Taalie 8:16-35

¹⁶N tan nan bɔxi yareratie raɲɛrɛma, n kuntigie tima adamadie ya ma.

¹⁷N mixi nan xanuma, naxan n xanu. Naxee n fenma, nee n toma nɛ.

¹⁸Bannaya nun binyɛ na n tan nan yi ra, harige naxan mu kanama.

¹⁹N naxan fima mixi ma a fan xɛɛma fanyi bɛ, a xa geeni dangi gbeti ra.

²⁰N nan n ɲɛrɛma nɔndi kira nan xɔn ma, tinxinyi na dɛnnaxɛ,

²¹alako n xanuntenyi xa harige sɔtɔ kɛ ra, fe fanyi xa lu e yi ra duniɲɛigiri kui.»

²²«Alatala naxa n daa a xa wali birin fɔlɛ ra.

²³N nu na kabi fɔlɛ, beenun bɔxi xa daa.

²⁴N bari tɛmui baa mu nu na, dulonyi mu nu na.

²⁵N bari nɛ beenun geyae xa mini,

²⁶beenun bɔxi nun fɔtɔnyi xa daa.

²⁷A to nu koore daafe, n nu na. A to nu koore walaxɛ italafe, n nu na.

²⁸A to nu nuxui tife koore ma, n nu na. A to nu ye raminife sɛnbɛ ra bɔxi bun, n nu na.

²⁹A to nu naaninyi safe baa bɛ alako ye naxa fa banbaran ɲɛ, n nu na. A to nu duniɲa bunyi dɔxɔfe, n nu na.

³⁰N fan nu na a fɛ ma a malife ra, lɔxɔ yo lɔxɔ n findi a bɛ sɛɛwɛ nan na, n fa n ɲɛlɛxin a ya i tɛmui birin.

³¹N ɲɛlɛxinxi a xa duniɲa daaxi nan na, a findixi n bɛ sɛɛwɛ ra lufe ra adamadie tagi.»

³²«Yakɔsi n ma die, wo wo tuli mati n na, sɛɛwɛ na mixi bɛ naxan birama n ma kira fɔxɔ ra.

³³Wo wo tuli mati n ma xaranyi ra, wo xa findi lɔnnilae ra. Wo naxa a rabolo de.

³⁴Sɛɛwɛ na mixi bɛ naxan a tuli matima n na, naxan luma n sɛɛti ma tɛmui birin, naxan n mamɛma naadɛ ra.

³⁵N kolonma bara kisi, Alatala bara hinnɛ na kanyi ra.