ Luda gbɛ̃kɛ kũ à sù kũ surabanaao gbɛ̃ sĩnda pínkinɛɛ bò gupuraa.
12Gbɛ̃kɛ pì tɛn dawɛrɛ ò kpɛ li yã kũ adi kↄ̃ sí kũ Luda yãoronɛ kũ andunia pↄ́nidɛnanↄ, de ògↄ̃ ó zĩda kũna dↄ̃ gbɛ̃ mananↄ ũ, ludayãmarinↄ ũ andunia tera díkĩna gũn,
13ó wɛ́ gↄ̃ dↄ gↄrↄ arubarikade kũ ótɛn dãa. Àkũmɛ ó Luda zↄ̃kↄ̃ ó Surabari Yesu Kirisi sugↄrↄ gakuride ũ.
14À a zĩda kpà ó yãi, à ó bó vãni sĩnda pínki gũn, à ó gbãsĩ gògo, de ò gↄ̃ a zĩda gbɛ̃ kũ ò yãmanakɛna ania vĩnↄ ũ.
15Ǹ yã pìnↄ dańnɛ ǹ lɛ́ daoḿma. Ǹ kpãkɛ̃ńyĩ kũ iko kũ ń vĩo pínki. Ǹsun tó gbɛ̃ke n gya boro.
