Taalie 8:3-27

³A a xui itema taa sode dɛ ra mixi dangima dɛnnaxɛ. A naxɛ,

⁴«Adamadie, n na wo tan nan maxilife, masenyi na n yi ra ibunadama birin bɛ.

⁵Xaxilitare xa xaxili sɔtɔ, lɔnnitare xa lɔnni fen.

⁶Wo wo tuli mati n ma masenyi hagigɛ ra, masenyi tinxinxi naxan minima n dɛ i.

⁷N na nɔndi nan falafe wo bɛ yi ki. Tinxintareya mu rafan n ma fefe ma.

⁸N ma wɔyɛnyi birin tinxin, wule nun sɛniyɛntareɲa yo mu na e ya ma.

⁹Nee fiixɛ xaxilima bɛ, e tinxin lɔnnilae bɛ.

¹⁰Wo xa n ma lɔnni fen dangi gbeti ra, wo xa a kolon xaxili fanyi tide gbo xɛɛma fanyi bɛ,

¹¹fahaamui tide dangi gɛmɛ tofanyi ra. Sese mu na naxan tide dangima nee ra.»

¹²«N tan lɔnni, n soma fe kui, n a tagi raba.

¹³Xa Alatala xa yaragaaxui na i bɛ, i fe ɲaaxi nan xɔnma. Yɛtɛ igboɲa, fe ɲaaxie, nun wɔyɛn kobie, n nee nan xɔnma.

¹⁴N gbe nan na marasi nun nɔndi ra, xaxili fanyi nun sɛnbɛ kanyi nan n na.

¹⁵N tan nan mangɛe raɲɛrɛma, mangɛ naxee yaamari tima tinxinyi ra.

¹⁶N tan nan bɔxi yareratie raɲɛrɛma, n kuntigie tima adamadie ya ma.

¹⁷N mixi nan xanuma, naxan n xanu. Naxee n fenma, nee n toma nɛ.

¹⁸Bannaya nun binyɛ na n tan nan yi ra, harige naxan mu kanama.

¹⁹N naxan fima mixi ma a fan xɛɛma fanyi bɛ, a xa geeni dangi gbeti ra.

²⁰N nan n ɲɛrɛma nɔndi kira nan xɔn ma, tinxinyi na dɛnnaxɛ,

²¹alako n xanuntenyi xa harige sɔtɔ kɛ ra, fe fanyi xa lu e yi ra duniɲɛigiri kui.»

²²«Alatala naxa n daa a xa wali birin fɔlɛ ra.

²³N nu na kabi fɔlɛ, beenun bɔxi xa daa.

²⁴N bari tɛmui baa mu nu na, dulonyi mu nu na.

²⁵N bari nɛ beenun geyae xa mini,

²⁶beenun bɔxi nun fɔtɔnyi xa daa.

²⁷A to nu koore daafe, n nu na. A to nu koore walaxɛ italafe, n nu na.