ቲታ 2

1

2

3

¹ሺን ኔኒ ዴዑዋ ዴማናው ጊጊያ ቲሚርቲያ ታማሪሳናው ቤሴ።

²ጪማ ኣቱማ ኣሳይ ኣማኑዋን፥ ሲቁዋኒኔ ዳንዳያን ሚኖ ጊዳናዳን፥ ቃሲ ማꬆቴናዋ፥ ቦንቼቲያዋኔ ባሬናካ ናጊያዋ ጊዳናዳን ዞራ።

³ሄዋዳንካ ጪማ ማጫ ኣሳይ ጌሻ ዴዑዋ ዴዒያዋንታ፥ ዚጊሬናዋንታ፥ ዎዪኒያ ኤሳሲ ሞዴቴናዋንታኔ ሎዖባ ታማሪሲያዋንታ ጊዳናው ቤሴ።

⁴ኡንቱንቱ ፆሳ ቃላይ ቦሬቴና ማላ፥ ባሬንቱ ኣሲናቱዋኔ ባሬንቱ ናና ሲቂያዋንታ፥ ባሬንታካ ናጊያዋንታ፥ ጌሻቱዋ፥ ባሬንቱ ጎሌን ኦꬂያዋንታ፥ ኬካቱዋኔ ባሬንቱ ኣሲናቱዋሲካ ኣዛዜቲያዋንታ ጊዳና ማላ፥ ያላጋ ማጫዋንታ ታማሪሳ።

⁶ሄዋዳንካ ያላጋ ኣቱማ ኣሳቱ ባሬንታ ናጋና ማላ ዞራ።

⁷ኔኒ ኔ ሁጴዉካ ሎዖ ኦሱዋ ኡባን ኡንቱንቶ ሌሚሶ ጊዳ፤ ኔኒ ታማሪሲያዋንካ ኣማኔቲያዋኔ ቦንቼቲያዋ ጊዳ።

⁸ኔ ሞርኬቱ ኑና ዚጊሪያባይ ኡንቱንቱሲ ꬋዪያ ዎዴ ኡንቱንቱ ዬላታና ማላ፥ ኔኒ ቦሬቴና ሎዖ ሃሳያ ሃሳያ።

⁹ኣዪሌቱ ባሬንቱ ጎዳቱዋሲ ኣዛዜታና ማላኔ፥ ኡንቱንቱና ፓሉሜቴናን ኡባባኒ ኡንቱንታ ናሼቻና ማላ ዞራ።

¹⁰ኡንቱንቱ ባሬንቱ ጎዳቱዋፔ ዉዔና ማላ፥ ቃሲ ኑና ኣሺያ ፆሳዋ ታማሪሲያዋ ኡባባኒ ጋላቲሳናው፥ ባሬንቱ ኦꬂያ ኪታን ኡባ ዎዴ ሎዓኔ ኣማኔቲያዋንታ ጊዲያዋ ቤሳና ማላ፥ ኡንቱንታ ዞራ።

¹¹ኣዪሲ ጎፔ፥ ፆሳይ ኣሳ ኡባ ኣሺያ ባሬ ኣꬎ ኬካቴꬃ ቆንጪሴዳ።

¹²ሄ ኣꬎ ኬካቴꬃይ ናጋራ ኦሱዋኔ ሃ ኣላሚያ ኣሙዋ ኑኒ ኣጋናዳኒኔ ኑ ሁጲያ ናጊዴ፥ ፆሳ ማላቲዴ፥ ፂሎቴꬃን ዴዓናዳን፥ ኑና ታማሪሴ።

¹³ኑኒ ኑ ዎልቃማ ፆሳይ፥ ኑና ኣሺያ ዬሱሲ ኪሪስቶሲ ቤታና ጌዳ ኣንጄቴዳ ቦንቾ ጋላሳ ናጌቶ።

¹⁴ኢታ ኦሱዋ ኡባፔ ኢ ኑና ዎዛናዉኔ ሎዖባ ኦꬃናው ኣሞቲያ ባሬ ጌሻ ኣሳ ኬሳናው፥ ኑ ዲራው፥ ባሬ ሁጲያ ኢሜዳ።

¹⁵ኔኒ ሃዋ ታማሪሳ፥ ኔ ኩሜንꬃ ማታኒ ዞራኔ ሴራ፤ ኦኒኔ ኔና ካꬎፖ።