ቲቶም 2

1

2

3

¹ኔኤኒ ጋዓንቴ ፒዜ ማዔ ዔርዚፆና ዎላ'' ጊኢጋያ ማዔ ባኣዚ'' ዔርዜ፤

²ዓቲንቆ ጋርቻ፦ ኮይሳ ጎይፆ ናንጋያ፥ ፔ ቦንቾ ካፓያ፥ ዔኤቢ ዔሪ ማዻያ፥ ፆኦሲ ጉሙርቂሢና ናሹሞዋ ዓኣያ ሃሣ ጊቢ'' ዳንዳዒሢናኣ ዶዲ ዓሲ ማዓንዳጉዲ ዔያቶ ዞሬ።

³ዬያጉዲ ሃሣ ላኣሎ ጋርቻ፦ ኮይሳ ጎይፆ ናንጋያ፥ ቦንቾ ፔኤሲ'' ካፓያ፥ ዓሲ ዾንኩዋያ ሃሣ ዑሺ ናሽካያ ማዑዋጉዲ ዔያቶ ዞሬ፤ ዬያይዳፓ ዔያታ ኮሺ ማዔ ባኣዚ'' ሜሌ'' ዓሶ ዔዔርዛያ ማዖንጎ፤ ዬይያ፦

⁴ሎዔ ዼጌ ላኣላ ፔኤኮ ዓኒንሢና ናኣቶ''ና ናሽካንዳጉዲ፥

⁵ዔኤቢ ዔሪ ማዻያና ዒኔ ጌኤሺ፥ ማኣሪ ማዾ ማዻያ፥ ኮሺ ማዔያ፥ ፔኤኮ ዓኒንሢም ዓይሢንታያ ማዓንዳጉዲ ዔያታ ዔርዞንጎ፤ ዼጌ ላኣላ ያዺዴቴ ፆኦሲ ቃኣሎ'' ቦሃንዳ ዓሲ ባኣሴ።

⁶ዬያጉዲ ላኣሎ ዔኬ ዓቲንቆ ዼጌሢ' ፔና ዔሪ ዎይሣንዳጉዲ ዔያቶ ዞሬ፤

⁷ኔኤኒ ቢያ ባኣዚ''ና ኮሺ ባኣዚ'' ማዺ ማዺ ዔያቶም ኮኦኪንሢ ማዔ፤ ኔ ዔያቶ ዔርዛ ዎዶ''ና ኮይሳ ጎይሢና ናንጊሢ፥ ጎኔ ሓይሴ ጌስቲሢ፥

⁸ዾንኪንቱዋ ኮሺ ጌኤሲ ዔያቶም ዻዌ፤ ዬያይዲፆና ኑና ዒፂ ማካ ዓሳ ኑጊዳ ጌስቶንዶ ፑርታ ባኣዚ'' ዴንቂባኣ ዎዶ''ና ቦርሲንታንዳኔ።

⁹ማዻ ዓሳ ማዺሻ ዓሶም ዓይሢንታንዳጉዲ፥ ቢያ ባኣዚ''ና ዔያቶ ዎዛሳንዳጉዲ ሃሣ ፑርታ ዑኡሲያ ዔያቶም ማሁዋጉዲ፥

¹⁰ዎይሣ ዓሶኮ ዓኣ ባኮዋ ዉኡቁዋጉዲ ዞሬ፤ ኑና ዻቂሻ ፆኦዛሢኮ ዔርዚፃ ቢያ ባኣዚ''ና ቦንቺንታንዳጉዲ ቢያ ዎዴ ጉቤ ዒናፓ ጉሙርቂንታያ ዔያታ ማዖንጎ።

¹¹ፆኦሲ ዓሲ ቢያ ዻቂሻ፥ ኮሹሞ ዒንጊሢ ፔጋሲ ዻዌኔ፤

¹²ዬይ ኮሹሞ ዒንጊፃ' ጎሜ ዓሲ ማዒሢና ዓሲ ማሊሢ ሱኡኬ ኑ ሃሻ''ንዳጉዲና ኑና ኑ ዔሪ ዎይሥሢና፥ ሃሣ ፂሉ''ሞና ጊንሣ ዓያናና ዓኣ ዓሲያ ማዒ ሓያ ሳዖይዳ ኑ ናንጋንዳጉዲ ኑና ዔርዛኔ።

¹³ዬያይዲ ኑ ዓንጂንቴ ኑኡኮ ሃጊ ማዓንዳ ዎዞ'' ካፓኔ፤ ዬይ ኑኡኒ ካፓ ሃጊ ማዓንዳ ዎዛ'፥ ዼኤፖ ኑኡኮ ጎዳሢ፥ ኑና ዻቂሻ ዬሱስ ኪሪስቶሴኮ ቦንቾና ሙኪ ጴዺፆኬ።

¹⁴ኪሪስቶሴ ፑርታ ባኣዚ'' ቢያይዳፓ ኑና ዻቂሻኒና ኮሺ ማዾ ማዻኒ ጎኦባ ማዔያ ሃሣ ዒዛም ኑ ዱማዼያ ጌኤሺ ዓሲ ማዓንዳጉዲ ኑና ጌኤሻ''ኒ ኑ ጋይቴ ፔና ዓኣሢ ዒንጌኔ።

¹⁵ዓካሪ ሃንሢ ባኮ ዔርዜ፤ ጉቤ ማዔ ቢታንቶና ዓሶ ዞሬ፥ ሃሣ ጎሬ፤ ዖኦኒያ ኔና ቦሆፓ።