1Hianagi kagrama rempi huzmisanana, tamage kema hu'nesia ke'age (doctrine) huzamasmio.
2Ranra venenea rempi huzamige'za, fru kefinti kea antemse'za ranke osu'za, knare zmavuzmava nehu'za, knare zamagu'zamagesa antahiho. Hankave zamentinti nehu'za vaheku zamesi nezmante'za, kragogo onkiza hanaveti'za maniho.
3Ana zanke hunka ranra a'ne rempi huzamige'za, mikaza hanafina Anumzamofo agorga mani'ne'za, vahe agenke osu' aka timo'a zamazeri havia osnige'za knare'za rempi huzamiho.
4Ana nehu'za zamagra zahufa a'ne nagara zamumro antesage'za, ve' zmine, mofavre zaminena zamesi zmantegahaze.
5Knare zamagu'zamagesa nentahiza avusese hu'za mani'ne'za, vaheku vhaku nehu'za, nezme agorga'a mani'nesage'za nege'za Anumzamofo nanekea huhaviza osugahaze.
6Anahu kna hunka nehazave nagara zamumro antege'za, kegva hu'za maniho.
7Hakare'zama hanampina knare avu'ava huzamio. Huzameri hanampina zokago vakago osunka tamage ke'age nehunka,
8tamage ke'age huzamasmigeno mago'mo'a huhaviza huoganteno. E'ina hanankeno aza'o huhaviza hugantesimo'a agzegu hugahie. Na'ankure zamagra havigema hurante zankura hakregahaze.
9Kazokzo eri'za vahera rempi huzamige'za mika'zama hanafina kva vahe'mokizmi zamagorga mani'ne'za zamazeri muse nehu'za, ke nona'a huozmante'za,
10mago'zazamia kumzana oseho. Hagi eri'zana antahizami'are erifatgo nehnageno, e'i anazamo Anumza tzahu ne'mofo mani'za huzmerisage'za nege'za, mono nontahisaza kva vahe'mozane, megi'a vahe'mo'za zamagu'a rukrahe hugahaze.
11Hu'neanagi Anumzamofo asunku zamo vahe avare'zana hakare vahete erino efore hu'ne.
12Tagri rempi huramino mono ontahi avu'avazane, ama mopafi zanku avesi'zanena atreho nehuno, hagi tmufa kva huta, fatgo huta anumza (godly) avu'avate ama kna'afina maniho,
13ana knama esigu avega anteneta muse nehune, tusi'a msa'afi efore hanigu, Ra Anumzantima, Tzahu ne' Kraisi Jisasi esigu avega ante'none.
14Tagriku huno Agra'a avufga atreno kefo'zampinti miza seranteno tvare atre'ne, Agri'a vahere huno sese huranteno, tvare Agrarega tante'negu, muse nehuta knare'zanke hanune.
15Mika'zana kagripi hampo'na huno me'neanki rempi hunezminka, hampo'na tinka nezmasminka, zamazeri fatgo nehuge'za, kagrikura amne vahere hu'za osiho.
